Rum. 11 - Yus Papí: Shuarja̱i̱ Yus Yamaram Chicham Najanamu

Ashí aents Yusa waitnenkartutariji̱a̱i̱ uwempramnia

¹ Tura Israer shuar Yusan uminiachkui ¿Yus nin ajapa iniaisashit? Péṉkea. Warí, wisha Israer shuarchakaitiaj. Wi Aprajámsha tura Piṉjiamín wea akiiniachukaitiaj.

² Yámankamtaikniumia̱ Yus Israer shuaran ni shuar ártí tusa achikiu asa yamaikia iniaisashtatui. Ti yaunchu Yúsnan etserin Irías Israer shuaran pachis Yusan áujtak

³ “Uuntru, Áminiun etserniuncha mash máwarai. Túruiniak taṉku awa̱sar Yus sútai̱ncha mash sá̱a̱kiarai. Tura wiki juakjai. Tura winiasha ‘mantuatai’ turutainiawai” 1 Akup. 19:10,14 tímiayi.

⁴ Tura Yus aya̱k “Siati mir áishmaṉkan Israer shuarnumia̱ apujtumsaruitjiai. Nu shuar ántar yus Páaran tikishmátrachu áiniawai” 1 Akup. 19:18 timiai Yus.

⁵ Núnisaṉ yamaisha Yus ti waitnentainia asa ashí Israer shuarnumia̱ ni shuari̱n achikiuiti.

⁶ Yus ni enentái̱ji̱a̱i̱ṉ waitnentak túraiti. Nú shuar péṉker tura asamtai waitnentatsui. Yus aya péṉkernak waitnentakka ni waitneṉkratairi̱ áchainti.

⁷ Ayu. Nuikia ashí Israer shuar péṉkeran e̱a̱karu ai̱ṉ aya Yus achikmia nú shuar wáinkiarmiayi. Antsu ni achikchamuka nuna naṉkaamas nekaachmin ajasár kusurua núnin awajnásarmiayi.

⁸ Yus Chichamsha núnisaṉ tawai “Yus enentáimchatai enentáin súsarmiayi. Wáinmashtai ji̱ncha tura ántushtai kuíshniasha súsarmiayi. Yamaisha núniskete.” Isa. 29:10

⁹ Tawitcha yaunchu aak tímiayi “Tuke tunáa túrin ásar namperan najanainiaksha achintkiar ti asutniáwarti.

¹⁰ Ni enentái̱n kusurarti tura wainmakcharti. Itiurchat ana nusha kijin júkitniua áintsaṉ tuke áentskata.” YKan. 69:22-23

¹¹ Wátsek, Israer shuar kayá tukumkar ¿tuke iniaararuk ainia? Atsá. Antsu Israer shuar umirkachmaja̱i̱ Israer shuarcha yamaikia uwempratin jeainiawai. Túramu asa Israer shuarsha nuja̱i̱ métek uwempratniun wakerukartatui.

¹² Israer shuar umirkachmaja̱i̱ ashí shuar, Israercha ainia nusha, uwempramnia ajasármiayi. Nuna naṉkaamas Israer shuar atak Yusan enentáimtuiniak uwemprarmatai nuja̱i̱ ashí shuar tí peṉker ajasártatui.

¹³ Israer shuarchatirmincha atumín uwempratin chichaman etserkatniun Yus akuptúku asamtai nu takatan ti takaajai.

¹⁴ Nuna túrakun átum uwemprarmena núnisaṉ nisha, wí shuar ainia nu, nuna iisar uwemprarat tusan wakerajai.

¹⁵ Kame Israer shuaran iniaisámuja̱i̱ ashí shuar Yusja̱i̱ shiir nawamnaikiarmataiṉkia nuikia atak nin achikmája̱i̱ jakamunmaya̱ nantaktinia áintsaṉ ti shiir átatui.

¹⁶ Emka apatuk ana nu Yus súakur yumiṉsamuitkiuṉka nuikia ashí apatkunam Yus yumiṉsamuiti. Núnisaṉ numí kaṉkapé̱ péṉkeraitkiuṉka numi takamtsuk péṉkeraiti.

