Rum. 15 - Yus Papí: Shuarja̱i̱ Yus Yamaram Chicham Najanamu

Chíkich wakeramuk enentáimtustin

¹ Yusja̱i̱ katsua̱ru ájinia nu iik enentáimtumatsuk kakarmachu ainia nu yáiṉtiniaitji.

² Chíkich shuar wakeramu enentáimtustiniaitji. Tura Yusja̱i̱ nú naṉkaamas shiir wekasatniun yáiṉminiaitkiui túratniuitji.

³ Krístusha ni wakeramun túrachmiayi. Antsu Yus Chicham tana núnisaṉ chikichnan enentáimtusmiayi. Nu asamtai Yusan umirin asa wáitiak timia nu áarmaiti “Ámin katsekramainiak Winiaja katsekrukarmiayi.” YKan. 69:7,9,20

⁴ Núnisaṉ ashí yaunchu Yus Papinium aarma iin jintintrámatniun áararmiayi. Nuja̱i̱ atsaṉtamkurin shiir wainkiattajnia nuka katsuntrar nákastatji.

⁵ Yus atsaṉtamar katsuntratniun jintintramji. Tuma asa Jesukrístu túramia áintsaṉ atumniasha chikichik enentáiji̱a̱i̱ enentáimtunaisar pujustinian yainmakarti.

⁶ Nuja̱i̱ ashí métekrak Yus shiir awajsattarme. Nisha ii Uuntri̱ Jesukrístuncha Aparí̱nti.

Israerchanum uwempratin chicham etserkamu

⁷ Tuma asamtai chíkich shuarja̱i̱sha shiir awajnáisatarum. Kristu núnisaṉ Yusan shiir awajsat tusa iincha shiir awajtámsamiaji.

⁸ Ju̱na tajai. Kristu tsupirnakman yaiṉkiartaj tusa támiayi. Tura Yus ti yaunchu nuna we̱a̱trí̱n “túrataj” timia nu uminkiat tusa támiayi. Nuja̱i̱ Yus timia nuna umikmia nu nekaamniaiti.

⁹ Tura nu arantcha Israer shuarchasha Yus waitnentrartin ásarmatai nin shiir awajsarat tusa támiayi. Tura Yus Papisha tawai “Ámin kantamprakun ashí shuarnum shiir awajsattajme.” 2 Sam. 22:50; YKan. 18:49

¹⁰ Tura nu arantcha tawai “Ashí nuṉkanmaya̱ shuartiram ashí Israer shuar Yusna ainia nuja̱i̱ warastarum.” Muis. 32:43

¹¹ Tura ataksha tawai “Ashí aents ii Úuntri̱n shiir awajsarti. Tura ashí shuarsha Nin ‘Ti úuntaiti’ tiartí” tawai. YKan. 117:1

¹² Isayassha áarmiayi “Tawitia aparí̱ Isái weanmaya̱ akupin akintkiáttawai. Nisha ashí nuṉkan akupeakui ashí shuar Niiniak shiir enentáimtusartatui.” Isa. 11:1,10

¹³ Jintia íimprutai̱ Yuska Yus enentáimtakrumin ashí warastinniasha tura ashí aṉkant shiir pujustinniasha suramsati. Túramtai Yusa Shiir Wakaní̱ kakarmari̱ji̱a̱i̱ nuna naṉkaamas jintia íimprustinian amasti.

¹⁴ Yatsuru, atumsha anenainiaitrume. Tura ashí Yusna nekaarum nuamtak chicharnaikiatin nékarme.

¹⁵ Tuma ai̱ṉ kajinmatki̱i̱rum tusan ataksha ti paant áakun ju̱na enentáimtikiajrume. Yus winia waitnentrak ni Chichame̱n etserkat tusa akuptakui áatjarme.

¹⁶ Kame Jesukrístu Israer shuarchanum Yusa shiir chichame̱n etserkat tusa akuptúkuiti. Nuna túrakun Israer shuarchan Yusa Wakaní̱ji̱a̱i̱ shiir awajsamu ásarmatai Yusai̱ juíniajai. Tura Yussha shiir enentáiji̱a̱i̱ itiainiawai.

¹⁷ Jesukrístu yaintiu asamtai Yusna takarsamaj nuna wararsamniaitjiai.

¹⁸ Tura chíkich shuarja̱i̱ Kristu túramun pachischattajai. Aya wi chichasmaja̱i̱ tura túramuja̱i̱sha Israer shuarchan Kristu umimtikiamia nunak áujmatsattajai.

¹⁹ Yusa Shiir Wakaní̱ kakarmari̱ji̱a̱i̱ aents tujintiamun túran ashí shuaran Jerusaréṉnum naṉkaman etserkin Iririkiu nuṉkanam ejekamjai. Kristu chichaman ashí nu nuṉkanam etserkaitjiai.

²⁰ Nuna túrakun chíkich shuar etserkachmanum Krístunun ántichu áiniamunam uwempratin chichaman etserkaitjiai. Nuja̱i̱ chíkich takasmanum takarsachuitjiai.

²¹ Yus Papisha núnisaṉ tawai “Chichaman peṉké antukcharuka nekaawartatui. Nin áujmatman anturkacharusha unuimiárartatui.” Isa. 52:15

Papru Rúmanam wétaj timia

²² Nuna pujuru asan íitjiarum táyatan íichmajrume.

²³ Tura yamaikia ju̱yá̱ takatrun umikian tura yáunchusha tuke íitjiarum tiniu asan

²⁴ Ispania nuṉkanam wéakun íistatjarme. Tura atumíin shiir irasan Ispanianam wéakui atumsha yáintkiarum shiir akuptúkchattarpash.

²⁵ Tura yamaikia kuitji̱a̱i̱ Jerusaréṉnumia̱ Yus shuaran yáiṉtaj tusan wéajai.

²⁶ Masetúnianmaya̱ shuarsha tura Akayanmaya̱ shuarsha kuítian irurar Jerusaréṉnumia̱ Yus shuaran atsumainia nuna akuptuktai tuíniawai.

²⁷ Ti wakeruiniak túrawarmiayi. Nu nekas túrashtinkiait. Israer shuarnumia̱ Yus Chichaman antukaru ásar yamaikia ni kuítriji̱a̱i̱ páchitsuk yáiṉchatniukait.

²⁸ Tuma asamtai jú̱ kuítian súsaran umiran nuikia Ispanianam wéakun íiktiatjarme.

²⁹ Tura nui̱ winiakun Kristu Shiir Chichame̱n nuja̱i̱ shiir yaiṉtajrum tusan ejetittiajrume.

³⁰ Yatsuru, ii Uuntri̱ Jesukrístunu asarum tura ni Wakaní̱ pujurtamkurmin anenia asarum Yus áujtursak tusan seajrume. Núnisrum wiji̱a̱i̱ métek Yusna takastin yáintkiattarme.

³¹ Jutá nuṉkanmaya̱ Israer shuarnumia̱ uwemtikrat tusarum Yus áujtursatarum. Tura jú̱ kuítian júajna nunasha Jerusaréṉnumia̱ Yus shuar shiir achikiárat tusarum Yus áujtursatarum.

³² Nuja̱i̱ Yus wakerakuiṉkia atumji̱a̱i̱ péṉker wampú enentáimsattsan warasan íittiajrume.

³³ Yus ti shiir pujustinian súana nu atumji̱a̱i̱ tsaniṉ pujurtamsati. Núnisaṉ atí.