Riw. 20 - Yus Papí: Shuarja̱i̱ Yus Yamaram Chicham Najanamu

Yajauch túramunam tura péṉker umikchamunam asutniátin

¹ Uunt Yus Muisaisan chicharuk

² “Israer shuar ju̱sha ujakárta. Yaaksha aents Israera uchirí̱ṉsha núja̱i̱nchuka irarkesha Israernum pujá Murukan áestuttsa ni uchirí̱n súakka páchitsuk jákatniuiti. Aents nui̱ matsatáinia nuke kayaja̱i̱ tukurar máwartiniaiti.

³ Nú aentsnaka Wi suir kaje̱ntkamun iniaktustatjai tura ní uchirí̱n Muruk áestuatniun susa asamtai ní shuarnumia̱ṉka akankattajai. Warí nuna túrak Wínian Yus Shiir Awajtai̱ Je̱a̱rnasha tí natsanmai̱ yajauchiji̱a̱i̱ mátmamtikrar tura Winia naar Tunaarincha nunasha tí mui̱jmiai̱ awajkaruiti.

⁴ Kame Muruk áestuatniun ni uchirí̱n suan wáinkiariat mátniun nakitiáiniak nu nuṉkanmaya̱ aentssha nú aentsun pachischarmatai̱ṉkia

⁵ nú aentsnaka tura ní shuari̱ncha Wi suir kaje̱ntkamun iniaktusartatjai. Túran nú aentsnaka núnisnak ashí aents nu túramunam pachinkiar Murukja̱i̱ tsanirmawaru ásarmatai ní shuarnumia̱ṉka akankartatjai.

⁶ Kame aents chikichkisha aents jaká wakanín untsú tura nekamin áiniana nui̱ nuja̱i̱ tsanirmak wéakui̱ṉkia Wi suir kaje̱ntkamu iniaktustatjai túran ni shuarnumia̱ṉka akankattajai.

⁷ Tunaarincha ajasrum tunaarincha atarum, warí Wikia Úunt Yusaitjiai atumí Yusri̱.

⁸ Tura akupkámu umiktin chicham Wi najanamu arantúktakrum túrakrum péṉker enentáimtusrum umiktarum. Wi Uunt Yus asan atumín Winia awajsan tunaarincha awajearume.

⁹ Aents aparí̱nkisha núja̱i̱nchuka nukurí̱nkisha yúmiṉkiakka páchitsuk jákatniuiti. Warí ni aparí̱n núja̱i̱nchuka nukurí̱n imia niṉki makumaruiti.

Nuatkamuja̱i̱ tsanirmamu

¹⁰ Áishmaṉ nuwa̱ nuatkamuja̱i̱ tsanirmaka, ni aentsrí̱ nuwe̱ja̱i̱ tsanirma asa áishmaṉsha nuwa̱sha páchitsuk jákartiniaiti.

¹¹ Núnisaṉ aents aparí̱ nuwe̱ja̱i̱ tsaniṉ kanarka ni aparí̱n natsant awajka asa páchitsuk mái̱ jakartiniaiti. Warí, imia niṉki makumararuiti.

¹² Ántsaṉ aents ní najati̱ji̱a̱i̱ tsaniṉ kanarka páchitsuk mái̱ jakartiniaiti, warí peṉké netsen túrachminian túrawaru ásar imia niṉki makumararuiti.

¹³ Tura mái̱ aishmaṉkak tsaniṉ kanararka nuwa̱ja̱i̱ kanarua núnis mui̱jmiainian mái̱ turawaruiti. Tuma ásar mái̱ jákartiniaiti, warí imia niṉki makumararuiti.

¹⁴ Yaaksha nuwa̱n nuatak ni nukurí̱ncha nuatrukka peṉké túrachminian mui̱jmiainian túraiti. Nuna túrawaru ásar atumíin peṉké túrachminian mui̱jmiai̱n túrawara̱i̱ṉ tusarum áishmaṉsha tura núwa̱ka mái̱ jiniun áesatarum.

¹⁵ Aents yaaksha yajasmaja̱i̱ tsanirmaṉka páchitsuk jákatniuiti. Núnisrumek yajasmasha mátniuitrume.

