Ruk. 2 - Yus Papí: Shuarja̱i̱ Yus Yamaram Chicham Najanamu

Jesusa akiiniamuri̱

¹ Wats Juaṉ akiiniamia nú uwitin úunt akupin Akustu ashí nuṉkanam aentsun nekapmararti tu chichakmiayi.

² Nu nekapmartinian yaunchu túrushtai̱n yamái túriarmiayi. Sírianam Siriniu akupin pujái̱ túrawarmiayi.

³ Ni naari̱ áartaj tusa ashí shuar ni nuṉke̱ni̱ṉ wétin ármiayi.

⁴ Tuma asamtai Jusé Kariréanam Nasarét péprunmaya̱ jiinkí̱ Jutanam Piriṉ péprunam wémiayi. Juseka Tawit weanam akiinia asa ni nekas nuṉke̱ṉka Piriṉkiauyayi.

⁵ Nu asamtai ni náari̱n áartaj tusa Jusé Mariji̱a̱i̱ wémiayi. Marisha Jusé núwe̱yayi. Tura tsaniṉcharuyayi. Túmaitiat Marisha ajamtiniuyayi.Mat. 1:18,25

⁶ Tura nui̱ Piriṉnum pujuiniai̱ Marí takustintri̱ jeamiayi.

⁷ Nui̱ uchi áishmaṉkan iwia̱i̱n takusmiayi. Tura uchi penutaiji̱a̱i̱ penuar waaka yurumtainiam aepsamiayi. Írar kanutai pujustin aṉkant atsá asamtai túrawarmiayi.

Murikiun wáinniun Yusa suntari̱ Yus akatar akuptúkma

⁸ Tura Piriṉnum tíjiu̱ch murikiun wáinin kashi murikrí̱n wáiniuk pujuarmiayi.

⁹ Túmainiai̱ Yusa suntar murikiun wáinin matsatainian wantintiukmiayi. Tura Yusai̱ya̱ tsáapnin ni matsatainiamunam etsantramiayi. Túrunamtai murikiun wáinniuka ti ashamkarmiayi.

¹⁰ Túrasha Yusa suntari̱ chicharuk “Ashamprukairap. Ashí aentsnum ti warastin atí tusan tí peṉker chichaman itiarjiarme.

¹¹ Ju̱i̱ti. Yamái tsawantai̱ Tawitia pépruri̱n Piriṉnum yaunchu Yus Uunt anaikiamu KRISTU tutai, Uwemtikkiartin akiintiurmarme. Nu Uchisha ashí aentsun akupniuiti.

¹² Tura ju̱ja̱i̱ nekaattarme, uchi penutaiji̱a̱i̱ penuarma waaka yurumtainiam tepá wainkiattarme. Nu wainkiarum nekas ju̱i̱ti, tu nekaattarme” tímiayi.

¹³ Nu chichamaik Yusa suntari̱ ti untsurí nayaimpinmaya̱ káunkarmiayi. Túrawar Yusa náari̱n shiir awajainiak

¹⁴ “Nayaimpinmasha Yus naṉkamantuiti tu enentáimtusarti. Tura ju̱ nuṉkanmasha Yusja̱i̱ nawamnaikiaru ainia nusha aṉkant pujusárti.” Tu tiármiayi.

¹⁵ Tura Yusa suntari̱ nayaimpiniam waketkiarmatai murikiun wáinin chichainiak “Wats Piriṉnum wárik wetái. Nu túrunamu Yus túramajnia nu iyumi” tiármiayi.

¹⁶ Nuna tiar wárik wéarmiayi. Tura Marincha Jusencha wáinkiarmiayi. Tura uchincha waaka yurumtainiam tepan wáinkiarmiayi.

¹⁷ Wéar nuna wáinkiar Yusa suntari̱ uchi túrunamuri̱n timia nuna etserkarmiayi.

¹⁸ Tura murikiun wáinin tiarmia nuna anturkaruka ti enentáimtusarmiayi.

