Rut 3 - Yus Papí: Shuarja̱i̱ Yus Yamaram Chicham Najanamu

Rut Puásan yáintkiata timia

¹ Nuyá̱ chíkich tsawantin Nuimí najati̱n chicharuk “Nawantru, nuatnaikiam shiir pujusai tusan ¿áishmaṉkan e̱a̱tkachminkiaitjiam?

² Kame Puasai̱ ni takarniúri̱ji̱a̱i̱ iruntra takakmasmamna nuka íi shuarchakait. Nisha ju̱ kashi sewata irumtai̱niam saepe̱n pakarman awa̱jtiuttawai.

³ Tuma asamtai maim péṉker iwiarmampram kuṉkuin ukatmamkam sewata irumtai̱niam wetá. Túrasha nu áishmaṉ yurumá umar umíachuk wantintiukaip.

⁴ Tura kanartaj tusa tui̱ṉ tepesat péṉker nekaram weritia. Túram itiura nawemsa tepestata nui̱ nawe̱nmaani̱ tepakum esekmatai̱ri̱ uratkam esekmaram tepesta. Túrunawakmin urukattam núnaka niṉki ujatmáktatui.”

⁵ Tutai nuwa̱sha chichaak “Ashí túrutmena tímiatrusnak umiktajai” tímiayi.

⁶ Tutai Rutcha sewata pakatai̱niam we tsatsarí̱ jintintramia tímiatrusaṉ umikmiayi.

⁷ Tura Puas yurumá umutairi̱n umar umik ti shiir waras sewata júukar irumpramunam ayaam tepes kanuumiayi. Túrunamtai nu nuwa̱sha yáitmataik nawe̱nmaani̱ jearí esekmatai̱ri̱n uratak esekmar tepesmiayi.

⁸ Tura kashi ajapéṉ ai̱ nú aishmaṉsha awakmámki̱ shintiar ayantár ni nawe̱e̱n nuwa̱ tepan nekaamiayi.

⁹ Tura tepá wainiak “Yáitiam” tutai aya̱k “Rútaitjiai ámin takarniuitjiamna núitjiai. Tura ámetme winia waitkiamniamka. Tuma asam nuwemea ímiatrusmek wáitkiata” tímiayi.

¹⁰ Tutai Puas chichaak “Yaunchu túrutairmiji̱a̱i̱sha naṉkaamas yamái túramna ju̱ imiá péṉkeraiti. Kame náṉkamas shuar wíji̱a̱i̱sha uchí kuítrintin tura kuítrinchaksha natsa e̱a̱kcha asakmin makú, Uunt Yus yaintmakti.

¹¹ Yamaikia makú, sapijmiakaip. Ame seatmena núnaka tímiatrusnak umiktatjai. Kame ju̱ péprunam pujuinia ju̱ka péṉker núwa̱itmena nuna ashí nekarmainiawai.

¹² Kame wisha ní shuari̱ṉkitjiai. Túrasha ame tsatsarmi umai̱ya̱ nekas ámin waitmakminkia pujawai.

¹³ Túrasha ju̱ kashi ju̱i̱ṉ juaktá. Kashin ni sumarmakka sumarmakti. Nusha wíji̱a̱i̱ṉkia péṉkeraiti. Antsu nakitrámpramtaiṉkia wi sumaktajme, Uunt Yus íimmianum tájame. Nui̱ tepesta. Tsawa̱a̱rti.

¹⁴ Túrasha aents pujuinia ju̱ waitmakar nuwa̱ sewata irumtai̱niam tamai turamara̱i̱ṉ kíritiak nantaktia” Puas timia asa nui̱ ni nawe̱ni̱ṉ kanar tsawa̱a̱k nantakmiayi.

¹⁵ Nuyá̱ Puas chicharuk “Awaṉkémprum ayapá̱rta.” Tutai jusa ayapá̱rmatai sewata nekapmam kijintri̱ sais jean susá áentskamiayi. Nu túram nisha péprunam waketkimiayi.

¹⁶ Tura Nuimisha najati̱ támatai chicharuk “Najatru, ¿itiur naṉkaamasumea?” tutai Rut Puasa chichame̱n mash ujakmiayi.

¹⁷ Nu arant chichartak “‘Ame tsatsarmiiṉkia aya jú̱nikkia waketkishtiniaitme’ tusa ju̱na sewata kijintri̱ sais nekapek jean surusai” tímiayi.

¹⁸ Tutai Nuimí chicharuk “Nawantru, chícham ¿itiur iwiarnartiṉ? Nákasta. Nú aishmaṉka chichaman iwiartsukka iniaisashtatui” tímiayi.