Ruk. 18 - Yus Papí: Shuarja̱i̱ Yus Yamaram Chicham Najanamu

Shuar yawe̱tsuk Yusan áujsatin

¹ Shuar yawe̱tsuk Yusan tuke áujsatniua nuna unuiniartaj tusa Jesus ju̱ métektaku chichaman tímiayi.

² “Chíkich péprunam shuaran súmamtikin amai. Nú aishmaṉ Yúsnasha ashamchauyi tura shuarnasha peṉké arantichuyi.

³ Tura nú péprunam waje̱ amai. Nisha sumamtikniun chicharuk ‘Winia nemasur nekasa nuja̱i̱ métek umimtikrutkata’ tusa tuke waketrú pujuyi.

⁴ Yámankamtaikkia nin anturkatniun nakitmiai. Tura ukunam enentáimias ‘Wisha Yusan ashamachiatnak shuarnasha peṉké arantichuitiatnak

⁵ ju̱ waje̱n nekasa nuja̱i̱ métek túratjai. Warí iniaitiachuk waketú waketú ajak itit awajtak winia ipimtuki̱ṉ’ timiai” tímiayi.

⁶ Nuyá̱ Uunt Jesus chichaak “Sumamtikin yajauchitiat nuna timiai.

⁷ Tura Yus tí peṉker asa ni achikman tsawai̱sha, káshisha untsuamka nú naṉkaamas anturkashtatuak. ¿Yáitsuk meṉkakatuak?

⁸ Atsá, wárik yaiṉkiartatui, tájarme. Tura Wi Aents Ajasuitjiana ju̱ atak támatai ¿shuaran tuke Winia nekas enentáimturainia nuna wainkiatjash?” tímiayi Jesus.

Pariséusha, kuítian juusha Yusan áujsarma

⁹ “Péṉkeraitjiai” tu enentáimtumainiak chikichnaka yajauch enentáimtiarmia nuna Jesus nekapmá chichaak

¹⁰ “Jimiará áishmaṉ Yusa Uunt Je̱e̱n Yusan áujsatai tusar wéarmai. Chikichik Pariséuuyi tura chíkichkia kuítian juuyi.

¹¹ Pariséusha wajaki̱ Yusan áujeak jú̱nis timiai ‘Yusru, chíkich áishmaṉ kasasha tura yajauch ántsaṉ tsanirmau ainia nuja̱i̱ métekcha asan yumiṉsajme. Tura ju̱ kuítian juu wajana jú̱ja̱i̱sha métekchaitjiai.

¹² Warí Ame akupkámna nuna iniaṉkasan wisha chikichík semanatini̱ṉ jimiará tsawant ijiarmán áujeajme tura wi achíajna nuna tiásnumia̱ chikichkiniak Yúsnaiti tusan akankan súajai’ timiai.

¹³ Tura kuítian juusha árantaṉ wajas yakiini̱ paṉkái̱ íimsatniunkesha natsaamak tsuntsumá ni netsepé̱n awati ‘Yusá, ti tunaitjiai. Waitnentrurta’ timiai.

¹⁴ Wats tájarme, nu kuítian juu shuar Yus íimmianum ni enentái̱ péṉker awajnas ni je̱e̱n waketkimiai. Tura Pariséuka tamia núnisaṉ waketkimiai. Nekaatarum. Shuar naṉkamantu enentáimtumana nuka péejchach awajnástatui. Tura antsu péejchach enentáimtumana nu, naṉkamantu awajnástatui” tímiayi Jesus.

Uchisha Jesusna árminiaiti

¹⁵ Jesus uchin antiṉkiarat tusar itiariármiayi. Tura Jesusa unuiniamuri̱sha nuna wáinkiar suritkiarmiayi.

¹⁶ Tura Jesus nin untsukar chicharainiak “Uchi Winí̱ winitin tsaṉkamkatarum, surimkiairap. Enentáimsatarum. Uchichia áintsaṉ enentáimtumana nú shuarak Yus ni enentái̱n akupin ajasminiaiti.

¹⁷ Uchi ni úuntri̱n umira núnisaṉ shuar Yusan umireachkunka Yus ni enentái̱n akupin ajaschamniaiti” tímiayi Jesus.

Kuítrintin áishmaṉ Jesusja̱i̱ áujmatsamu

¹⁸ Shuara uuntri̱ Jesusan tarí áujsamiayi. “Uuntá, amesha péṉkeraitme. Tuma asam turuttia ¿warinia túrakna tuke iwiaaku átataj?” tímiayi.

