Rum. 13 - Yus Papí: Shuarja̱i̱ Yus Yamaram Chicham Najanamu

¹ Akupniúnka ashí shuar umirkatniuiti. Akupniúka Yus apujsamuiti. Yus apujsachma akupin atsawai.

² Tuma asamtai shuar akupniun umirtsuna nu, Yus apujsamun umireachu asa nekas asutniátniuiti.

³ Kame akupniúka péṉker shuar sapijmiakarat tusar apujsachma áiniawai. Antsu yajauch shuar ashamkarat tusar apujsamu áiniawai. Ni ashamtsuk pujustin wakerakmeka péṉker túrata. Túrakminkia akupin shiir enentáimturmartatui.

⁴ Yaintmakat tusa Yus apujsamuiti. Antsu yajauch túrakmeka akupin nekas ashamkatniuitme. Warí, Yus ántar apujsachmaiti. Tunáa shuaran asutiátniun Yus apujsaiti.

⁵ Nu asamtai akupin tuke umirkatniuiti. Aya asutiuáwa̱i̱ṉ tusar umirkashtiniaitji. Antsu enentáiniam itit awajsachma wekasatai tusar umirkatniuiti.

⁶ Tuma asamtai núnisaṉ akupniun kuit súsatniua nu páchitsuk susatarum. Nu takatan pujursarat tusa Yus apujsaruiti.

⁷ Ashí túratniua nu túratarum. Akiktiniaitkiumka páchitsuk akikta. Akupniúsha uuntcha ashí núnisaṉ írunna nusha shiir enentáimtikratarum.

⁸ Wariji̱a̱i̱ṉsha tumashrintin peṉké airap. Antsu mái̱ anenai tuke ajatarum. Kame chíkich shuar aneakum ni péṉker túrattame. Túram ashí akupkámu páchitsuk umirkattame.

⁹ Akupkámusha “Tsanirmawaip, maṉkartuawaip, kasamkaip, chíkich shuar tsanumpruraip, chikichna wakerutkaip” Jiin. 20:13-17 tawai. Nusha tura chíkich akupkámusha ashí ju̱ja̱i̱ tíminiaiti “Ame aya̱shim aneam núnismek ashí shuar aneeta.” Riw. 19:18

¹⁰ Shuar chíkich shuaran aneakka yajauch awajsashtatui. Tuma asa akupkámun ti shiir umirkattawai.

¹¹ Ii yámantkamtaik Yus nekas enentáimtusmiaj nui̱ “Ii ti shiir ajasár tuke uwempratin ukunam átatui” tu enentáimprachiajiash. Antsu yamaikia nu tsawant yuntumsamtai ashí túrajnia nuja̱i̱ shintiarar enentáimpratniuitji.

¹² Tuke káshitiat tsawa̱a̱temprai. Ii Uuntri̱ Kristu jú̱ tunáa nuṉkanam tátin ishichik ajasái. Tuma asamtai ii túrutairi̱ kiritniua núnisaṉ yajauch túrutai̱ ana nuka túrutsuk tsáapninium péṉker wekasatin kakaram ajastai.

¹³ Túratniua nuja̱i̱ métek wekasatai. Tsawái̱ wekaakur kiritniunam ú̱mkar tunáa túrutai̱ túrashtai. Nampetsuk, yajauch warartsuk, tsanirmatsuk, jianaitsuk tura kajernaitsuk aya péṉker túratai.

¹⁴ Ii Uuntri̱ Jesukrístu túramia núnisrik túratai. Tura ii aya̱shí̱ wakeramu umikiat tusar tsaṉkatkashtiniaitji.