Neka. 5 - Yus Papí: Shuarja̱i̱ Yus Yamaram Chicham Najanamu

Tsanirmatai nuwa̱ áishmaṉkan yúpichuch ánaṉkeamu

¹ Uchiru, wi neka asan ámin chicharjamna nu ímiatrusam enentáimsam antukta.

² Kame neka tura enentáimias chicháu átaj tákumka wi chichareajmena nu péṉker antukta.

³ Warí tsanirmatai nuwa̱ áishmaṉkan emka ti yuminchin chicharui tura tí peṉkera nuna iniaktawai.

⁴ Túrasha ukunam puyá̱ atsakamuja̱i̱ akaṉtinia núnis tura yapaja̱i̱ métek nekapratin winiawai.

⁵ Nu nuwa̱ wekaamuka meṉkakatniunmaani̱ wéakui nin némarna nuka jákatniunam jeawai.

⁶ Nú nuwa̱ka iwiaaku jintianka ántraiti tu enentáimtawai. Warí ni wekaamuri̱ mái̱ yapaji̱ ajakui tui̱ wea nuna nékatsui.

⁷ Tuma asamtai uchirtiram antuktarum. Winia chichamur kajinmátkirap.

⁸ Chíkich nuwa̱ je̱e̱ní̱ peṉké wekasaip antsu nuni̱ṉkia wétsuk yajá menaṉtia.

⁹ Tura ame kakarmaram wasurka̱i̱m nuyá̱ kajennum jeawa̱i̱m yajauchia nu wekaatusaip.

¹⁰ Nu túrakmeka ame takatrum tura kuítrumsha chikicha je̱e̱n ántar ajapnattawai.

¹¹ Tura winia chichamur peṉké ántutsuk yajauchia nu túrukim wéakmeka ame aya̱shim yaitias amuiki̱ wéakui nekaamattame.

¹² Nui̱ útkum “¿urukamtaik chicharmaitiatnasha enentáimtsuk péṉke antukchamiaj,

¹³ jú̱niktin asaná jintintruinia chichame̱ncha antuktinian imiá nakitniuyaj?

¹⁴ Yamaikia wi shuarsha tura írutramursha yajauchi túriniaiti turutiartatuapi” títiatme.

¹⁵ Tuma asamtai chikicha yumirmatri̱n wétsuk ame yumirmatrumiya̱ṉ umaram kitiakrum imikrata.

¹⁶ Warí ame entsaram ukaráinmeash tura nu arant péprunmasha weme ukaram wasurkaintmeash.

¹⁷ Nu yumirmatcha áminiuk atí antsu chikichna áchati.

¹⁸ Ame nuwemji̱a̱i̱ shiir pujusta tí peṉker awajsamu atí.

¹⁹ Kame nuwemsha taṉku uchich miniaksar saúkú ajata núnis enentáimtuschamniakait. Tuma asamtai miniaksam shiir awajeakum níjia̱i̱ṉ warasta. Túramka amincha ti anenmak waramtikramtiatui.

²⁰ Tuma asamtai uchiru warí chíkich nuwa̱ áminiuchuja̱i̱sha ¿urukamtaitsuk miniaksam wekasaintiam?

²¹ Warí Uunt Yus shuara wekaamuri̱n mash wáinniuiti túrak ni túrutairi̱n nekarniuiti.

²² Antsu Yusan enentáimtichuka ni yajauch túrutairi̱n emetamu áiniawai kame ni tunaari̱n chapikji̱a̱i̱ jiṉkiatniua nútikiamu pujuiniawai.

²³ Nu asamtai péṉker chicham jintinmaitiat ní nakittsaṉ jakattawai tura ti netse enentáimin asa wáitsatniunam jeattawai.