¹⁹ Tutai Jesus chichaak “¿Urukamtia Winia, péṉkeraitme túrutam? Aents péṉkerka atsawai. Aya Yusak péṉkeraiti.

²⁰ Tura Yus akupkámu ana nu péṉker nékame. Tsanirmawairap, maṉkartuawairap, kasamkairap, tsanumprurairap, ame apasha, nukusha shiir enentáimtustarum. Nusha nékame” tímiayi.

²¹ Tutai áishmaṉ chichaak “Uuntá, úchichik mash umiki̱ tsakaruitjiai.”

²² Jesus nuna antuk “Chikichik tátramsai. Ame takakmena nu ashí surukam kuítrincha ainia nu súsarta. Nuiṉkia nayaimpiniam kuítrum takustatme. Túram winitiá nemartusminiam” tímiayi.

²³ Tura nuna antuk nu áishmaṉ ti kuítrintin asa tí kuntuts enentáimpramiayi.

²⁴ Tura kúntuts enentáimpramtai Jesus nuna nekáa “Kuítrintin ainia nu Yus akupeamunam pachinkiatin ti itiurchataiti.

²⁵ Kamiyu auja ji̱n waya̱tin itiurchataiti. Tura shuar kuítrintin Yus akupeamunam pachinkiatin nú naṉkaamas itiurchataiti” tímiayi.

²⁶ Tura nuna antukarmia nu tiármiayi “¿Nuiṉkia yaki uwempramniait?”

²⁷ Tutai Jesus chichaak “Aents tujintiainia nuna Yuska páchitsuk túramniaiti.”

²⁸ Nuyá̱ Pítiur Nin chicharuk “Uuntá, iikia Ámin nemarsataj tusar ii takakmaka ikiukji.”

^29-30 Tutai Jesus chichaak “Ti nekasan tájarme shuar Yus akupeana nuna túrataj tusa ni je̱e̱ncha núnisaṉ aparí̱ncha, nukurí̱ncha, yachi̱nkisha, nuwe̱nkesha, uchirí̱nkisha ikiuakka ju̱ nuṉkanmasha nu shuarka núkap wainkiattawai. Tura tuke iwiaaku pujustinniasha wainkiattawai” tímiayi.

Ataksha ni jákatniuri̱n Jesus ujakma

³¹ Jesus ni unuiniamuri̱ tuse armia nuna akaṉkí̱ chicharainiak “Jerusaréṉnum jeatémáji. Tura Aents Ajasu túrunatniun Yúsnan etserin yaunchu áatrarmia nu yamái uminkiattawai.

³² Úuntnum surukartatui. Túrawar wishikrar katsekar usukiáwartatui.

³³ Tura awatrar nuya̱ṉka máwartatui. Túramaitiatan menaintiú tsawantin nantaktiatui” tímiayi.

³⁴ Tura Ni tímiania nuna nekas túrunattawai, tícharmiayi. Wariniak taa tusar nekaacharmiayi.

Jirikiúnmaya̱ áishmaṉkan Jesus íimtikma

³⁵ Jesus Jirikiúnam nuntumsai̱ nui̱ áishmaṉ ji̱ kusurú kuítian surusarat tusa jintiá pujumiayi.

³⁶ Untsurí aents naṉkaamainian antuk “¿wariṉkit?” tímiayi.

³⁷ Tutai “Nasarétnumia̱ Jesus naṉkaamawai” tiármiayi.

³⁸ Kusurúsha nuna antuk untsumuk “Jesusá, Tawit weanmaya̱chukaitiam. Winiasha waitnentrurta” tímiayi.

³⁹ Émak wéarmia nu chicharainiak “takamáttsata” tutaisha nú arant untsumuk “¡Tawit shuará winiasha waitnentrurta!” ajamiayi.

⁴⁰ Nuiṉkia Jesus wajas “itiatárum” tímiayi. Tura ni támatai

⁴¹ “¿Warí itiurtukat tusamea wakerutam?” Tutai kusurú áimiuk “Uuntá, íimtiasan wakerajai” tímiayi.

⁴² Tutai Jesus chichaak “Íimtiá. Winia nekas enentáimtursa asam péṉker ajasume” tímiayi.

⁴³ Nu chichamaik kusurú íimmiayi. Tura Yusan shiir awajki̱ Jesusan nemarmiayi. Tura ashí aents nuna wáinkiarmia nuka Yusan ti shiir awajsarmiayi.