Ruk. 17 - Yus Papí: Shuarja̱i̱ Yus Yamaram Chicham Najanamu

Yajauch túrumtikiatin tí tsuumainti

¹ Jesus ni unuiniamuri̱n ju̱na chicharainiak “Aentsun yajauchin túrumtikiattana nu tuke átatui. Tura shuar ni ai̱n yajauchin wakerumtikna nu anearti.

² Ju̱ shuar uchich ainia nuna yajauchiniam túrumtikna nuna Yus imiá asutiáttawai. Tuma asamtai nuna túratsa̱i̱ṉ uunt kayaja̱i̱ kuntujnum jiṉkiá nayantsanam aju̱ṉkam maak ainti.

³ Túrasha atumek íimiastarum. Ame yátsum yajauchin túramtaiṉkia chicharkata tura ni ‘tsaṉkurturta’ túramkuiṉkia tsaṉkurata.

⁴ Chikichik tsawantini̱ṉ ámiji̱a̱i̱ yajauchin siati túramtaiṉkia tura yamaikia ené enentáimia ajasjai tsaṉkurturta turamtiaj tusa waké waketrutmaku̱a̱ siati ejemtainkia tsaṉkurata.”

Yus nekas enentáimtakur tujintkiashtatji

⁵ Jesusa unuiniamuri̱ Nin chicharuk “Yus enentáimtajnia nú naṉkaamas enentáimtustin yaintkratkata” tiármiayi.

⁶ Tutai Jesus chichaak “Mustasa jiṉkiái ti ishitiúpchich ana núnisaṉ ishichkisha Yus enentáimtaitkiurmeka sikiumúru numi wajana nu ‘Wajamurmi̱ya̱ṉka ukuiniakam nayantsanam wajasta’ tákurmin nú numi umirtamkainti.

Yaintri̱ asar tú takastai

⁷ Atumí takarniúri̱ arakmasua amik waakancha iis támatai ¿nú chichamaik amesha ‘Winitiá, yurumáitia’ tíintmek?

⁸ Atsá. Antsu ‘yurumak iwiarturata. Wi yurumátin tura umartincha surusminiam iwiarnarta. Nuyá̱ ame yurumáta.’ Nu tíchaintmek.

⁹ Ni túratin ana nunak túratsuk. Tuma asamtai yumiṉsashtatme.

¹⁰ Atumsha núnisrumek Yus túramna nu ashí umikiam ‘tí peṉker túraitjiai’ tíchatniuitme. Antsu ‘aya ii túratniuri̱ ana nuke tura asar iikia ántraitji’ títiniaitme” tímiayi Jesus.

Tias áishmaṉ kuchaprúkun Jesus tsuarma

¹¹ Jesus Jerusaréṉnum wesa Kariréa ikiukí̱ Samarianam naṉkaamakmiayi.

¹² Tura péprunam jeamtai tias áishmaṉ kuchap suṉkur achikiam tunamáraruka íkian wajasármiayi.

¹³ Tura untsumainiak “Uunt Jesusá, waitnenkarturta” tiármiayi.

¹⁴ Jesus nin wainiak “Yúsnan pujurin werirum iniakmamsatarum” tímiayi. Tura wésar péṉker ajasármiayi.

¹⁵ Nuyá̱ chikichik ni tsuámarman nekáa kakantar chichaki̱ Yusa náari̱n uunt awajki̱ waketki̱ Jesusan tarimiayi.

¹⁶ Yumiṉsataj tusa Jesusan tikishmátar piniakumar tepesmiayi. Nu áishmaṉka Samarianmaya̱uyayi.

¹⁷ Nuna wainiak Jesus chichaak “Tsuámaru tiáschakait. ¿Chíkich nuíwisha tui̱ pujuinia?

¹⁸ ¿Ju̱ yajaya̱ áishmaṉ níṉkik Yusa naari̱ uunt awajsataj tusa waketki̱ tai?” tímiayi.

