Ruk. 19 - Yus Papí: Shuarja̱i̱ Yus Yamaram Chicham Najanamu

Sakíu Jesusja̱i̱

¹ Nuyá̱ Jirikiúnam wayá̱ nui̱ wekaikiní̱ ajamiayi.

² Nui̱ kuítrintin áishmaṉ ni naari̱ Sakíu pujumiayi. Nu Sakíu kuítian juu úuntri̱yayi.

³ Aents ti kaunkamtai Sakíu ti sútarach asa Jesusan íistaj tukamá tujintkiamiayi.

⁴ Tuma asa Jesus nuke naṉkaamaktin asamtai emki̱ tsékeṉki̱ sikiumúru numi wajamunam wakamiayi íistaj tusa.

⁵ Jesus nui̱ naṉkaamak paṉkái̱ íimias chicharuk “Sakíu wárik akaikitia. Ame je̱e̱miin yamái kanartiniaitjiai” tímiayi.

⁶ Tutai Sakíusha wárik akaikí̱ shiir enentáimias Jesusan itiaamiayi.

⁷ Ashí aents nuna wáinkiar “Maaj, Jesus tunáa áishmaṉka je̱e̱n pujawai” tusa mai̱ tunaim ajarmiayi.

⁸ Nuyá̱ Sakíu wajaki̱ Jesusan chicharuk “Iistá Uuntá, wi takakjana ju̱na jímiapetek nakakán kuítrincha ainia nuna súsartatjai. Tura waitruan chikichan kasarkaitkiuncha menaintiú patatsan awaiṉkittiajai” tímiayi.

⁹ Tutai Jesus chichaak “Ju̱ áishmaṉ Aprajáma shuárintiat yamái nisha níniuja̱i̱ uwempra asa nekas Aprajáma shuari̱ ajasuíti.

¹⁰ Wisha Aents Ajasu asan meṉkakaru ainia nuna e̱a̱kan uwemtikrartaj tusan táwitjiai” tímiayi.

Kuítian nekapmá chichasma

¹¹ Nu aents Jesusan anturkarmia nu “Jerusaréṉnum jeawakrin Ni, Yus anaikiamu asa wárik akupin ajastatui” tu enentáimsarmiayi. Tuma asamtai wésar Jerusaréṉnum nuntumsarai̱ nuna enentáimsara̱i̱ṉ tusa Jesus ju̱na métektakun chichasmiayi.

¹² “Áishmaṉ peṉkeri̱ amai. Nú aishmaṉsha jeachat chíkich nuṉkanam akupin náamkan tátaj tusa wemai.

¹³ Tura wétsuk ni takarniúri̱n tias armia nuna untsukarmai. Tura aṉkant aṉkant kuit kuriji̱a̱i̱ naṉkaamas péṉker armia nuna suíniak ‘Ju̱ kuitji̱a̱i̱ wi táatsa̱i̱ṉ takakmá ajatarum’ timiai.

¹⁴ Tura ni nuṉke̱ni̱a̱ shuarka nakitiarmai. Túmainiak ‘nú aishmaṉ ii uuntri̱ ajasá̱i̱ṉ tusar nakitiaji’ nu titiá tusar áishmaṉkan akatrar akuptúkarmai.

¹⁵ Tuma ai̱ṉ akupin ajas ni nuṉke̱n waketki̱ tamai. Taa winia kuítruja̱i̱ warí túrarum titiaj tusa ni takarniúri̱n kuítian súsarmia nuna untsukarmai.

¹⁶ Ni takarniúri̱ emka chikichik taa ‘Ame kuítrumja̱i̱ takakmasan tias patasan achikmajai’ timiai.

¹⁷ Tutai uunt chichaak ‘Péṉker túrame. Ishichik susamjamna núja̱i̱ṉᵏⁱ wi tímiajna tímiatrusmek túrame. Tuma asakmin tias péprun akupin awajsattajme’ timiai.

¹⁸ Chíkich tarí ‘Iistá Uuntá, ame kuítrumja̱i̱ takakmasan seṉku patasan achikjiai’ timiai.

¹⁹ Nunasha chicharuk ‘Amincha seṉku péprun akupin awajsattajme’ timiai.

²⁰ Nuyá̱ chíkich tarí ‘Uuntá, ame kuítrumin paniiji̱a̱i̱ ijian ikiusmajai.

²¹ Amesha kakaram chicháu asakmin ikiuschiatam achin asakmin tura arakmachiatam juu asakmin ashamkamjame’ timiai.

²² Tutai uunt timiai ‘Maaj, amesha ti yajauchitme. Ame támena nuke makurmawai. Wi kakaram chicháu ai̱sha ikiuschiatan achin ai̱sha tura araknasha arakmachiatan juu ai̱sha

²³ nuiṉkia ¿urukamtia kuit ikiutai̱niam ikiuschamam? Nuiṉkia wi atak winiakun patasan achikia̱a̱jna’ timiai.

²⁴ Tura nui̱ wajarmia nuna chicharuk ‘Kuit takakma juruktiarum túrarum tiásan takakna nú shuar susatarum’ timiai.

