Ruk. 23 - Yus Papí: Shuarja̱i̱ Yus Yamaram Chicham Najanamu

Piratuí̱ Jesus jukimiu

¹ Nuyá̱ ashí Uunt iruntrarmia nu wajatkiar Rúmanmaya̱ akupin Piratuí̱ Jesusan júkiarmiayi.

² Nui̱ jeawar Piratun chicharainiak “Ju̱ áishmaṉ ii shuaran awajimtikiar enentáimtikiainia nu nekaamji. Rúmanmaya̱ úunt akupin Sésaran kuit akiktinian suritramaji. Tura nu arant Niṉki akupin Kristu tutaintjiai, tawai” tiármiayi.

³ Tutai Piratu Jesusan chicharuk “¿Ame Israer shuara akupniúri̱ṉkiaitiam?” tímiayi. Tutai Jesus chichaak “Ee, nuitjiai, ame támena núnisnak” tímiayi.

⁴ Nuyá̱ Yúsnan pujurniu úuntri̱ncha tura aents nui̱ iruntrarmia nunasha Piratu chicharainiak “Ju̱ áishmaṉ yajauchin túran peṉké wáinkiachuitjiai” tímiayi.

⁵ Túrasha nisha nú kakantar chicharainiak “Antsu nekas ashí Jutanam aentsun ni unuiniana nuja̱i̱ akajenawai. Kariréanmaya̱ naṉkaamas ímiaja̱i̱sha tayi” tímiayi.

⁶ Piratusha nuna antuk “Nú aishmaṉ ¿Kariréanmaya̱ṉkait?” tímiayi.

⁷ “Ee” tuíniakui Irutisan akuptúkarmiayi. Irutiska Kariréanmaya̱ aentsun akupniuyayi. Túmaitiat nu tsawantin Jerusaréṉnum ishichik tsawant pujusmiayi.

⁸ Irutiska Jesusan íistaj tusa ti wakerimiayi. Jesusa túramuri̱n áujmatman ti antukmiayi. Tuma asa “Wi iimiai̱ aents tujintiamun túrashtimpiash” tusa Jesusan wainiak warasmiayi.

⁹ Jesusan tí nukap aniasmiayi túramsha peṉké áimkiachmiayi.

¹⁰ Nui̱sha Yúsnan pujurniu úuntri̱sha tura Israer shuara jintinniuri̱sha yajauchiti tusar charaatum awajiármiayi.

¹¹ Tura Irutissha ni suntari̱ji̱a̱i̱ Jesusan yajauch enentáimtuiniak Nin wishikiainiak tí peṉker pushin akupniu entsatái̱ri̱ya ániun áentsrarmiayi. Nuya̱sha Irutis ataksha Piratuíi̱n akupkámiayi.

¹² Túram nu tsawant Piratu Irutisja̱i̱ nawamnaikiarmiayi. Kame yáunchuka nemasnaikia ármiayi.

Jesusan “mantamnati” tiarma

¹³ Nuyá̱ Yúsnan pujurniu úuntri̱n aentsu úuntri̱ji̱a̱i̱ tura peṉké aentsja̱i̱ Piratu ikiaanak tímiayi

¹⁴ “Ju̱ áishmaṉ aentsu awajimtikiui tusarum itiartintrume. Túrasha átum íimprumni̱ṉ anintrúsan yajauch átum tárumna nuna peṉké nekarachjai.

¹⁵ Irutissha núnisaṉ yajauchin nekaachai. Warí, ju̱i̱ awaiṉkichmaka. Nuikia páantchakait jú̱ aishmaṉ jakamnia tunaanka túrichuiti” tímiayi.

^16-17 Túraitiat tuke túrutai̱ asamtai námper jeakui sepunmaya̱ chikichík áishmaṉkan Piratu aṉkant akupkatin ámiayi. Tuma asamtai ni chichaak “ju̱na asutián awematjai” tímiayi.

¹⁸ Tura aentssha iruntrar ti untsumainiak “Atsá, ju̱cha. Ju̱ nakitiaji. Antsu Parapás akupkata” tiármiayi.

