Rum. 8 - Yus Papí: Shuarja̱i̱ Yus Yamaram Chicham Najanamu

Yusa Wakaní̱ji̱a̱i̱ péṉker wekasatin

¹ Túrasha yamaikia Jesukrístuja̱i̱ tsaniṉkiaru áinianka Yuska “tunaan túrawar jákatniunam wétin áiniawai” tatsui. Nu shuar ni aya̱shi̱ wakerana nuna umirtsuk antsu Yusa Wakaní̱ wakerana nuna umirainiawai.

² Jesukrístuja̱i̱ tsaniṉkiu asakrin Yusa Wakaní̱ nekas iwiaaku awajtámsaitji. Tuma asamtai tunáa túratniunmaya̱ tura jákatniunmaya̱sha aṉkant ajasuitji.

³ Aya̱sh wakerutaiṉkia wi akupkámun enentáimtakui nuna naṉkaamas tunaan wakerumtikrimiayi. Tuma asamtai akupkámuka yáinkiachminiuyi. Antsu akupkámu tujintkiamia nuna Yus túraiti. Ni Uchirí̱n aya̱shtin awajás tunaan jarukat tusa akupkámiayi. Tura nuja̱i̱ aya̱sh tunáa wakeramun nupetkamiayi.

⁴ Túramtai ii yamaikia aya̱sh wakerana nu umirtsuk tura Yusa Wakaní̱ wakeramu túrakur akupkámu tana nu umirniuitji.

⁵ Aya̱sh wakeramun umirainia nu, aya̱shnia nunak enentáimtuiniawai. Antsu Yusa Wakaní̱ wakeramun páchinia nuka Yúsnan enentáimtuiniawai.

⁶ Aya̱shnia nuna enentáimtuinia nú shuar jákatniunam wénawai. Antsu Yúsnan enentáimtuinia nuka Yusja̱i̱ shiir nawamnaikiar tuke pujusártatui.

⁷ Aya aya̱sh wakeramun enentáimtuinia nú shuar Yusa nemasri̱ áiniawai. Yus akupeamun nakitiáinia ásar ni táman umirkatniun peṉké jeainiatsui.

⁸ Tuma asamtai shuar ni aya̱shí̱ wakeramuri̱ warareakka Yusan shiir awajsachminiaiti.

⁹ Tura átumka aya̱sh wakeramu umirtsuk tura Yusa Wakaní̱ pujurtamkurmin ni wakeramu enentáimtiniaitrume. Ashí shuar Krísturtin ainia nu ni Wakaní̱n takaku áiniawai. Takakchaitkiuṉka nuikia Krístunuchuiti.

¹⁰ Tura Kristu atumín pujurtamkurminkia atumí aya̱shi̱ tunaaja̱i̱ jakamnia ai̱ṉ Yus “péṉkeraitme” túramu asamtai atumí wakaní̱ṉkia nekas tuke iwiaakuiti.

¹¹ Yus Jesukrístun jakaan iniantkímiayi. Tuma asamtai ni Wakaní̱ atumí enentái̱n pujurtamkurminkia Jesusan iniantkímia núnisaṉ nu Wakanja̱i̱ yamaram iwiaakmaja̱i̱ iniantamkittiarme.

¹² Tuma asamtai yatsuru, aya̱sh wakeramu peṉké umirkashtiniaitji.

¹³ Aya̱sh wakeramu umirniuitkiurmeka jakattarme. Antsu Yusa Wakaní̱ pujurtamkurmin aya̱sh wakeramu nupetkarmeka péṉker wekasarum nekas iwiaaku átatrume.

¹⁴ Ashí shuar Yusa Wakaní̱ timiaja̱i̱ métek wekainia nu, nu shuar nekas Yusa uchirí̱nti.

¹⁵ Yusa Wakaní̱ iin pujurtamkurin Yusa uchirí̱ ajasár sapijmiatsuk Yusai̱ weamkar “Aparu” tíminiaitji.

¹⁶ Nu Wakan “nekas Yusa uchirí̱nme” ii enentái̱n túramji.

¹⁷ Tura ni uchirí̱ ajasu asakrin Yus timia núnisaṉ ashí Níniun suramsattaji. Krístun ashí susattana núnisaṉ iincha suramsattaji. Yamái Krístunu takaakur wáitiakrikia ukunam Krístuja̱i̱ métek ti shiir awajnástatji.

¹⁸ Maa, yamái ti wáitiakrisha ukunmaṉka nayaimpiniam ti shiir pujakur nu wáitsamu kajinmátkittiaji.

¹⁹ Tsawant jeamtai Yus ashí ni shuari̱n Niji̱a̱i̱ métek ti shiir awajsártatui. Nuiṉ nekas Yusa uchirí̱ ainia nu ti paant nekanattawai. Nu tsawantan wáinkiatniun ashí Yus najanamu írunna nu ti nákainiawai.

