Neka. 6 - Yus Papí: Shuarja̱i̱ Yus Yamaram Chicham Najanamu

Tumashmakchatin

¹ Uchiru, ame amikrum tumashmakmatai wi akikmatkatjame tusam nékashtai̱ ame uwejém susamka

² timiá amek itiurchatnum súmameame tura ame chichammiji̱a̱i̱ṉ jiṉkiar emetamua núnikiuitme.

³ Túrunam chíkich takarin ajasume. Tuma asamtai tímiam nuyá̱ aṉkant ajastaj tákumka amikrum werim atsaṉmamsam “akikmatkashtatjame tsaṉkurturta” timi aṉkant ajasta.

⁴ Kame nu túrutskeka “kanartajná” tura “ayampratjaná” tiip.

⁵ Antsu japa e̱a̱mniun wainiak tsékeaná tura chiṉki ajatkampramun wainiak nanaak yajá wéaná núnikta.

Naki jintintiátin

⁶ Nákitiram week takakmainia nu íisrum takakmastin unuimiátratarum.

⁷ Kame úuntri̱nchaitiat tura ju̱ní̱ takakmasta táchamaitiat

⁸ weekka ni enentái̱ji̱a̱i̱ṉ tuke tsawant takakmainiawai. Tura yumitin yurumámi tusar esatái̱ takakmasar ni yurumkari̱n júukar ikiuiniawai.

⁹ Maa nakí, amesha nakimtasha ¿urutái iniaisattam? ¿Urutái shintiaram takat enentáimturtatam?

^10-11 Ántram yamaikia ayampratjai tusam takakmastin ishí íniaisamni̱ṉ shuar jatekratna ántsaṉ tsuka jatetmaktatui. Tuma asamtai kakaram ajasam takakmasta tájame.

Yajauch enentáimkia

¹² Shuar yajauch enentáimkiana nu jú̱nisaiti, wait chichaman jukí̱ chíkich shuaran tsanukní̱ wekainiuiti.

¹³ Anaṉkataj tusa ji̱ji̱a̱i̱ mítsumsaṉ tura nawe̱ja̱i̱ ántiniaisaṉ tura uwejé̱ja̱i̱ íniakmasaṉ ajawiti.

¹⁴ Ni enentáimmiari̱ṉkia ti yajauchiti. Tuma asa tui̱ wekáa nui̱sha aya yajauchiniak enentáimiuk mámtikiatniun tuke wakerus wekainiuiti.

¹⁵ Tuma asa nu shuaran wáitsatniuri̱ aneachma arittiawai tura itiurchatri̱ya̱ peṉké ayamprashtatui.

Yus muí̱jiamu

¹⁶ Yus nakitia nuka sais áiniawai nuíchuka siátiti kame Yus peṉké muí̱jiamuka jú̱ áiniawai.

¹⁷ Naṉkamantu íimiamsatin, waitruatin, maṉkartuatin,

¹⁸ yajauchia nu enentáimtustin, yajauchia nu wekaatustin,

¹⁹ nekascha nu nekasaiti títin, nuamtak yachiji̱a̱i̱ mámtikiatin.

Natsa chicharma

²⁰ Uchiru, ame apa akupkámusha umikta ántsaṉ ame nuku jintintramna nusha nakitraip.

²¹ Kajinmatki̱j tusam esetram enentáimkiak wekasata.

²² Tsawai̱sha tuí̱ṉkish wekaittiam nui̱sha jintintrámawartatui. Tura kashi tepakmincha nui̱sha enentáimmiarmin waitramiartatui. Nuya̱ṉka kashin shintiartatmena nui̱sha chichartamiartatui.

²³ Akupénamusha shirikip keeá núnisaiti. Tura chichartamniua nuka shiripkiji̱a̱i̱ métek péṉker wekasatniun jintintramaiti.

²⁴ Tura uchiru, chichartamna nuka yajauch nuwa̱ ikiajtiúrmakiṉ tusa aṉkant awajtámsattawai tura yuminian chichartamna nuya̱sha uwemtikramprattawai.

²⁵ Ni shíirmari̱ enentáimtusam wakerutkaip núnisaṉ nisha ji̱n peertamka̱i̱ṉ.

²⁶ Tsanirmatai núwa̱ka áishmaṉkan aya kuítriniak amutnuiti. Antsu nuwa̱ áishri̱nniuitiat tsanirmakka yaja̱i̱ tsanirma nuna shiir pujamun emestiniaiti.

²⁷ Warí ji kapa̱a̱n miniakeana nuka ni pushiri̱n áesachminkiait.

²⁸ Tura jinia amutuaṉka ni nawe̱n áesachminkiait.

²⁹ Núnisaṉ shuar ni írutramuri̱ nuwe̱n tsanirma nuka jiji̱a̱i̱ sukumana núnisaiti. Yaaksha ni írutramuri̱n tsanirma nuka páchitsuk asutniáttawai.

³⁰ Kasa tsukamak yurumáttsa kasamea nusha ¿nakitmainchukait?

³¹ Túmaitkiuisha kasamkámu nekanaṉka siati pataas awaiṉkitniuiti. Táasmataiṉkia ni warirí̱n je̱e̱n ana nuna mash surumakminiaiti.

³² Tura tsanirma nuka mutsuktichuiti. Nuna túmak niṉki emesmamui.

³³ Áyatik awatnar natsanmai̱ ajaktatui. Túrasha natsanmai̱ ajakmári̱nkia peṉké emeṉkákchattui.

³⁴ Warí áishmaṉ akasmakka suíran ka̱e̱ kaje̱ntkattawai. Tuma asa yapajkiatniuitkiuiṉkia peṉké tsaṉkurashtatui.

³⁵ Tsaṉkurnáiratai tusa núkap akiktajme tutaisha peṉké anturkashtatui.