¹⁹ Nuyá̱ áishmaṉkan chicharuk “Winia nekas enentáimtursa asam péṉker ajasume. Wajakím shiir wetá” Jesus tímiayi.

¿Yusa akupeamuri̱ urutáik ati?

²⁰ Pariséu aents Jesusan inintrak “¿Yusa akupeamuri̱ urutáik ati?” tutai Jesus chicharuk “Yusa akupeamuri̱ paant wáinkiachminiaiti. ‘Yamái naṉkamnayi’ tichamniaiti.

²¹ ‘Ju̱i̱ awai, nui̱sha awai’ tichamniaiti. Warí, Yusa akupeamuri̱nkia atumíin pujawai” tímiayi.

²² Nuyá̱ ni unuiniamuri̱n chicharuk “Tsawant jeattawai atumsha Winia Aents Ajasu tutain ‘aya chikichík tsawantkesha Ni wainkiarkia maak’ turuttiatrume. Túrasha tujintkiattarme.

²³ Aents Ajasu tutai ‘ju̱i̱ pujawai, nui̱sha pujawai’ tuíniakui werirap. Tana nu nemariirap.

²⁴ Wi, Aents Ajasuitjiana nu tátinian tsawantur jeamtai paant waitkiattarme. Peem péetuk ashí nayaimpin tsáapnin awajna núnisaṉ wi winiamu paant átatui.

²⁵ Tura nu túruntsa̱i̱ṉ yamái pujuinia nu Winia nakitruiniakui tí waitsatniuitjiai.

²⁶ Winia atak tátiniur jeamtai yaunchu Nuwái pujumia nú tsawantin túrunamia núnisaṉ túrunattawai.

²⁷ Yurumiarmiayi tura umiarmiayi, nuatiarmiayi tura ni nawantri̱n nuatmamtikiarmiayi. Tumá matsatainiai̱ Nuwái uunt kanunam eṉkempramtai ama̱a̱rak nu aentsnasha mash amuukarmiayi.

²⁸ Tura Sutumnumsha Rauta írutramuri̱sha núnisaraṉ Yusa asutkiari̱n enentáimtutsuk pujuarmiayi. Yurumáwarmiayi, umararmiayi, sumakarmiayi, surukarmiayi, ajancha ajamarmiayi, je̱a̱ncha je̱a̱mkarmiayi.

²⁹ Tura Raut Sutumanmaya̱ jiinkimtai asupri tutai kaya keek yútana áintsaṉ nayaimpinmaya̱ kakeetuk nu aentsun mash máwarmiayi.

³⁰ Núnisaṉ wi atak tátiniur jeamtai enentáimtsuk pujusártatui.

³¹ Nu tsawant jeamtai je̱a̱ yakiini̱ pujana nú shuar ni warirí̱n achiktaj tusa akaikí̱ je̱á̱ waya̱shti. Tura kampunniunam wekaana nú shuar ni je̱e̱n waketkishti.

³² Rauta nua̱rí̱ túrunamu enentáimpratarum.

³³ Aya ju̱ nuṉkanmaya̱ṉ enentáimias ‘iwiaaku átaj’ tana nu ni iwiaakmari̱n emeṉkáktatui. Tura ju̱ nuṉkanam ni iwiaakmari̱n emeṉkána nu nekas iwiaakma ana nuna wainkiattawai.

³⁴ Paant tájarme. Nú káshitin jimiará áishmaṉ nú peaknumaṉ kanúu tepeartatui. Chikichik junaktiatui, chíkichkia ikiunkittiawai.

³⁵ Jimiará nuwa̱ mái̱ metek nekée pujuartatui. Chikichik junaktiatui, chíkichkia ikiunkittiawai.

³⁶ Jimiará áishmaṉ kampunniunam wekainiartatui. Chikichik junaktiatui, chíkichkia ikiunkittiawai.” Tú timiayi.

³⁷ Nuna antukar “Uuntá ¿tui̱ túrunatta?” tiármiayi. Tutai ni chichaak “Jaka tepana nui̱ chuaṉ káutkartatui.”