Ruk. 1 - Yus Papí: Shuarja̱i̱ Yus Yamaram Chicham Najanamu

¹ Nekas iiní̱ túramia nuna “ímiatrusnak áartatjai” untsurí aents tiármiayi.

² Yámankamtaikniumia̱ṉ íisarmia nú shuar tura Yus Chichaman etserkatniun yaiṉkiarmia nusha iin unuitiamprarmia nútiksaraṉ áartinian wakeriarmiayi.

³ Wisha núnisnak esettsaran enentáimsan yámankamtaikniumia̱ nuna nekaamjai. Tuma asan túrunamia nuna ímiatrusnak amincha áatratajtsan wakerimjiame, winia úuntur Tiúpiru.

⁴ Jintintrámawarma nú naṉkaamas nekaata tusan wakerakun áatjame.

Imiakratin Juaṉ akiiniatin ujakma

⁵ Jutanam úunt akupin Irutis akupkámia nú tsawantin Israer shuar Yúsnan pujurin ámiayi, ni naari̱ Sakarías. Nisha Aptías weauyayi. Ni nuwe̱sha Irisapít Araun weauyayi. Irisapítia úuntri̱sha Israer shuar Yúsnan pujurin ármiayi.

⁶ Yúsja̱i̱sha Sakaríassha Irisapítcha mái̱ metek péṉker ármiayi. Yus akupkámia nunasha umirin ármiayi. Tuma asamtai peṉkesha chíkich nin yajauch chicharkatin atsuarmiayi.

⁷ Yusja̱i̱ péṉker wekainiayat Irisapít kaa asa takuchuyayi. Túrasha mái̱ uuntach ármiayi.

^8-9 Israer shuar Yúsnan pujurin chíkich weanmaya̱ nuyá̱ chíkich weanam aṉkant aṉkant Yusa je̱e̱n takáu ármiayi. Chíkich tsawant Sakarías wea takastin amia nui̱ Sakaríaska kuṉkuinian ekemáktaj tusa init waya̱tniuyayi.

¹⁰ Init kuṉkuinian ekeemai̱ untsurí aents a̱a̱ni̱ matsamsar Yusan áujtak pujuarmiayi.

¹¹ Sakarías init pujái̱ kuṉkuin áestutai̱niam untsuurnumaani̱ aya aneachma Uunt Yusa suntari̱ wajamiayi.

¹² Nuna wajan wainiak Sakaríaska purushnarmiayi.

¹³ Túrasha nayaimpinmaya̱ suntar chicharuk “Sapijmiakaip Sakaríasa. Nekaata, ame seamna nuna Yus anturtamkayi. Tura Irisapít ame nuwem uchin takustatui. Ni akiiniamtai ‘Juaṉ’ anaikiata.

^14-15 Ame uchiram akiiniattana nuka Yúsja̱i̱sha naṉkamantu átatui. Tuma asamtai akiiniamtai amesha shiir enentáimsam warastatme. Tura chíkich aents untsurí warasartatui. Ame uchirmesha karía ainia nuna umarchattawai. Tura aetak akiinchanak Yusa Wakaní̱ pimiutkattawai.

¹⁶ Tura ni shuari̱n Israer shuar áiniana nuna ii Uuntri̱ Yusja̱i̱ ataksha nawamtikiartatui.

¹⁷ Úunt Yusai̱ya̱ akatrámu átatui. Yaunchu Yúsnan etserin Irías kakaram etserkamia núnisaṉ nisha etserkattawai. Nuja̱i̱ shuaran ni uchirí̱ji̱a̱i̱ nawamtikiartatui.Mks. 4:5-6 Tura umichu ainia nuna eseer enentáimtikrartatui. Ni Uuntri̱ taakui ni enentái̱ iwiaramu ártí tusa etserkattawai” tímiayi Yusa suntari̱.

¹⁸ Nuna takui̱ Sakarías Yusa suntari̱ chicharuk “¿Nunasha wariji̱a̱i̱ṉ paant nekaataj? Wisha nua̱rja̱i̱ mái̱ metek tí uuntchichukaitiaj” tímiayi.

¹⁹ Tutai Yusa suntari̱ chicharuk “Wikia Kapriaraitjiai, Yusa suntari̱ntjiai. Ni akattúrmatai chichastájam tusan tura nu shiir chichaman ujaktájam tusan tarijme.

