Ruk. 14 - Yus Papí: Shuarja̱i̱ Yus Yamaram Chicham Najanamu

Áishmaṉ eak jaan Jesus tsuarma

¹ Ayampratin tsawantai̱ Pariséu uuntri̱ je̱e̱n Jesus yurumáttsa wémiayi. Tura chíkich Pariséu wariniak túrat tusar ii pujuarmiayi.

² Nui̱ áishmaṉ eak jaa Jesus pujamunam naka pujumiayi.

³ Jintinniuncha Pariséuncha Jesus aniasmiayi “¿Warí tárum? ¿Ayampratin tsawantai̱ jaa tsuárminkiait. Tsuárchamniakait?” tímiayi.

⁴ Tura nisha áimtsuk pujuarmiayi. Nuiṉkia jaan antiṉ tsuármiayi. Tura “shiir wetá” tímiayi.

⁵ Nuyá̱ Pariséun chicharuk “Atumí umpururi̱sha, waakari̱sha wa̱a̱ táurmanum akaikí̱ iniamtai ayampratin tsawant ai̱ṉ nú chichamaik júatsrumek” tímiayi.

⁶ Takui̱ áimkiatniun peṉké tujintkiarmiayi.

Nuatnaikiatin nampernum ipiaawarma

⁷ Ipiaamusha peṉkeri̱ pujutai̱nium pujustaitsar ti wakeruiniakui Jesus nuna wainiak ju̱na jintintrámiayi.

⁸ “Nuatnaikiatin nampernum peṉkeri̱ pujutai̱nium pujusaip. Nui̱ pujakminkia chíkich ámiji̱a̱i̱ naṉkaamas peṉkeri̱ táchatpiash.

⁹ Tura ipiatmania nu chichartamuk ‘Chíkich íktusta’ turamchatpiash. Nui̱ṉkia chíkich náṉkatkamu pujutai̱nium wéakum natsa̱a̱rtatme.

¹⁰ Antsu ipiatmakmin náṉkatkamu pujutai̱nium pujusta. Nuiṉkia ipiatmamnia nu chichartamuk ‘Amikru, ámeka ju̱i̱ peṉkeri̱ pujutai̱nium pujusta’ turamtatui. Nuja̱i̱ chíkich ipiaamu ainia nu ‘nekas peṉkerinti’ turamartatui.

¹¹ Iimiata, ‘peṉkerintjiai’ tu enentáimtuma nuka péejchach awajnástatui. Tura ímianchach enentáimtumana nuka waantu ajastiniaiti” tímiayi.

¹² Nuyá̱ Nin ipiaamua nuna chicharuk “Amesha yurumáití tusam untsuktajtsam wakerakmeka ame amikrumsha tura yatsumsha nuyá̱ ame shuarumsha írutramuram kuítrintin ainia nusha ipiaawaip. Ni ipiaamka ataksha íksaṉ ámin ipiatmashtatuak. Nuja̱i̱ akikma átatme.

¹³ Antsu yurumáití tusam untsuktajtsam wakerakmeka kuítrincha tura wekaicha, shutuapsha nuyá̱ kusurúsha ipiaawarta.

¹⁴ Nisha akirmáktinian tujintiainiawai. Péṉker shuar nantakiartatna nui̱ akinkiáttame. Nu tuma asamtai warastatme” tímiayi.

Uunt namperan Jesus nekapmá chichasma

¹⁵ Nu ekentsa yurumtainiam pujuarmia nuyá̱ chikichik Jesus chichaamun antuk Jesusan chicharuk “Yus akupeamunam pachiniak yurumkuṉka ti shiir ainti.”

¹⁶ Nuna takui̱ Jesus ju̱na jintiamiayi “Áishmaṉ namperan nájanuk untsurí shuaran taartí tusa akatar akupkámai.

¹⁷ Yurumátin jeamtai ‘Winitiárum, yurumátin jeayi’ tu tiartá tusa ni takarniúri̱n akupkámai.