¹⁹ Nu Parapássha akupniun nakitiak mesetan najana asa tura maṉkartin asa sepunam eṉkeamuyayi.

²⁰ Piratuka Jesusan akupkáttsa wakerak ataksha aentsun áujsarmiayi.

²¹ Túrasha nú arant untsumainiak “Atsá. Krúsnum mantamnati” tiármiayi.

²² Tura ataksha Piratu chicharainiak “¿Urukamtai. Warí tunaan túrait? Jakamnia tunaan túrachiash tusan aniasan peṉké nekarachjai. Asutián akupkátjai” tímiayi.

²³ Tura nisha kakaram untsumainiak “Jesus mantamnati” tiármiayi. Kame aentssha tura Yúsnan pujurniu úuntri̱sha tí untsumainia ásarmatai ni wakeramuri̱ tsaṉkatnakarmiayi.

²⁴ Ni wakeriarmia nuna Piratu “túrattajai” tímiayi.

²⁵ Tuma asa Parapásan mesetan najanin tura maṉkartin amia nuna akupkámiayi. Tura Jesusnaka ni wakeramun túrawarti tusa íktusarmiayi.

Jesusan krúsnum ajintrurma

²⁶ Jesusan jukitiatsa pujuiniai̱ Serininmaya̱ Semuṉ ni pépruri̱ya̱ Jerusaréṉnum yama jeamiayi. Nin achikiar Jesusa krusri̱ ayantkar “ni úkuri̱ wetá” tiármiayi.

²⁷ Untsurí aents Jesusan nemariarmiayi. Tura untsurí nuwa̱sha tí kuntuts enentáimiainiak útkiar tura waa waa ajakiar wéarmiayi.

²⁸ Túmainiakui Jesus nin iis “Jerusaréṉnumia̱ nuwa̱tiram Winia enentáimtursarum útirap. Antsu atumniak tura atumí uchirí̱ enentáimtusrum úttiarum.

²⁹ Warí, ti itiurchat tsawant jeariártatui. Tuma asamtai ‘Uchirtichu ainia nu ajaprukchana nu tura amuntsachu ainia nu chíkich aentsja̱i̱ naṉkaamas péṉker pujuiniawai’ tiártatui.

³⁰ Nu tsawantai̱ aents chicharainiak ‘Naint iin nekentmak yuturmártai’ Isa. 2:19; Use. 10:8; Apu. 6:16; 9:6 tiártatui.

³¹ Warí, numi sameka áinis yajauch aya náṉkamna ai̱ṉsha ju̱ itiurchat átsuk. Tura numi kukarua áinkiamtai itiurak nú yajauch túrunachatⁱ” tímiayi Jesus.

³² Tura Jesusja̱i̱ krúsnum maatai tusar jímiar yajauch áishmaṉkan júkiarmiayi.

³³ Karawír naint tutainiam jeawar Jesusan krúsnum ajintrurarmiayi. Tura Jesusa untsuurí̱ni̱ chikichík yajauch áishmaṉkan tura ni menaari̱ni̱ chíkich yajauch áishmaṉkan núnisaṉ krúsnum ajintrurarmiayi.

³⁴ Tura Jesus krúsnum ajintraku pujuram chichaak “Apawá, tsaṉkurarta. Ni áitkiainia nuna nékainiatsui” tímiayi. Tura suntar pujuarmiania nu, yaki Jesusa pushiri̱ jukit tusar nakurúsarmiayi.

³⁵ Péprunmaya̱ aents ii wajatiármiayi. Tura uunt armia nusha Nin wishikiainiak “Chikichnaka uwemtikniuiti. Wats, yamái nekas Yusa anaikiamuri̱ Kristu tutainkiuṉka imia Niṉki uwemprati” tiármiayi.

³⁶ Suntarsha Nin wishikrarmiayi. Tariar churuinian aartai tusar awajiármiayi.

³⁷ Tura chicharainiak “Amesha nekas Israer shuara úunt akupniuri̱nkiumka amek uwemprata” tiármiayi.