²⁰ Túrasha wi tájamna nu ‘nekasaiti’ tu enentáimprachume. Tura asam uchiram akiintsa̱i̱ṉ muut ajastatme. Chichastin peṉké tujintkiattame. Tura wi tájana nu tsawant jeamtai túrunattawai” tímiayi.

²¹ Nuna tumai̱ Yusa je̱e̱n a̱a̱ni̱ pujusár Sakaríasan nákas pujuarmiayi. “¿Urukamtaik init we imiá meṉkaka?” tu enentáimprarmiayi.

²² Nuyá̱ Sakarías jiinkimtai áujsartaj tukamá tujintkiarmiayi. Sakaríaska muut ajasu asa aya úwijmiasaṉ chichamiayi. Túmakui̱ Sakarías init pujus Yusai̱ya̱n ímiaja̱i̱k wainkiamun nekaawarmiayi.

²³ Yusa je̱e̱n takastin tsawant amukámtai Sakaríaska ni je̱e̱n waketkimiayi.

²⁴ Nuyá̱ ukunam ni nua̱rí̱ Irisapít ajaprukmiayi. Tura seṉku nantu aya je̱a̱n pujusmiayi.

²⁵ Je̱á̱ pujus “Aents wishikiartin armia nuyá̱ winia natsantrun jurutkitiaj tusa uchi takustinian Yus tsaṉkatrukai” tu enentáimpramiayi Irisapít.

Jesus akiiniatniun Yusa suntari̱ étserma

²⁶ Nu seṉku nantu naṉkaamasmatai Yus ni suntari̱n Kapriaran Kariréanam Nasarét peprua nui̱ akupkámiayi.

²⁷ Nasarétnumia̱ nuwa̱n, naari̱ Marí, iyuti tusa akuptúkmiayi. Nú nuwa̱ka áishmaṉja̱i̱ tsaniṉchauyayi. Nisha Juseja̱i̱ nuatnaikiatsa anajmanair pujumiayi. Juseka uunt Tawit weauyayi.

²⁸ Wats Yusa suntari̱ Marí pujamunam wayá̱ chicharuk “Yus péṉker enentáimturma asamtai ámin winitjiame, Mariyá. Yuska ámin nemartamuk ashí nuwa̱ naṉkaamas péṉker awajtamui” tímiayi.

²⁹ Tura Marisha Yusa suntari̱n wainiak chichaamun nékatsuk “Urukamtaik tu chicháa” tu enentáimpramiayi.

³⁰ Nuyá̱ Yusa suntari̱ chicharuk “Mariyá, sapijmiakaip. Yus shiir enentáimturmawai.

³¹ Antukta. Amesha ajapruktatme. Túram Uchi takustatme.Isa. 7:14 Nusha ‘Jesus’ anaikiata.

^32-33 Nisha uunt átatui. Nincha ‘Uunt Naṉkamantu Yusa Uchirí̱’ tiártatui. Tura Uunt Yuska yaunchu Tawitian úunt akupniuri̱ awajsámia núnisaṉ ame Uchirmin áme shuarumin Israer tutain Uunt akupin awajsattawai. Ni akupeamuri̱sha Yus susamu asa peṉké amuukashtiniaiti” tímiayi.

³⁴ Yusa suntari̱ tutai Marí chichaak “Nusha winia áishur atsai̱sha ¿itiurak túrunataj?”

³⁵ Tutai Yusa suntari̱ Marin chichaak “Yusa Wakaní̱ tarutrámtatui. Tura yuraṉmia núnisaṉ Uunt Yusa kakarmari̱ ijirmattawai. Nu tuma asamtai Uchi akiiniattana nu Yusai̱ya̱ asamtai ‘Yusa Uchirí̱nti’ tiártatui.

³⁶ Tura Irisapít ame kaná kaimia nusha núnisaṉ weamtánam ajaprukai. Iis, ‘uchin takuchuiti’ tiarmia nu yamaikia sais nantu pujawai ajamtin.

³⁷ Yúsja̱i̱ṉkia itiurchatka peṉké atsawai” tímiayi.