²⁵ Tura nisha chichainiak ‘Túrasha Uuntá, tiásan takakja’ tiarmai.

²⁶ Tutai uunt chichaak ‘Takakna nuja̱i̱ takaakuiṉkia patatnástatui tájarme. Tura takakna nuja̱i̱ takaachkuiṉkia ishichik takakkuisha jurunkíttiawai.

²⁷ Tura winia nemasur uunt ajasá̱i̱ṉ tusar nakitrurarmania nu itiatárum. Tura wisha íimiai̱ṉ mátarum’ timiai” tímiayi Jesus.

Jerusaréṉnum Jesus waya̱mu

²⁸ Nuna tuasua amik Jesus Jerusaréṉnumaani̱ wémiayi.

²⁹ Petpajái pepru tura Petania péprusha Uriwiu nainnium tíjiu̱chiyi. Nui̱ jeastatuk ajatémas ni unuiniamuri̱n jímiaran chicharuk

³⁰ “Tíjiu̱ch péprunam wetarum. Túrarum nui̱ umpuruch ekemtukchamu jiṉkiamu wajá wainkiattarme. Nu atíarum itiatárum.

³¹ Tura ‘¿urukamtai atíarum?’ turamainiakuisha ‘ii uuntri̱ atsumawai’ titiarum” tímiayi.

³² Tutai unuiniamuri̱ wéar Jesus timia ímiatrusaṉ wáinkiarmiayi.

³³ Tura umpuruchin atíakui nérentin chichainiak “¿Urukamtai umpuruchsha atíarum?”

³⁴ Tutai unuiniamusha “Ii uuntri̱ atsumawai” tiármiayi.

³⁵ Tura umpuruchin Jesusan itiariármiayi. Túrawar ni pushiri̱n umpuruchiniam awantkar Jesusan ekenkarmiayi.

³⁶ Tura Jesus wétinniumaani̱ ni pushiri̱n ayapá̱rar jintiá áintrarmiayi.

³⁷ Tura Uriwiu naint awaṉkénamunam tíjiu̱ch ajasármatai untsurí aents Jesusan nemariarmia nu warainiak kakantar untsumainiak Ame najankamuram íijata núurmincha untsurí túran wáinkiaru ásar Yusan shiir awajsarmiayi.

³⁸ “Yusa náari̱i̱n winiana ju̱ ii uunt Akupniuiti. Nincha Yus shiir awajsati. YKan. 118:26 Nayaimpiniam pujuinia nu shiir enentáimsar Yusa náari̱n uunt awajsarti” tiármiayi.

³⁹ Tura Pariséu aents nui̱ páchitra pujuarmia nu Jesusan chicharainiak “Uuntá, nemartamainia nu ‘takamátsata’ tiartá” tiármiayi.

⁴⁰ Tutai Jesus chichaak “Nuiṉkia ju̱ takamátsarmataiṉkia kayasha untsumkarainti. Nuna paant tájarme” tímiayi.

⁴¹ Jerusaréṉnum tíjiu̱ch ajatémas péprun wainiak úutuk jú̱nis chichaak

⁴² “Jerusaréṉnumia̱ shuartiram, ju̱ tsawantinkesha shiir pujustintrum nekaarmeka maak. Túrasha yamaikia nekaatin naṉkaamasai.

⁴³ Kame ti itiurchat tsawant jeartámtatrume. Atumí nemasri̱ nuṉkaja̱i̱ a̱a̱ tanishan tanishmarar téntatramkattarme. Mesetan najatramattarme tura aatusha ju̱ni̱sha mash árentmaktatrume.

⁴⁴ Túrutma nuṉká aju̱nmártatrume. Tura atumíin pujuinia nuna máwartatui. Tura ashí emesrarmatai ishichkisha kaya irumpramusha peṉké atsuttawai. Wi Yusa anaikiamuri̱n tarijrumna nu nekaachu asakrumin túrutmattarme” tímiayi.

Yusa Uunt Je̱e̱n wariṉkish suruktinian Jesus surimkiamu

⁴⁵ Nuyá̱ Jesus Yusa Uunt Je̱e̱n wayá̱ suruktasa pujuarmia nuna sumaktasa pujuarmia nunasha ji̱i̱ki̱ awemarmiayi.

⁴⁶ Túrak chichaak “Yus Papinium yaunchu aarma awai ‘Winia je̱a̱rka Yus áujsatin jé̱a̱iti’ Isa. 56:7 tu áarmaiti. Túrasha átumka kasá matsamtaiyaJrm. 7:11 nútikiarme” tímiayi.

⁴⁷ Tuke tsawantin Yusa Uunt Je̱e̱n Jesus uwempratin chichaman unuiniak pujái̱ Yúsnan pujurniu úuntri̱sha, Israer shuara jintinniuri̱sha tura pepru úuntri̱sha itiur mámniakit tusar ti enentáimsarmiayi.

⁴⁸ Túrasha ashí aents émamkes anturainiakui mátniun tujintkiarmiayi.