Ruk. 20 - Yus Papí: Shuarja̱i̱ Yus Yamaram Chicham Najanamu

Yusa kakarmari̱ji̱a̱i̱ Jesus takasma

¹ Yusa Uunt Je̱e̱n Jesus uwempratin chichaman unuiniak pujái̱ Yúsnan pujurniu úuntri̱sha, Israer shuara jintinniuri̱sha tura Israer shuara úuntri̱sha táarmiayi.

² Taar Jesusan chicharainiak “¿Yana chichame̱ja̱i̱ ju̱ túram? ¿Ya ju̱ túratniuncha akuptámkait?” tiármiayi.

³ Tutai Jesus chichaak “Wisha aniastajrum tusan wakerajrume.

⁴ ¿Ya Juáṉnasha imiakrattia tusa akupkámia? ¿Yusak, aentsuk? Turuttiarum” tímiayi.

⁵ Tútaisha nisha nuamtak warintiajik mái̱ tunai ajarmiayi. “‘Yus akupkaiti’ tákurni̱ṉkia ‘¿urukamtai enentáimtuscharum?’ turamtatji.

⁶ Túrasha ‘aents akupkaiti’ tákurnisha ashí aents kayaja̱i̱ tukurmar mantamattaji. Warí Juaṉ Yúsnan etserniuiti tuíniatsuk” tiármiayi.

⁷ Nuiṉkia Jesusan áiniak “Juaṉ imiakratinniasha yátsuk akupkámia iisha nékatsji” tiármiayi.

⁸ Tutai Jesus chicharainiak “Wisha núnisnak winia akuptúkua nuna tíchattajrume” tímiayi.

Péṉker takachu armia nu

⁹ Nuyá̱ Jesus ju̱ métektaku chichamja̱i̱ aentsun jintintiámiayi. “Áishmaṉ ni ajarí̱i̱n uwa aráa amuk shuaran takartusti tusa ikiukmiai. Tura niṉkia wau táchataj tusa jeachat wemai.

¹⁰ Tura júuktin tsawant jeamtai juukman akanák jurumkit tusa takarniúri̱n takáu shuari̱i̱n akuptúkmai. Tura takarniúri̱ncha katsumkar jú̱nik awaiṉkiarmai.

¹¹ Nuyá̱ nérentin chíkich takarniúri̱n akupkámai tura nunasha núnisaṉ katsekar awatiar sútsuk akupkarmai.

¹² Nuyá̱ ataksha chikichan akupkámai. Tura nunasha takáu shuar katsumkar akupkarmai.

¹³ Nuyá̱ ukunam ajá nérenniuri̱ ‘Itiurkatjak’ timiai. ‘Winia aneamu uchirun akupkáttajai. Nin wáinkiar shiir enentáimtuschartimpiash’ timiai.

¹⁴ Túrasha takáu shuar nuna wáinkiar nuamtak chichainiak ‘Ju̱ka ajá nérenniuri̱ ajastatui. Maatai. Nuikia aja iiniu átatui’ tiarmai.

¹⁵ Nuna tuíniak ajanmaya̱ ji̱i̱ki̱ máwarmai.” Nuyá̱ Jesus aniasmiayi “Wats ¿warí enentáimsarum, ajá nérenniuri̱ itiurkattawa?

¹⁶ Nisha taa nu takáu shuaran máwartatui. Tura núṉkanka chikichan susattawai” tímiayi. Nuna anturkar “Yus núnaka tsaṉkatkashti” tiármiayi.

¹⁷ Tura Jesus nin émamkes iisar chicharainiak “¿Nuikia Yus Papinium aarma nu warintiua? Ju̱ áarmaiti ‘Kayan péṉkernak je̱a̱ je̱a̱min yajauchiti tusar ajapawarmia nu ashí kayaja̱i̱ naṉkaamas péṉker apujsamuiti.’ YKan. 118:22

¹⁸ Nu kayan tukumainia nuka kupintrattawai. Tura nu kaya shuarnum iniaarka nu shuaran tsai̱ tsai̱ awajsattawai” tímiayi.

Pariséu Jesus achiktai tusar wakeriarma

¹⁹ Yúsnan pujurniu uuntri̱ tura Israer shuara jintinniuri̱sha “nu métektaku chichamja̱i̱ iin túramji” tu nekaawar nuikⁱ Jesusan achikiar emetatai tusar wakeriarmiayi. Tura untsurí shuar Jesusan wakeruiniakui ashamainiak túracharmiayi.

²⁰ Warí itiurkarik akupniúnam Jesus yajauchi tsanumprurtai tusar mamikmau shuaran péṉker shuara núnisaṉ Jesusai̱n akupkarmiayi. Ni chichame̱ja̱i̱ṉ uuntka akupkatniun jeá asamtai nin suruktai tusar núnaka túrawarmiayi.

²¹ Tu enentáimsar chichainiak “Uuntá, ame tuke nekas chicham chichaame, nu nékaji. Aents pátatek iyatsme antsu nekas Yusa jinti̱ jintintiame.

²² Wats turuttia, ¿Rúmanmaya̱ úunt akupin ii kuitri̱ akiktin péṉkerkait? ¿Akiktinkiait. Suritkiatniukait? Nu nekaatai tusar wakeraji” tiármiayi.