³⁸ Tutai Marí chicharuk “Wikia Yus wakeramun túriniaitjiai. Ame támena nuna Yus wakerana nuna túrutati, tajai” tímiayi. Nuna tímiatai Yusa suntari̱ṉkia wémiayi.

Irisapítian Marí iyumu

^39-40 Nu tsawant Marí wárikmas muranam Jutanam ni kaná kain Irisapítian iyutaj tusa wémiayi. Sakaríasai̱ jeá ni je̱e̱n wayá̱ Irisapítian áujsamiayi.

⁴¹ Irisapít Marí áujeamun antukmatai uchi init muchitkiamiayi. Tumai̱ Irisapítian Yusa Wakaní̱ ni enentái̱n pimiutkamiayi.

⁴² Nuiṉkia kakantar Marin chicharuk “Yus amincha ti shiir awajtámsaiti. Tura Uchiram akiiniattana nusha Yus shiir awajsamuiti.

⁴³ ¿Kairu, ame winia Uuntru nukurí̱ ámini̱ṉ Yus winia ti waitnentra asa áujuta tusa ámin akuptámkachaik?

⁴⁴ Warí wisha ame áujtamna nuna ántakui init uchi waras muchitrutkayi.

⁴⁵ Amesha Yus túramia nu umikiu asam shiir pujame. Yus timia nu túrunattawai” tímiayi.

⁴⁶ Nuna tinia iniaisamtai Marí ju̱na chicharuk “Wikia tuke enentái̱rja̱i̱ ‘Yus timiá uuntaiti’ tajai.

⁴⁷ Tura Uunt Yuska winia Uwemtikruru asamtai ti waraajai.

^48-49 Wisha péejchach ai̱ṉ ni wakeramuri̱n umiktajtsan wakerakui winia enentáimturayi. Tuma asamtai ashí aents ‘Marincha Yus shiir awajsaiti’ tuke turutiartatui. Yuska imiá peṉker tura imiá kakaram ana nu winia tí uuntan túrutaiti. Tuma asamtai ashí aents ‘Marincha Yus shiir awajsaiti’ turutiartatui. Núnaka yamái naṉkamamunak tuke turutú ajartatui.

⁵⁰ Tura Nin umirkatniun wakerana nunasha Yus tuke waitnentrartatui. YKan. 103:17

⁵¹ Niṉkia aentsti túrachminia nunasha páchitsuk túraiti. Naṉkamantuitjiai tu enentáimtumainia nuna tsakiṉmakaruiti.

⁵² Ashí kakaram ainia nuna pujutái̱ri̱nia̱ akakiáruiti. Tura íksaṉ péejchach ainia nuna uunt awajsaruiti.

⁵³ Tsukamainia nuna Yus péṉkeran súsaruiti. YKan. 107:9 Tura antsu ‘ashí takakjai’ tuinia núnaka aya jú̱nik awajsaruiti.

⁵⁴ Israer shuar Niniu ájinia núnaka waitnentratniun kajinmáttsuk yaintmakuitji.

⁵⁵ Yaunchu ii Uuntri̱ Aprajáman tura ní shuarnasha ‘túrattajai’ timia nuna ímiatrusaṉ tuke túraiti.” Nuní̱ tímiayi Marí.

⁵⁶ Marikia Irisapítji̱a̱i̱ menaintiú nantu pujus ni je̱e̱n waketkimiayi.

Imiakratin Juaṉ akiiniamu

⁵⁷ Nuyá̱ ni takustin tsawant jeamtai Irisapít uchi áishmaṉkan takusmiayi.

⁵⁸ Tura ní shuari̱sha ni írutramuri̱sha “Irisapítian Yus ti shiir yáiṉkiuiti” tuíniak nin iyuwarmiayi. Tura mái̱ metek warasarmiayi.

⁵⁹ Israer shuar túrutai̱ jú̱nisaiti, uchi akiiniamuri̱ uchu tsawant jeamtai tsupirnaktin awai. Yus nuna tú tiniu asamtai tuke túrin ármiayi. Wats Irisapítia uchirí̱ akiiniamuri̱nia̱ uchu tsawant jeamtai tsupirkatai tusar ni je̱e̱n jearmiayi. Nuiṉkia ni aparí̱ naari̱ Sakarías anaikiataitsar wakeriarmiayi.