¹⁹ Túrasha Marikia ashí túrunamia nuna ni enentái̱ji̱a̱i̱ṉ enentáimtu pujumiayi.

²⁰ Tura murikiun wáinniuka antukarmia nuna enentáimtusar tura íisarmia nunasha enentáimtusar “Yusa suntari̱ ujatmákmajnia tímiatrusaṉ túrunayi” tiármiayi. Tuma ásar Yusa náari̱n shiir awajsar kantampruáwar waketkiarmiayi.

Uchi Jesus Yusa Uunt Je̱e̱n itiamu

²¹ Tura uchi akiiniamu uchu tsawant jeamtai ni túrutairi̱n túrin ásarmatai tsupirnakmiayi. Túrawar Marí ajapratsa̱i̱ṉ Yusa suntari̱ timia nútiksaṉ “Jesus” anaikiarmiayi.

²² Tura Muisais akiiniatniunam akupkámia núnisaṉ tsawantri̱ jeamtai Yusa Uunt Je̱e̱n Jerusaréṉnum uchin Yus íktustai tusar júkiarmiayi.

²³ Kame Yus Papinium ju̱ aarma awai. “Ashí uchi iwia̱i̱ri̱ áishmaṉ akiinkiuṉka Yusna átatui.” Jiin. 13:2,12,15

²⁴ Tuma asamtai Marí Yusa Uunt Je̱e̱n wá̱i̱tsuk pujamu waya̱tniuri̱ jeamtai uchin Yus iistí tusa Yusa Uunt Je̱e̱n Jerusaréṉnum pujana nui̱ itiarmiayi. Tura yampitsan jímiaran súsarmiayi. Muisais akupkámun umiiniak nuna túrawarmiayi.Riw. 12:2-8

²⁵ Nu tumai̱ Semiun náartin áishmaṉ Jerusaréṉnum pujumiayi. Simiuncha Yusa Wakaní̱ pujurma asa péṉker áishmaṉkauyayi. Yusan nekas enentáimtiniuyayi. Yusa anaikiamuri̱ji̱a̱i̱ Israer shuar aṉkant ajastin jeatí tusa jintia íimpriniuyayi.

²⁶ Kame Tunaarincha Wakan tu jintintiámu asa nu áishmaṉ Uunt Yusa KRÍSTURI̱ tutain wáintsuk jákashtinian nekamamiayi.

²⁷ Simiuncha Yusa Wakaní̱ wetá tutai Yusa Uunt Je̱e̱n wémiayi. Tura nú tsawantai̱ Muisais timia núnisaṉ umirkatai tusar Marisha Jusesha uchin Jesusan Yusa Uunt Je̱e̱n itiariármiayi.

²⁸ Itiariarmatai Simiun Uchin jusa miniakas Yusan áujuk

²⁹ “Yamaikia, Uuntá, turutmiamna nu ímiatrusmek umikiu asam ame takartámin áujmamas shiir waketkit akupkata.

^30-31 Ju̱ Uchi ashí aents uwemtikrarta tusam susamna nuna yamái imia winia jí̱ruja̱i̱ wainkiajai.

³² Israer shuarcha ainia nu tsáapninium wekasarat tusa akuptúkmaiti ju̱ Uchi. Isa. 9:2; 42:6; 49:6 Tura Israer shuar Áminiuram ájinia nuna ashí aents shiir enentáimtikrarti tusam ju̱ Uchi akuptúkmaitji. Nuna wainkian shiir enentáimsan jákatniuitjiai” tímiayi.

³³ Tura Simiun Uchiniun tu chicharkui Jusesha Jesusa nukurí̱sha ti enentáimprarmiayi.

³⁴ Semiuncha chichaak “Yus shiir enentáimturmasarti” ti Marin chicharuk “Nekaata. Ju̱ Uchin Israer shuartisha untsurí nakitrar iniarartatji. Tura chíkich Israer shuartikia ju̱ Uchin shiir enentáimtusar ti wararsartatji. Tura Uchiram Yusa kakarmari̱n ti paant iniakmastatui. Tuma ai̱ṉ untsurí Aun yajauch chichariartatui.