¹⁷ Yuska chíkich chíkich Israer shuaran, numí kanawe̱n tsupik ajapniua áinis iniaisámiayi. Tura nuyá̱ atumín niisháa numinmaya̱ árumni̱ṉ nu numiniam anujtamkamarme. Nuja̱i̱ péṉker numiji̱a̱i̱ tsaniṉkrum nu kakarmaja̱i̱ iwiaakrume.

¹⁸ Tura kanawe̱ tsupikmaja̱i̱ naṉkamantu enentáimtumasaip. Warí, ame kakarmarmiji̱a̱i̱ numi wajatsui antsu ni kakarmari̱ji̱a̱i̱ iwiaakme.

¹⁹ “Túrasha wi anujnaktinian kanawe̱n tsupikchamka” tíchaintmeash.

²⁰ Nekasaiti, túmaitiat nisha Yusan enentáimtuiniachu ásar tsupinkiarmiayi. Amesha aya Yus nekas enentáimta asam anujnakuitme. Tuma asamtai naṉkamantu enentáimtumatsuk aya anearta.

²¹ Yus nekas kanawe̱ péṉkercha túrawarun tsupikkia páchitsuk amincha tsupirmakchamniakait.

²² Iistá, Yus atumji̱a̱i̱ ti tsáṉkaiti tura Israer shuar umichua nuna ti wari asutiáiti. Tura péṉker wáinmamkata. Yus tuke nekas enentáimtachkurminkia atumniasha páchitsuk tsupirmaktatrume.

²³ Núnisaṉ Israer shuar ataksha Yusan enentáimtuiniakui páchitsuk ataksha anujkachminkiait. Nekas túrattawai.

²⁴ Túram Israer shuarcha asam niisháa numinmaya̱ tsupikiar peṉké numiniam anujnakuitrume. Nuna tura asa nekas ni kanawe̱ tsupikia ajapamun páchitsuk atak anujkamniaiti.

Israer shuarsha uwempratin áiniawai

²⁵ Yatsuru, naṉkamantu enentáimtumara̱i̱rum tusan yaunchu nekaachman ujajrume. Ju̱i̱ti, Israer shuarnumia̱ṉka Yusan nekas enentáimtustinian nakimiainia írunui. Túrasha ashí Israer shuarcha Yus shuar ajastin ainia nu umikiarmatai

²⁶ nuyá̱ Israer shuarsha ashí uwemprartatui. Tuma asamtai Yus Papí tawai “Seúnnumia̱ Uwemtikkiartin tátatui. Israernumia̱ tunaan asakátrattawai. Isa. 59:20

²⁷ Jú̱ Chichamnasha niji̱a̱i̱ najanattajai, ni tunaari̱n asakturtatjai.” Isa. 27:9

²⁸ Uwempratin chicham atumsha nekaatarum tusa Israer shuaran Yus ni nemasri̱ awajsaruiti. Tura yaunchu ni we̱a̱trí̱n achikiu asa nincha tuke anenawai.

²⁹ Kame Yus amáa nuna ataksha ata̱a̱tsui. Shuaran achiksha atak iniaiyatsui.

³⁰ Átumka yaunchu Yus umirchauyarme. Tura yamaikia Israer shuar umirainiachkui Yus atumín waitnentramarme.

³¹ Núnisaṉ ni yamaikia Yusan umirainiatsui. Tura atumín waitnentrampramarum núnisaṉ nincha waitnentrattawai.

³² Nuja̱i̱ ashí métek Yus sumamtikiak métek waitnentrar uwemtikrattawai.

³³ Maa, Yus imiá shiirchakait. Tí nekachukait. Ni túramu peṉké nekaachminiaitji.

³⁴ “Uunt Yus enentáimmian ¿yaki neka? Tura ¿ya Nin unuiniaruit. Isa. 40:13

³⁵ Yaki Nin péṉkeran susa shiira nuja̱i̱ yapajniuit?” Juup 41:11 Tu áarmaiti.

³⁶ Ashí najanamu ainia nu Yus najanamu áiniak Niniu áiniawai. Tura Nin shiir awajsatin najanawarma áiniawai. Yus tuke iniaitsuk shiir awajnásti. Núnisaṉ atí.