Riw. 18 - Yus Papí: Shuarja̱i̱ Yus Yamaram Chicham Najanamu

Tsanirmatin surimkiámu

¹ Uunt Yus Muisaisan chicharuk

² “Israer shuar chicharainiakum Wi Uunt Yus atumí Yúsri̱ntjiai tawai tiartá.

³ Ejiptu nuṉkanam átum pujumiarmena nuyá̱ túrutaiṉkia túrawairap. Núnisrumek Wi yaruakan Kanaan nuṉkanam ejetajrumna nui̱, nuyá̱ aentsu túrutairi̱ ainia nusha túrawairap.

⁴ Antsu umiktin chichaman Wi najanamiaj nu umíakrum péṉker túratarum. Nútiksarmek nuke enentáimtusrum wekasatarum. Wi Uunt Yus atumí Yúsri̱ntjiai.

⁵ Wi umiktin chichaman najanamiaj nuna aents umíakka nekas iwiaaku wekasattawai. Wikia Úunt Yusaitjiai.

⁶ Áishmaṉ chikichkisha ní shuarnumia̱ nuwa̱ja̱i̱ tsanirmashti. Wikia Úunt Yusaitjiai.

⁷ Ame nukuja̱i̱ tsanirmakum apa wishikraip. Warí niṉkia ame núkuiti. Tuma asamtai tsanirmashtiniaitme.

⁸ Ame apá nuwe̱ja̱i̱ tsanirmawaip. Warí nuka ame apanuiti.

⁹ Ame nekas umai̱mi̱ji̱a̱i̱ tsanirmawaip. Núnismek apai̱ya̱ṉsha túrutskesha nukui̱ya̱ṉsha nui̱ṉ tura arant akiiniaitkiuisha tsanirmawaip.

¹⁰ Ame uchirmi nawantri̱ji̱a̱i̱ tura nawantrumi nawantri̱ji̱a̱i̱sha tsanirmawaip. Warí nuka ame aya̱shmikiti.

¹¹ Ame apá nuwé̱ nawantri̱ji̱a̱i̱ tsanirmawaip. Ame apa yajutmarmaiti. Warí umai̱miti tuma asamtai niji̱a̱i̱ tsanirmashtiniaitme.

¹² Ame apá umai̱ji̱a̱i̱ tsanirmawaip. Warí ame apá numpe̱ṉketi.

¹³ Nútiksamek ame nukú kai̱ji̱a̱i̱sha tsanirmawaip. Warí ame nukú numpe̱ṉketi.

¹⁴ Ame kaná apá nuwe̱ja̱i̱ tsanirmawaip. Warí áminkia kaná nukuiti.

¹⁵ Ame najatmiji̱a̱i̱ tsanirmawaip. Warí ame uchirmi núwe̱nti. Tuma asamtai niji̱a̱i̱ tsanirmashtiniaitme.

¹⁶ Ame yatsumi nuwe̱ja̱i̱ tsanirmawaip. Warí nuka ame yatsumniaiti.

¹⁷ Nuwa̱ ni nawantri̱ji̱a̱i̱ ápateakum tsanirmawaip. Tura ame nawantrumi nawantri̱ji̱a̱i̱sha nuyá̱ uchirmi nawantri̱ji̱a̱i̱sha tsanirmawaip. Warí ame shuar ásarmatai nuka peṉké natsanmainti.

¹⁸ Ame nuwem iwiaakai̱ṉ kai̱ji̱a̱i̱ ápateakum tsanirmawaip. Warí nuamtak nemasmanaikiartatui.

¹⁹ Nuwa̱ nantú wáiniuja̱i̱ tsaniṉkiaip.

²⁰ Núnismek ame yatsumi nuwe̱ja̱i̱ tsanirmawaip, nu túrakmeka ame iwiaakmaram yajauch awajsattame.

²¹ Tura najanamu yus Muruk áestuataj tusam ame uchiram susaip. Nu túrakmeka ame Úunt Yusrumi naari̱ ti yajauch awajsattame. Warí Wiki Úunt Yusaitjiai.

²² Tura nuwa̱ja̱i̱ tsanirmatia nútiksamek áishmaṉja̱i̱sha tsanirmawaip. Nuka peṉké muí̱jmiainti.

²³ Núnisaṉ yajasmaja̱i̱sha tsanirmawairap ántsaṉ nuwa̱sha yajasmaja̱i̱ tsanirmashti. Nuna túrakka peṉké yajauchin túraiti.

²⁴ Kame ashí ju̱ yajauch ainia nu túrakrum utsumákairap. Warí nu yajauchin utsumákaru ásarmatai átum waya̱krumin nu aentsnaka amuktatjai.

²⁵ Warí nú nuṉkaka ti yajauch ajasuíti tuma asamtai Wi ni yajauchiri̱n iirsan asutiámjai. Áintsaṉ nú nuṉkasha ni aentsri̱n mui̱ṉki̱ imiaktinia nútikia ajapamai.

²⁶ Tuma asamtai Israer shuartirmesha tura yajaya̱tiram nui̱ pujarmena nusha mui̱jmiai̱ya nuka túrutsuk umiktin chichaman Wi akupkámiaj nu umiktarum.

^27-28 Kame nú nuṉkanam yaunchu pujuarmia nu ashí nu yajauchin túruiniak mui̱jmiai̱ ajasármiayi. Túrawaru ásarmatai nu nuṉkasha ti yajauch ajasmiayi. Tuma asa nú nuṉka mui̱ṉtinia núnik imiakmia nútikias atumniasha imiutmaka̱i̱rum nu yajauch utsumákairap.

²⁹ Tuma asamtai yaaksha ashí nu yajauchin túrana nuka ni aentsri̱ya̱ akankimiu átatui.

³⁰ Nu túruna asamtai wi akupkámu umiktin chicham umíakrum péṉker túratarum. Yaunchu túrawarmia núnis mui̱jmiai̱ túrakrum yajauch ajasáirap. Wi atumí Uunt Yusri̱ asan tájarme” tímiayi.