³⁵ Nuja̱i̱ shuar ni enentái̱n warinia enentáimia nu, paant átatui. Maaj, ashí nu túmakui̱ ijiumua núnismek ame enentáimin ti wáitsattame, Mariya” tímiayi Simiun.

³⁶ Nuwa̱sha Ana náartin nui̱ Yusa Uunt Je̱e̱n pujumiayi. Nisha Yúsnan etserniuyayi. Ni aparí̱nkia Panuiruyayi tura Aser shuarauyayi nu nuwa̱. Nisha tí uuntchiyayi. Yama nuatnaikiamuja̱i̱ siati uwí ni áishri̱ji̱a̱i̱ tsaniṉ pujusármiayi.

³⁷ Tura waje̱ma uchaintikuátru uwí pujusmiayi. Núnisaṉ Yusa Uunt Je̱e̱ya̱ jíintsuk káshisha tsawai̱sha ijiarma tuke Yusan áujniuyayi.

³⁸ Simiun tuasua amikmatai Anasha taa, Uchin wainiak Yusan yumiṉsamiayi. Tura Jerusaréṉnum Yus uwemtikrampratai tusa nákarmia nuna áujkuṉka uchin áujmat wémiayi.

Nasarétnum waketkiarma

³⁹ Nuyá̱ Yus timia nuna ashí túrawar umikiar Kariréanam kame ni pujumia nú peprunam Nasarétnum Jusesha Marisha Uchisha waketkiarmiayi.

⁴⁰ Uchi Jesus tsakaki̱ kakaram ajakí̱ tura nú naṉkaamas nekaki̱ wémiayi. Tura Yus Nin ti shiir awajsámiayi.

Jesus Yusa Uunt Je̱e̱n túrunamuri̱

⁴¹ Jusesha, Jesusa nukurí̱sha tuke uwitin Paskua námper jeakui Jerusaréṉnum wéu ármiayi.

⁴² Ni túrutairi̱ túruiniak Jerusaréṉnum weak Jesusan tuse uwí jeamtai júkiarmiayi.

⁴³ Námper amukámtai ni nukurí̱sha Jusesha nékachmanum Jesuska Jerusaréṉnum juákmiayi.

⁴⁴ Marisha Jusesha “wí shuarja̱i̱ winiawai” tusa núnaka e̱a̱tsuk chikichík tsawant wekasarmiayi. Nuyá̱ wáinkiataj tukamá ni shuari̱i̱n tura ni nékamunam e̱a̱karsha

⁴⁵ wáinkiacharmiayi. Nuiṉkia Jerusaréṉnum ataksha waketrukiarmiayi e̱a̱ktai tusar.

⁴⁶ Tura menaintiú tsawant e̱a̱kar Yusa Uunt Je̱e̱n Yus akupkámun jintinian anturak anintrú pujan wáinkiarmiayi.

⁴⁷ Tura nui̱ ashí Jesusan anturkarmiania nu nisha ti nékakui tura áimtanash ti péṉker aimkiui ti enentáimturarmiayi.

⁴⁸ Ni aparí̱sha nukurí̱sha tumá pujan wáinkiar ti enentáimprarmiayi. Tura ni nukurí̱ chichaak “Uchiru, ¿ausha urukamtai itiurchat enentáimtikrurmam? Ame apasha wisha urukayik tusar ti e̱a̱kjame” tímiayi.

⁴⁹ Tutai Jesus chichaak “¿Urukamtai e̱a̱trum? Winia Aparnan túratniuitjiana nuka nékatsrumek” tímiayi.

⁵⁰ Tura timia núnaka peṉké nekaacharmiayi.

⁵¹ Nuyá̱ Jesus niji̱a̱i̱ Nasarétnum waketkimiayi. Niṉkia tuke umiriarmiayi. Ashí nu túrunamun Marikia tuke enentáimtu pujumiayi.

⁵² Jesuska tsakaki̱ tura nekaki̱ wémiayi. Yussha tura aentssha Nin shiir enentáimtiarmiayi.