Neka. 31 - Yus Papí: Shuarja̱i̱ Yus Yamaram Chicham Najanamu

Remuera chichame̱

¹ Ju̱i̱ti Masanmaya̱ akupniu Remuera chichame̱ ni nukurí̱ jintinmia nu.

² Winia uchiru, ámeka wi takusmaitme. Wi wakerakun Yus seam surusmia nuitme.

³ Uchiru, nuwa̱nam ame kakarmaram wasurkaip. Tura akupniu emesin ainia nuna túrutairi̱ túrawaip.

⁴ Remuerá, ju̱ka akupin túrushtainti tura akupniúka nampekchatniuiti. Núnisaṉ uuntri̱ ainia nuka awartiun umarchatniuiti.

⁵ Kame nampekar akupkámun kajinmatkiar túratniua nuna umitsuk ashí wáitiainia nuna itiurchat awajkara̱i̱ṉ tusan tajai.

⁶ Antsu tí jaaka nu umutai̱n umararti. Ántsaṉ tí kuntuts enentáimna nusha umararti.

⁷ Kame nuna umarar atsumainiamuri̱n tura waitiainiamuri̱n nu arant enentáimtutsuk kajinmatkiarti.

^8-9 Muutcha tura wáitkiasma pujuinia nusha nuyá̱ peṉké takurmakchasha núnismek atsumainia nusha ashí métekrak enentáimtusaram niniu átinia nu ayamprakum chichamprukarta.

Péṉker nuwa̱ shiir awajeamu

¹⁰ Tí peṉker nuwa̱ wainkia nuka kaya shíirmachi kuítri̱ji̱a̱i̱ naṉkaamas péṉkeran wáinkiaiti.

¹¹ Péṉker nuwa̱ asamtai ni áishri̱sha shiir enentáimias wekainiaiti. Tuma asa kuítri̱sha táamtsuk kaweṉkattawai.

¹² Iwiaaka nui̱ṉkia ni áishri̱ncha yajauch awajtsuk tuke tsawant péṉker wáinniuiti.

¹³ Ni enentái̱ji̱a̱i̱ṉ uruchí̱n tura kamushan juuk ikianak waras takakmawiti.

¹⁴ Ásump nuwa̱ asa ni ajarí̱ jeashtanmaya̱nak yurumkan núkap ikianak suruktinia tímiatrus irumar pujuwiti.

¹⁵ Tsawa̱a̱na nui̱ nantaki̱ ni shuari̱ncha ayurkamuk tura nuwa̱ch iniatairi̱ ainia nunasha yurumkan akanar súwiti.

¹⁶ Tura nuṉkancha wekatus iis péṉkeraitkiui súmawiti nuya̱ṉka nui̱ takakmas arakmawai.

¹⁷ Wári nuwa̱ asa kaki akachuma kakaram takakmawiti.

¹⁸ Ni takatrí̱ya̱ kuítri̱sha kaweṉki̱ wea nékak nu arant káshisha takakmak ni shiripkiri̱ncha ikiajniatsui.

¹⁹ Uruchniasha kutamar ka̱e̱r iwiarniuiti.

²⁰ Kuítrinchancha núnisaṉ atsumainia nunasha súwiti.

²¹ Warí ní shuari̱ṉkia pushirí̱sha nuparman entsaru ásarmatai micha iniarmataisha tsetsekái wáitsarainti tu enentáimtichuiti.

²² Aintkiar tepetai̱ nuparman níniunak najanniuiti tura ni entsatái̱ri̱ncha kuítrintin entsáu ainia íimmianun najanak entsawiti.

²³ Tura ni áishri̱sha nu nuṉká uuntri̱ ainia nu irunainia nui̱sha paant nekaamuiti.

²⁴ Tarachniasha tura emenmamkancha najanak sumau ainia nui̱ súriniaiti.

²⁵ Kakarmari̱ji̱a̱i̱ tura arankartutairi̱ji̱a̱i̱ entsarua núnis asa shiir enentáimias pujak ukunam átatna nunasha páchichuiti.

²⁶ Chichaaksha nekatai̱ji̱a̱i̱ enentáimias chichaawai tura waitneṉkratamuja̱i̱ jintinkratniuiti.

²⁷ Ni je̱e̱ncha warí urukainia nunasha mash nékawai túmak nakimtsuk takakmaki̱ wéak yurumniuiti.

²⁸ Ni uchirí̱sha tura áishri̱sha ti shiir enentáimtusar shiir awajainiak

²⁹ “Untsurí nuwa̱ shíirmach péṉkera túrawaru irunainiawai. Túmaitkiuisha ámeka núja̱i̱sha naṉkaamas tí peṉkeraitme” tuíniawai.

³⁰ Nuwa̱ shíirmach íirkaitkiusha nuka peṉké ántraiti. Antsu nuwa̱ Uunt Yusan umirka nuka shiir awajmáinti.

³¹ Ni takatri̱ya̱ja̱i̱ waitnentrampra asakrumin atumsha nútiksarmek pepru uuntri̱ irunainia nui̱sha ni túramuri̱ enentáimtusrum shiir awajsatarum.