Rum. 4 - Yus Papí: Shuarja̱i̱ Yus Yamaram Chicham Najanamu

Aprajám Yus táman enentáimtak tunaarincha awajsamu

¹ Ashí Israer shuara uuntri̱ Aprajámai̱ enentáimsatai. Nisha ¿itiurak Yusja̱i̱ péṉker ajasma?

^2-3 Ni péṉker takasmaja̱i̱ Yusja̱i̱ péṉker ajasuitkiuṉka naṉkamantu enentáimtumarainti. Antsu Yus Papí tawai “Aprajám Yus táman nékaskete tú enentáimkiui Yus ‘péṉkeraitme’ tímiayi” Naṉ. 15:6 tawai. Nu túramu asa Aprajámsha Yus íimmianum naṉkamantu enentáimtumarchamniaiti.

⁴ Shuar íniamna nu takasmatai ¿aya tsaṉka asam akiktatmek? Warí, ni takasmanum páchitsuk akikchatniukait.

⁵ Antsu shuar ni péṉker túramuri̱n enentáimtutsuk áyatik “Yus tunáa shuaran tunaarincha awajniuiti” tú enentáimkiui Yuska tsaṉka asa “péṉkeraitme” tawai.

⁶ Tura péṉker túrachunak Yus “péṉkeraitme” takui̱ nu shuar shiir warasminiaiti. Núnisaṉ tawai úunt akupin Tawit

⁷ “Shuar ashí ni tunaari̱n Yus asakátar tsaṉkuramu ana nuka shiir enentáimpramniaiti.

⁸ Uunt Yus ni tunaari̱n enentáimtachma asa ti warasminiaiti.” YKan. 32:1-2

⁹ ¿Aya tsupirnakukeash warasminiait? Tura tsupirnakchasha waraschamniakait. Warí, Aprajám Yusan shiir enentáimtakui Yus “péṉkeraitme” tímiayiNaṉ. 15:6 taji.

¹⁰ Tura Aprajám tuke tsupirnatsa̱i̱ṉ Yus nuna tímiayi. Emka Yus “péṉkeraitme” timia nú ukunam Aprajám tsupirnakmiayi.

¹¹ Aprajám tsupirnatsuk Yusan shiir enentáimtusmatai Yus “péṉkeraitme” tusa “tsupirnaktiniaitme” tímiayi. Núja̱i̱ṉkia ashí Yusan shiir enentáimtuinia nú shuar tsupirnatskesha Aprajám wea áiniawai. Tura nu shuaran Yus “péṉkeraitme” tawai.

¹² Tsupirnakusha aya tsupirnaku asa Aprajám wea áiniatsui antsu nu arant Aprajámja̱i̱ métek Yusan shiir enentáimtuinia nuka Aprajám wea áiniawai. Kame Aprajám tuke tsupirnatsuk Yusan shiir enentáimtusmiayi.

Yus nekas enentáimtusar Ni tama umíamu

¹³ Yaunchu Aprajáman Yus chicharuk “Amincha amé wea shuarnasha jú̱ nuṉkan susattajai” tímiayi. Nunasha Aprajám Yus akupkámun umireakui tíchamiayi. Antsu Aprajám Yusan nekas enentáimtakui Yus “péṉkeraitme” taku nuna tsaṉkatkamiayi.

¹⁴ Kame aya akupkámun umirniun súsatniuitkiuiṉkia nuikia Yus enentáimtustin ántraiti. Tura Yus Aprajáman timia nusha ántraiti.

¹⁵ Akupkámu akui shuar umirkachka ti asutniáshtatuak. Tura atsakuiṉkia ¿asutniátniukait? ¿Itiurak umirtsuk ikiuktiṉ?

¹⁶ Tuma asamtai Yus ti anenkartin asa Niin nekas enentáimtuinian ashí tsaṉkatkaiti. Núja̱i̱ṉkia Aprajám weasha Yus Aprajáman timia nuna páchitsuk wáinkiartatui. Iisha Aprajámja̱i̱ métek Yus nekas enentáimtakur ní weaitji. Tuma asamtai Muisais akupkámun umirniuncha tura umirniuchuncha mái̱ metek ashí iin Yus ashí Aprajáman timia nuna tsaṉkatramkattaji.

¹⁷ Kame Yus Papinium Aprajám áatramuiti “Untsurí shuarsha amé wea ajasártatui.” Naṉ. 17:5 Nu asamtai iisha Aprajámja̱i̱ métek Yus shiir enentáimtakrinkia Yus iincha Aprajám wea áintsaṉ íirmaji. Nú Yuska ti kakaram asa jakaancha iwiaaku awajniuiti tura atsana nunasha ana nútiksaṉ nájanui.

¹⁸ Yus “ti pampaṉtatme” Naṉ. 15:5 takui̱ Aprajám tí uuntach áyat Yus timian enentáimtak yajutmartinian nákasmiayi. Nuja̱i̱ Yus timia áintsaṉ untsurí shuar ní wea ajasármiayi.

^19-20 Aprajámsha sian uwí takakuitiat tura ni nuwé̱ Sarasha takutsuk uunt ajasmataisha tuke iniaitsuk Yus timia nuna nekas enentáimtusmiayi. “Yus nekasash taa” tútsuk shiir awajsámiayi. Núja̱i̱sha nuna naṉkaamas kakaram ajasmiayi.

²¹ Tuma asa “nekas Yus tana nuna páchitsuk umiktatui” tu enentáimpramiayi.

²² Nu asamtai Yus “péṉkeraitme” Naṉ. 15:6 tímiayi.

²³ Tura Yus nekas enentáimtamunam Yus “péṉkeraitme” tana nu aya Aprajámnak áatrachmaiti.

^24-25 Aya níniak tatsui antsu iincha túramji. Iisha núnisrik ii Uuntri̱ Jesus tama nékaskete tu enentáimtakriṉkia Yus iincha “péṉkeraitme” turamtatji. Jesuska ii tunaari̱n jarutramkatniun surunkamiayi. Tura nuja̱i̱ tunaarincha awajsamu asakrin Yus iin “tsaṉkuramuitrume” tusa Jesusan ataksha iniantkímiayi.