⁶⁰ Tura ni nukurí̱ chichaak “Atsá. Antsu ni naari̱ Juaṉ átatui.”

⁶¹ Tutai chichainiak “¿Nusha urukamtia? Amé shuarumsha nu náartincha áwak” tiármiayi.

⁶² Nuiṉkia uchi aparí̱n “¿Warí anaikiatajtsam wakeram?” tusar aya úweje̱ja̱i̱ṉ iniasarmiayi.

⁶³ Tutai uchí aparí̱sha “Nakash surusta, áartaj tusan wakerajai” tusa aya úweje̱ja̱i̱ṉ iniakmamiayi. Takui̱ nakash susam ni naari̱ Juáṉkaiti, tu áarmiayi. Nuna wáinkiar “Áyawá̱ urukakuṉ taa” tu enentáimprarmiayi.

⁶⁴ Nú chichamaik Sakarías chichatsuk pujamun chichakmiayi. Tura nuiṉ Yusa náari̱ncha shiir awajsámiayi.

⁶⁵ Nuiṉkia ni írutramuri̱sha ashamkarmiayi tura ashí Jutanam murá amia nui̱ nu túrunamun ujakam ashí nekaawarmiayi.

⁶⁶ Nu túrunamun antukar ti enentáimsarmiayi. Tura “ju̱ uchin Yus nekas pujurtsuk. Tuma asamtai uunt ajas ¿urukuk ati?” tu enentáimprarmiayi.

Sakarías Yus jintintiam timia

⁶⁷ Uchí aparí̱ Sakarías Yusa Wakaní̱ pimiutkam tura Yus jintintiam chicharukJuir 2:28

⁶⁸ “Israer shuarti ii Yusri̱ naari̱ shiir awajsatniuitji. Ii Yusri̱sha tarutmaitji. Tura uwemtikrampraitji.

⁶⁹ Yaunchu ii uuntri̱ Tawit Yusa wakeramuri̱ji̱a̱i̱ úunt akupin áchamkia. Tura ni úkuri̱n ti kakaram Uwemtikkiartinian suramsaitji.

^70-72 Yuska ii nemasri̱ya̱ tura iin nakitramainiajnia nuyá̱ uwemtikrampratniun enentáimsamia nunaYKan. 106:10 yaunchu ni etserniuri̱ péṉker armia nuna ujakmiayi. Winia tí peṉker chichamprun tájana nuna yapají̱tsuk umirkan tuke waitnentratajrume yaunchu ii úuntri̱n tímiania nunasha ni etserniuri̱n ujakármiayi. Yaunchu nu ujakma yamái iisha wainji.

^73-75 Nu ujakman Yuska yámankamtaik imiá yaunchu ii uuntri̱ Aprajáman tíchamkia. Aprajáman ujakmia nu ju̱i̱ti ‘Wi wakeraj nútiksaran Winia umirtukar péṉker wekainia nuna ni nemasri̱ya̱ uwemtikrattajai. Sapijmiatsuk winia tuke takartusarat tusan túrattajai’ Yus tímiayi Aprajáman. Iisha ni shuari̱ asakrin nuna taku iincha turamaji.

⁷⁶ Tura amincha uchiru, ‘Uunt Yusna etserniuiti’ turamartatui. Amesha ni tátintri̱ iwiarataj tusam Uuntai̱ émkim wétatme.Isa. 40:3-5; Mks. 3:1; 4:5

⁷⁷ Ni shuari̱ ni tunaarí̱ tsaṉkurnar uwemprarat tusam túrattame.

^78-79 Yuska ashí shuaran anea asa iincha waitnentramak ni pujamunmaya̱ ni tsáapnintri̱n suramsaitji. Ni enentái̱n kiritniunam wekainia nuna mesertinnium jeatéma ásarmatai ni tsáapnintri̱ jeatⁱ tusa túraiti.Isa. 9:2 Tura ashí iincha ii enentái̱n imiatkinchanum wekasarmí tusa túraiti.” Isa. 59:8 Nuní̱ tímiayi Sakarías.

⁸⁰ Uchisha tsakarmiayi. Tura Yusan nekaki̱ nekaki̱ wémiayi. Israer shuarnum etserkatin tsawantri̱ jeatsa̱i̱ṉkia atsamunam pujuyayi.