¹⁶ Tura nuwa̱sha yajasmaja̱i̱ tsanirmamtaiṉkia nuwa̱sha máarum yajasmasha mátniuitrume. Páchitsuk mátnuitrume, warí imia niṉki makumararuiti.

¹⁷ Kame aents chikichkiksha ni umai̱n ni aparí̱ nawantri̱nkisha núja̱i̱nchuka ni nukurí̱ nawantri̱nkisha nuatkanka áishmaṉsha umai̱n tura nuwa̱sha umai̱niak natsant awajka asa mui̱jmiainian túrawaruiti. Tuma ásar Israer shuarka ashí iimiainiamunmaṉ nuya̱ṉka akankámu ártiniaiti. Warí ni umai̱n natsant awajka asa imia niṉki makumaruiti.

¹⁸ Tura áishmaṉ nuwa̱ nantú wáiniuk jaa pujaja̱i̱ tsaniṉ kanarka nuwa̱n natsan awajkáyi. Túrak numpe̱ncha wainkiayi tura nisha núnisaṉ ni numpa wáinman paant awajsáyi. Tuma ásar ní shuarnumia̱ṉka mái̱ akankatniuiti.

¹⁹ Ame nukú kai̱sha tura apá umai̱sha natsan awajkaip. Warí nu túrakmeka amé numpak natsan awajme. Nuka mái̱ metek imia niṉki makumararuiti.

²⁰ Kame áishmaṉ chikichkisha ni kaná nukurí̱ji̱a̱i̱ tsaniṉ kanarka ni kaná aparí̱n natsan awajka̱i̱. Tura imia niṉki ní tunaari̱ji̱a̱i̱ṉ makumararu ásar uchinkia wáintsuk jákartatui.

²¹ Núnisaṉ yaaksha yachí̱ nuwe̱n nuatkuṉka peṉké imiatkímpra túraiti. Yachin natsanmai̱ awajkaiti tuma ásar mái̱ uchirtichu juákartatui.

²² Tura chícham umiktin nuyá̱ akupkámu umiktin Wi najankamuka ashí arantúktarum túrakrum péṉker enentáimtusrum umiktarum. Nu umíakrumni̱ṉkia matsamsak tusan Wi yarumjarmena nú nuṉkasha imiaktinia nútikrama utsaṉmakchattarme.

²³ Núnisrumek átum waya̱ku tusan nú nuṉkanmaya̱ aentsu Wi jí̱i̱rtatjana nú aentsu túrutairi̱nkia atumsha túrawairap. Warí nú aentska nuna ashí turawaru ásarmatai Wikia peṉké muí̱jkiarmajai.

²⁴ Túrasha Wikia atumín chicharkun ‘Átum nu aentsu núṉke̱ṉka jukitiarme. Wi nú nuṉkanka atumnia atí tusan amastatjarme. Nú nuṉkaka timiá péṉker ashí arak tsapáu asamtai muntsu míshkiji̱a̱i̱ entsa waana núnisaiti’ tímiajrume. Witjiai Uunt Yus atumí Yusri̱ ashí aentsnumia̱ atumín Wi akankámiajrume.

²⁵ Núnisrumek átumka yajasma yutai̱ yúchataiji̱a̱i̱ nuyá̱ nanamtincha yutai̱ yúchataiji̱a̱i̱ túa ainia nu paant nekaatniuitrume. Kame yajasma, nanamtin tura nuṉká japinias yujá yúashtiniaitrume tusan Wi akantúkuitjiarme. Nu yúakrum atumsha imiatkímpra tsúumir ajasáirap.

²⁶ Wi atumí Uunt Yusri̱ tunaarincha asamtai atumsha núnisrumek tunaarincha átiniaitrume. Warí Winia aku tusan ashí aentsnumia̱ atumín Wi akankaitjiarme.

²⁷ Kame áishmaṉ núja̱i̱nchuka nuwa̱ksha jaká wakanín untsuwitkiuṉka núja̱i̱ṉchuka nekatnaksha nekamniuitkiuṉka páchitsuk jákatniuiti. Kayaja̱i̱ tukurá mátniuitrume. Warí imia niṉki makumaruiti” tímiayi.