³⁸ Tura muuknumaani̱, Kriaku chichamja̱i̱, Rúmanmaya̱ apach chichamja̱i̱sha tura Israer chichamja̱i̱sha ju̱ áarar anujkamu ámiayi JU̱I̱TI ISRAER SHUARA UUNT AKUPIN.

³⁹ Chikichík yajauch áishmaṉ nui̱ ajintruamu amia nu kátsekeak chicharuk “Amesha nekas Yusa anaikiamuri̱ntkiumka amek uwemprata tura iincha uwemtikramprata” tímiayi.

⁴⁰ Tura chíkich ni tsaníakmari̱n kakantar chicharuk “¿Amesha Niji̱a̱i̱ métek asutniátasa pujayatam Yus ashamatsmek?

⁴¹ Iikia yajauch asar wáitsatniuitji, ii yajauch túramuri̱ akikmakur wáitiaji. Antsu ju̱ áishmaṉka yajauchin túrichuiti” tímiayi.

⁴² Nuyá̱ Jesusan chicharuk “Amesha akupin ajasam winiasha enentáimtursata” tímiayi.

⁴³ Tutai Jesus chicharuk “Nekasan tájame, jakar shiir pujutai̱nium yamái tsawant Wiji̱a̱i̱ pujustatme” tímiayi.

Jesus jakamuri̱

⁴⁴ Tutupin ai̱ ashí nuṉkanam ti kirit ajasmiayi. Tura menaintiú ura naṉkaamasu ai̱ṉ nantu nuṉkach ajassha tuke kirit ámiayi.

⁴⁵ Tsawái̱ nantusha mushatmarmiayi. Tura Jerusaréṉnum Yusa Uunt Je̱e̱ncha tarach ejamu aa jímiapetek ja̱a̱nakmiayi.

⁴⁶ Nuyá̱ Jesus untsumuk “Apawá, winia wakantrun Amiin ikiuajai” YKan. 31:5 tímiayi. Nuna tinia jakamiayi.

⁴⁷ Suntara uuntri̱ nu túrunamun wainiak Yusa náari̱n shiir awajeak “Ju̱sha imiá nekas péṉker áishmaṉkauyi” tímiayi.

⁴⁸ Tura untsurí aents pujuarmia nu, nu túrunamun wáinkiar tí kuntuts enentáimiainiak ni netsepé̱n paat awatiar waketkiarmiayi.

⁴⁹ Tura Jesusa amikrí̱sha tura nuwa̱ Kariréanmaya̱ Nin nemariarmia nusha íkiaṉ wajasar ii wajarmiayi.

Jesus iwiarsamu

⁵⁰ Naka enentáimin péṉker áishmaṉ ámiayi ni naari̱ Jusé. Arimatéa pepru Jutanam ana nuya̱uyayi. Israer shuara Uunt Iruntai̱ri̱n páchitkiauyayi.

⁵¹ Yus ju̱ nuṉkanam akupin ajasat tusa Jusé nákas pujumiayi. Tuma asa Uunt Iruntai̱niam Jesusan túrawarmia nuna nakitmiayi.

⁵² Tuma asamtai Piratuí̱ we Jesusa aya̱shi̱n seamiayi.

⁵³ Piratu “ayu” takui̱ Jesusa aya̱shi̱n krúsnumia̱ jusa tarachji̱a̱i̱ penuar kaya táurmanum iwiarsamiayi. Nu táurmanum chíkich iwiarsachmauyayi.

⁵⁴ Iwiaratin tsawantai̱ ayampratin tsawant tsawa̱statuk ajasmatai túrunamiayi.

⁵⁵ Tura Kariréanmaya̱ nuwa̱ Jesusan nemarkiar taarmia nusha íwiarmanum pataakar aya̱shí̱n itiur ikiusara nunasha wáinkiarmiayi.

⁵⁶ Iisar ikiuak ni je̱e̱n waketkiarmiayi. Tura Jesusa aya̱shi̱ meje̱e̱ni̱ṉ tusar kuṉkuinian iwiararmiayi. Tura ayampratin tsawantai̱ Israer shuar akupkámun umikiar ayamprarmiayi.