¹⁸ Tura winichminiaitji tusar ashí ujakármai. Chíkich chichaak ‘Nuṉkan yamái sumarmakjai. Iyutaj tusa wéakun winishtatjai. Tsaṉkurturti’ timiai.

¹⁹ Tura chíkich chichaak ‘Wisha tias waakan sumarmakjai. Nekapsattsan wakerajai. Tuma asan winishtatjai. Tsaṉkurturti’ timiai.

²⁰ Tura chíkich chichaak ‘Yamái nuatnaikiajai. Tuma asan winishtatjai’ timiai.

²¹ Takarin waketki̱ ni úuntri̱n ashí nuna ujakmai. Nuna antuk nisha kajekmiayi. Tura ni takarniúri̱n timiai ‘Ju̱ péprunam péṉker jintianmasha tura uchich jintiachinmasha weme, kuítrincha tura wekaichasha, shutuapsha, kusurúsha itiaarta.’

²² Nuyá̱ ukunam ni takarniúri̱ taa chicharuk ‘Uuntá, ame turutmiamna nútiksanak túramjai túrasha tuke aṉkant awai’ timiai.

²³ Tutai ni uuntri̱ chichaak ‘Jintianam weme nuyá̱ chíkich jintiachiniam weme wáinmena nu ashí awayá̱warta. Winia je̱a̱rui̱ piákat tusan wakerajai.

²⁴ Emka ipiaawarmajnia nuka peṉké chikichkiksha wini̱ṉkia yurumáchartatui tájarme’” tímiayi.

Kristu nemarsatin yúpichuchichuiti

²⁵ Untsurí aents Jesusja̱i̱ irunki̱ wéarmiayi. Nisha nuna apajá̱s iis ju̱na tímiayi

²⁶ “Shuar ni aparí̱ncha, ni nukurí̱ncha, nua̱ri̱ncha uchirí̱ncha, yachi̱ncha, umai̱ncha Wiji̱a̱i̱ naṉkaamas enentáimtakka tura shiir pujustinian wakerak Winí̱ winitniun nakitiakka winia unuiniamur ajaschamniaiti.Mat. 10:34-39

²⁷ Ni wakeramuri̱n ajakeak ni krusri̱ yanakí̱ nemartatsna nu winia unuiniamur ajaschamniaiti.

²⁸ Je̱a̱ yakí̱ je̱a̱mtaj tusam wakerakmeka kuítian urutmak ajapawaintiaj tusam tura urutmaja̱i̱ṉᵏⁱ amukáintiaj tusam emka enentáimsashtatmek.

²⁹ Túrutsuk aya ukura iniaisam amuktin tujintkiakmiṉkia nuna wainiainia nu wishikramainiak ju̱na tiártatui

³⁰ ‘Iiskua. Nu shuar je̱a̱mtinian naṉkamamai. Túrasha amuktinian tujintkiamai.’

³¹ Tura úunt akupin chíkich akupniuja̱i̱ mesetan najanashtimpiash. Emka, nisha pujus tias mir suntarja̱i̱ painti mir suntar wininiana nuna nupetkaintjiash tusa enentáimsashtatuak.

³² Tujintiakka chíkich akupin jeachat pujanak nawamnaikiatai tusa akatar akupkashtatuak.

³³ Wats, ‘Kristu unuiniamuri̱ ajastinji̱a̱i̱ wi takakjana ju̱na warí winia itiurtawa’ tu enentáimsatniuitrume. Túrachkurmeka winia unuiniamur ajastin tujintiarme.

Wee michumárka yajauchiti

³⁴ Weeka jeaku péṉkeraiti. Tura míchuitkiuṉka ¿itiurak ataksha jeá jeat ati?

³⁵ Wee míchuitkiuṉka araatniunmasha yaya̱a̱tsui. Tura tsuatnum ikiusmasha ántraiti. Aya ajapatniukete. Kuishim ákuiṉkia antuktarum” tímiayi.