Neka. 9 - Yus Papí: Shuarja̱i̱ Yus Yamaram Chicham Najanamu

Nekatai̱ untsumma

¹ Shuar je̱a̱n je̱a̱muk numin ukuá̱ je̱a̱mna núnis nekatai̱ siati paun ukur ni je̱e̱n je̱a̱mmai.

² Tura taṉkuri̱ ainia nuna maa iwiar nuyá̱ uwa yumiri̱ peṉkeri̱ji̱a̱i̱ pachimiak yurumtainiam ekentsaiti.

³ Nuyá̱ iwiar umik ni takarniúri̱n nuwa̱ natsachin akupkarmai. Nisha jiinkí̱ pepru mash íirkamunam waka untsuiniak

⁴ nekatai̱ chichartamuk “Natsatiram péṉker enentáimkiachu árumna nu winitiárum.

⁵ Namperan nájanjana ju̱i̱ winirum apatuk yurumárum tura winiu umarum wi iwiarajna nuja̱i̱ warastarum.

⁶ Netse enentáimtai̱ya̱ nuka iniaisatarum. Tura neka ajasrum pujustarum” tu untsumkarmai.

⁷ Shuar wishikkiartin jintintiámka íksan niṉkia arantúrmakchattawai. Tura Yusan enentáimtichua nuka chichareamsha yajauch chichartamkattawai.

⁸ Wishikiartinia nu chicharkaip, kajertamka̱i̱ṉ. Antsu péṉker enentáimniuka chicharkamsha anenmattawai.

⁹ Neka nuka jintintiam tí neka ajastatui. Núnisaṉ péṉker enentáimniusha unuiniaram nuna naṉkaamas nekaattawai.

¹⁰ Uunt Yus ashamamuja̱i̱ neka ajastin juárnawai. Núnisaṉ Peṉké Tunaarincha Nu nekaatniuka péṉker enentáimin ajastiniaiti.

¹¹ Warí aya wíji̱a̱i̱ṉ núkap tsawant wainkiattame tura núkap uwí iwiaakmarmesha eketnaktatme.

¹² Kame nékaitkiumka ame péṉkerumkete túrasha wishikiartiniaitkiumka ame wáitsatniukete.

Enentáimcha nuwa̱ untsumma

¹³ Enentáimcha núwa̱ka emesmawiti tura wáurkaiti nuyá̱ natsaamchaiti.

¹⁴ Nú nuwa̱ka ni je̱e̱ wáitiri̱n pujus tura pepru mash íirkamunam yakí̱ waka

¹⁵ paasa jintianam naṉkaamainian núnisaṉ nákak wénancha untsuktaj tusa iimia pujuwiti.

^16-17 Natsa péṉker enentáimchan untsúawai tura enentáimsatniun nékachuncha chicharainiak “Ju̱i̱ winitiárum kasamkámu éntsaka yuminiaiti tura apatuk u̱ka yuámuka yuu ajamainti” tawai.

¹⁸ Kame nisha nui̱ jakaa matsatainia nunasha nékainiatsui tura ni ipiaamuka jakaa matsamtai̱niam nú init pujuiniawai.