²³ Tura Jesuska ni yajauch enentáimsamuri̱n nekáa chicharainiak

²⁴ “Kuit itiatárum. ¿Yana yapí tura yana naari̱ ju̱i̱ áarmait?” Tutai ni tiármiayi “úunt akupniunu”

²⁵ tutai Jesus chichaak “Úunt akupniunu átinia nu úunt akupin susatarum. Tura Yusna átinia nu, Yus susatarum” tímiayi.

²⁶ Aents ántamunam ni chichakmari̱ji̱a̱i̱ achiktinian peṉké tujintkiarmiayi. Antsu aya iimprarmiayi tura tákamtak pujusármiayi.

Satuséusha Jesus achiktai tusar wakeriarma

²⁷ Jakamunmaya̱ peṉké nantakchatniuiti Satuséu tuinia nuna Jesusan aniastai tusar tariarmiayi.

²⁸ Anintrak tiármiayi “Uuntá, Muisais ju̱na áartampramiaji ‘Áishmaṉ ni nua̱rí̱ uchi takutsuk jakamtaiṉkia ni yachi̱ nu waje̱n nuatkati, yachi̱n yajutmatrattsa.’ Muis. 25:5 Tu áarmaiti tiármiayi.

²⁹ Wats, siati yachi armai tiármiayi. Iwia̱i̱ri̱ nuwa̱n nuatak yajutmatsuk jakamai.

³⁰ Ni yachi̱ waje̱n akintiak nuatak nisha yajutmatsuk jakamai.

³¹ Nuna yachi̱sha núnisaṉ nu waje̱n nuatkamai tura núnisaṉ ashí siati nuna patai̱ṉᵏⁱ nuatkarmai. Yajutmatsuk yajutmatsuk kaji̱nkiarmai.

³² Tura ukunam nuwa̱sha jakamai.

³³ Nantaktin tsawantai̱ nantakiarmatai ¿yana nua̱ri̱ṉ ati? Ashí siati nuatkacharmaka” tiármiayi.

³⁴ Tutai Jesus tímiayi “Ju̱ nuṉkanmaṉ nuatnaikiatin awai.

³⁵ Tura nantakiar atak iwiaaku ámin ainia nuka nuatnaikiachartatui.

³⁶ Warí, jákashtin áiniatsuk. Yusa suntarí̱ya áintsaṉ ajasártatui. Tura nantakiaru ásar Yusa uchirí̱ ajasártatui.

³⁷ Tura jákaru nantakiartin ainia nuna imia Muisais jintíamiayi. Warí, numichiniam ji wajái̱ keamunan Yus niji̱a̱i̱ chichaamun Yus Papinium Muisaiska áarmiayi. Nú aarmanum Uunt Yus Aprajáma, Isaka tura Jakupu Yúsri̱nti, Jiin. 3:6,15-16 tímiayi. Nú aishmaṉ yaunchu jákaru ai̱ṉ ‘ni Yúsri̱nti’ tímiayi. Nuna taku nantaktin awai tu jintíamiayi.

³⁸ Kame jaka meṉkakatniunam pujuinia nuna Yúsri̱nchuiti. Tuma asamtai jakáa Yúsri̱nti tíchamniaiti. Antsu iwiaaku ainia nuna Yúsri̱nti. Ashí Níniun iwiaarkainiawai” tímiayi.

³⁹ Nuna antukar Israer shuara jintinniuri̱ “péṉker tame, Uuntá” tiármiayi.

⁴⁰ Tura nuya̱ṉka inintrústinian arantúkarmiayi.

¿Kristu yana uchirímpiait?

⁴¹ Nuyá̱ Jesus chichaak “Yus anaikiamu Kristu tutaisha ¿itiura ‘Aya Tawit weaiti’ tárum?

⁴² Warí, Yus Kanta papinium Tawit niṉki ju̱na tátsuk ‘Uunt winia Úuntrun “Akupin pujutai̱nium Winia untsuurui̱ni̱ pujusta.

⁴³ Ame nemasrumin núpeteatsa̱i̱ṉ nui̱ pujusta” YKan. 110:1 tímiayi.’ Tú aarmaiti.

⁴⁴ Kame Tawitkia, Krístun chicharuk ‘Winia Úuntur’ tai̱sha, ¿itiurak Kristu tutai Tawitia pampaṉmári̱ átiṉᵏⁱ?” tímiayi Jesus.

Jintintin ainia nuyá̱ aneartarum

⁴⁵ Ashí aents Nin anturkataj tusa pujuiniai̱ ni unuiniamuri̱n Jesus chicharainiak

⁴⁶ “Israer shuaran jintintin ainia nuyá̱ aneartarum. Nisha nuntuarun entsarar wekasataitsar wakeruiniawai. Tura jintiá ti shiir áujtusarat tusar wakeruiniawai tura iruntai̱ je̱a̱nam peṉkeri̱ pujutai̱nium pujustinian wakeruiniawai. Tura nampernumsha uunt pujutai̱nium pujustaj tusa wakeruiniawai.

⁴⁷ Túrasha wajé̱ je̱e̱ncha atantainiawai. Túrawar aents nekaracharat tusar ti esaram chichamja̱i̱ Yusan áujainiawai. Nincha chíkichja̱i̱ naṉkaamas Yus asutiáwartatui” tímiayi.