²⁰ Ashí Yus najanamia nuna yámankamtaik tí peṉker najanamiayi. Túrasha yajauch ajasmiayi. Nusha ní neaskeka túrunachmiayi. Antsu Yus ukunam ataksha iwiarnartin atí tusa tunáa waya̱munam yajauch ajasat tusa tsaṉkatkamiayi. Tuma asamtai iwiarnartin tsawantan nákawai.

²¹ Nu tsawantai̱ ashí Yus najanamu emesnartinniumia̱ uwemprartatui. Tura ashí Yus najanamuka shuar Yusa uchirí̱ ajasárua nuja̱i̱ métek shiir awajnásar aṉkant ajasártatui.

²² Yamaisha ashí Yus najanamu ainia nu, nuwa̱ jatema waitia núnis ti wáitiainiawai.

²³ Yus najanamuka ashí wáitiainiawai. Iisha Yusa Wakaní̱ takakiatar ti wáitiaji. Tura Yusa Wakaní̱ takakkur ashí Yus suramsattajnia nu achiktin nékaji. Tuma asar nekas Yusa uchirí̱ paant awajnástin tsawant nákaji. Nui̱sha ii aya̱shí̱sha aṉkant awajnástatui.

²⁴ Nu tuke enentáimtuki̱ wéakur takamtsuk uwemprattaji. Yamái nu wáinchiatar tuke nákaji. Warí, ¿wáinjinia nu nákajik?

²⁵ Tuma asar tuke waincha asar katsuntrar nákaji.

²⁶ Nu arantcha ii kakarmachu nekapeakrin Yusa Wakaní̱ yáintmaji. Kame Yus áujsatniusha nékachkurin iin yáintmaji. ¿Warí seattajⁱ tura itiur seatjik? Nu nékatsji. Tura itiurchat pujakur ti wáitiakrincha Yusa Wakaní̱ iin áujturmaji.

²⁷ Tura Yus ii enentái̱n enentáimtaj nuna nékaiti. Tuma asa ni shuari̱ asakrin ni Wakaní̱ ni wakeramuja̱i̱ métek seatramkurin ántawai.

Ti nupetmakuitji

²⁸ Yus anea asakrin ashí naṉkatamjinia nuja̱i̱ Yus pujurtamji. Tura nuja̱i̱ péṉker awajtamji. Nu paant nékaji. Tura Ni wakerimia núnisaṉ Ní shuar awajtámsaitji.

²⁹ Yámankamtaikniumia̱ iin nekarmak ni Uchirí̱ Jesukrístuja̱i̱ métek ajasat tusa achirmákmiaji. Nuja̱i̱ Yusa uchirí̱ untsurí ajasji. Tura Kristu ii iwia̱i̱ri̱nti.

³⁰ Tura Yus achikmia nuna Niniu awajsámiayi. Tura nu shuaran “péṉkeraitrume” tímiayi. Tura ti shiir awajsámiayi.

³¹ Wats, nuikia Yus iin yáintmakrin ¿yaki iin nupettamkattajⁱ?

³² Ni Uchirí̱ncha suritramkachmiaji antsu ashí iin jarutramkarat tusa akuptúrmakmiaji. Tura asa ni Uchirí̱ji̱a̱i̱ ashí ti shiira nuna suramsashtatjik.

³³ Yus achikmia nú shuaran ¿yaki sumamtikiat? Yus Ápaka “péṉkeraitrume” tiniu asa peṉké túrashtatui.

³⁴ Tura ¿yaki “jinium apenáti” titi? Warí, Kristu peṉké túrashtatui. Antsu nu shuaran jarukmiayi. Tura nantaki̱ Yusa untsuurí̱ni̱ ekemas iin áujturmaji.

³⁵ Kristu ti anenma asakrin iin akantámkitin atsawai. Wáitiakrisha, itiurchat íṉkiuakrisha, shuar áintramkurnisha, tsukamakrisha, entsatai̱ atsakuisha, tsuumainja̱i̱sha tura mantamnakrisha nuja̱i̱ “Kristu anentsui” tíchamniaitji. Nuka Kristu aneṉkrattairi̱ya̱ akantámkitin jeatsui.

³⁶ Yus Papiniumsha jú̱nis áarmaiti “Amé shuar asar tuke mantamnatin pujaji. Murik matniua áintsaṉ enentáimturmaji.” YKan. 44:22

³⁷ Tuma ai̱ṉ Kristu iin anenma asakrin Niji̱a̱i̱ ti nupetmakuitji.

³⁸ Kristu aneṉkrattairi̱ya̱ akantámkitin peṉké atsawai. Nuna ti paant nékajai. Jákatniusha, iwiaakmasha, nayaimpinmaya̱ suntarsha, ashí nayaimpinmasha tura nuṉkanmasha akupin ainia nusha, yamái írunna nusha, ukunam átatna nusha,

³⁹ yakí̱ írunna nusha, nuṉká írunna nusha, kame ashí Yus najanamu írunna nusha Yusa aneṉkrattairi̱ya̱ peṉké akantámkichminiaitji. Yusa aneṉkrattaisha ii Uuntri̱ Jesukrístu túrunamuja̱i̱ paant wainji.