Neka. 8 - Yus Papí: Shuarja̱i̱ Yus Yamaram Chicham Najanamu

Nekatai̱ṉkia nuwa̱a núnis nékana nuna chicharui

¹ Nekatai̱ṉkia untsumui tura enentáimtai̱ṉkia kakaram untsumtsuk.

^2-3 Tura jintia náintiaani̱ wéamunmasha ántsaṉ jintia íṉkiuntramunmasha nuyá̱ uunt pepru wáitiri̱ncha wajawiti ántsaṉ wá̱i̱ti̱a̱i̱ri̱n wajas untsumuk chichaak

⁴ “Maa, ashí aentstiram wi chichareajrumna ju̱ nekas antuktarum.

⁵ Nékachutiram péṉker enentáimkia átin tura péṉker enentáimkiachutiram neka ajastin unuimiátratarum.

⁶ Ti shiir chichaman nekasa nuna ujaktinian takurkajrume tuma asamtai anturtuktarum.

⁷ Kame wi tájana nuka nekasaiti warí anaṉkartushim chichaktinian wikia nakitiajai.

⁸ Winia chichampruka anaṉkartichuiti. Kame péṉker chicham asa yajauchichuiti.

⁹ Ímiatrus antinji̱a̱i̱ṉkia ashí péṉker áiniawai tura antukarua nuka nekasaiti tuíniawai.

¹⁰ Tura wi jintinkiartamu unuimiátratniuka kuítji̱a̱i̱sha tura kuriji̱a̱i̱sha naṉkaamas wakerújataiti.

¹¹ Ántsaṉ shíirmach kayaja̱i̱ tura ju̱ nuṉkanam wakerú ajamai írunna nuja̱i̱ apatkar iismasha nekatai̱ naṉkamantuiti. Tuma asamtai winia jintíamur unuimiátram nekaata.

¹² Wi nekatai̱ asan esetra enentáimsatniun nékajai. Tuma asamtai péṉker jintíamu ainia nu nekaatin wíji̱a̱i̱ṉkia yúpichuchiti.

¹³ Uunt Yus ashamakum yajauchia nu nakitráttame. Kame waantu enentáimtumastinniasha tura chikichji̱a̱i̱ṉkia naṉkamantuitjiai tu enentáimtumastinniasha núnisaṉ yajauch túratniuncha nuyá̱ yajauch chichastinniasha wikia peṉké nakitiajai.

¹⁴ Kame chicharkartin péṉker enentáimsa túratniusha tí neka átincha nuyá̱ kaka̱a̱rtincha wini̱ya̱ṉ áiniawai.

¹⁵ Akupin ainia nusha wiji̱a̱i̱ ímiatrus akupáiniawai tura úuntri̱sha nekasa nuja̱i̱ métek péṉker túruiniawai.

¹⁶ Tura uuntri̱ ainia nusha wíji̱a̱i̱ṉ akupénawai. Nuyá̱ peṉkeri̱ ainia nusha túramuja̱i̱ métek iis nekáa jú̱ nuṉkanam péṉker umimtikiainiawai.

¹⁷ Kame anenta núnaka wisha aneenajai tura ásump enentáiji̱a̱i̱ émamkes e̱a̱tainia nuka wáitiainiawai.

¹⁸ Wikia amuicha kuítniasha núnisaṉ páantin awajsatniuncha tura naka wekasatniuncha sukartiniaitjiai.

¹⁹ Wi súaj nuka kuri unuikiar aya kúrik awajsámuja̱i̱sha naṉkamantuiti tura wi túraj nusha kuit unuikiar aya kuítiak awajsámuja̱i̱sha naṉkaamasaiti.

²⁰ Wikia nekatai̱ asan winia nekatairka nákakete. Tuma asan péṉker túrutai̱ jintianmaani̱ wekaajna nui̱ waitkiattame.

²¹ Anentainia núnaka súsartin péṉker iwiarturma ainia nuna patattsan súsartatjai.

²² Ashí najankamu áiniana núnaka najantsuk émkaka winia nekas tí peṉker enentáimturas Uunt Yuska najatamiayi.

²³ Tura nuṉka najanatsa̱i̱ṉ akupin atí tusa emka anaitiukmiayi.

²⁴ Tura nayantsa kunarí̱sha kame atsuiniai̱ wikia juárnakmiajai.

²⁵ Murasha najanatsa̱i̱ṉ wikia juárnakmiajai.

²⁶ Nui̱ nuṉka najanatsa̱i̱ṉkia kampunniusha nuṉká ju̱yu̱mchiri̱ṉsha peṉké atsuyayi.

²⁷ Nayaimpin nájanuk tenten kunanmaya̱ najanamia nui̱sha pujumiajai.

²⁸ Yuraṉkim yakí̱ naṉkantratniuri̱n tura uunt nayantsa púkuniri̱ naṉkantratniun chicharmia nui̱sha pujumiajai.

²⁹ Yus nayantsan ‘ju̱i̱ṉ naṉkantia tura nu arantka naṉkaamakip’ timia nui̱ wisha pujumiajai. Tura nuṉká tépakma muchitkiachmin ajasat tusa pujurmia nui̱sha

³⁰ niji̱a̱i̱ pujumiajai. Ashí najankatniun tí nékana núnisauyajai. Tura ashí tsawant shiir enentáimtutaiyajai. Nuyá̱ nin tuke warasan pujuyajai.

³¹ Yus nuṉka najanamunam pujuiniakui wisha wararainiajai. Núnisaṉ aentsnasha tí shiir enentáimtuiniajai.

³² Tuma asamtai uchirtiram yamaikia anturtuktarum, wi tájarmena nu umikrum wekaakrumka warastatrume.

³³ Nekatai̱ya̱ nu nakittsuk péṉker anturkatarum.

³⁴ Aents winia anturtaná tura winia wáitkiataj tusa kashí kashini̱ṉ e̱a̱tuk nákarná nuka ti nekas waraawai.

³⁵ Wi nekataintjiana ju̱na wáitkianka iwiaakman wáinkiaiti tura Uunt Yusa waitnenkartutairi̱n takakui.

³⁶ Antsu winia tuntupea iniaitiana nuka niṉki yajauch awajmamui tura ashí nakitruinia nuka jákatniun wakeruiniawai.”