Neka. 30 - Yus Papí: Shuarja̱i̱ Yus Yamaram Chicham Najanamu

Akura Chichame̱

¹ Ju̱i̱ti Akura chichame̱ Jaké uchirí̱. Ju̱ Yusai̱ya̱ chichaman étserui. Pimpikjiai Yusru, maa pimpikjiai Yusru, túran peṉké kakarmachu nekapeajai.

² Nekas chikichja̱i̱ṉkia naṉkaamas wikia imian nékachuitjiai kame aentsun nekatairi̱ ana nuna takakcha ániuitjiai.

³ Wikia nekatai̱ unuimiárcha asan Tunaarinchan nekaatniun jeatsjai.

⁴ ¿Ya nayaimpiniam waka ataksha táarait? ¿Ya ni uwejé̱ja̱i̱ nasen emetait? ¿Ya tarachji̱a̱i̱ entsan áreṉkuit? ¿Ashí nuṉkanam írunna nunasha ya najankait? ¿Ni náari̱sha tura uchirí̱ náari̱sha yait? ¿Nu nékamek?

⁵ Yusa chichame̱sha timiá nekasaiti tuma asa Niin weanainia núnaka tantara núnis uwemtikiainiawai.

⁶ Ni chichame̱ pataakum wáitrin ajasaip, asutniáwa̱i̱m.

⁷ Uunt Yusru jímiarchiniak seajmena nu iwiaakjana ju̱i̱k anturtukta.

⁸ Ántar ainia nuyá̱ tura wait chichamnumia̱sha akantuktia núnisaṉ kuítrinniusha kuítrinchasha awajtúsaip. Antsu yurumkan atsumajna nuke surusta.

⁹ Kame ti takakkuṉka ámin kajinmátkin “¿Uunt Yussha yait?” tíiji̱a̱m núnisnak kuítrincha ajasnaka kasamkun ame náarmin yajauch awají̱j.

¹⁰ Takarin ni úuntri̱i̱n tsanumpruraip. Nu túramka nisha yumiṉkrampramtai amesha sumamawa̱i̱m.

¹¹ Aents ni aparí̱n yajauchiniam yumiṉniusha tura nukurí̱n shiir awajchasha írunui.

¹² Kame aents ni yajauch túrutairi̱nkia iniaisachiat ni enentáimmiari̱ji̱a̱i̱ṉ péṉker enentáimtumasha írunui.

¹³ Núnisaṉ aents waantu enentáimtumak ímiancha enentáimkiartinkia naka imias wekainiusha írunui.

¹⁴ Kame nu aentsu nai̱ṉkia puya̱na núnis áiniawai tura uunt nai̱ṉkia kuchiiya núnis asa ju̱ nuṉkanam atsumainianka tura ímianchach ainia núnaka yua nútikniusha írunui.

¹⁵ Jitiachi nawantri̱ jímiar ainia nu seamainiak “surusta, ataksha surusta” ajainiawai.

¹⁶ Núnisaṉ ejemachuka menaint áiniawai tura kuatrua nuka “máakete” tatsui. Kame nuka ju̱ áiniawai, jaka matsamtaisha tura nuwa̱ kaa ajasusha nuyá̱ nuṉka entsa pajamtushtai̱sha tura jisha “máakete” tíchaiti.

¹⁷ Uchi ni aparí̱n wishikniua núnaka tura nukurí̱ chichareamsha kajek áimniua núnaka kayanmaya̱ pinchu ji̱n ukuitkiamtai yapú uchirí̱ naintia kaketukar ji̱n yuruawartatui.

¹⁸ Menaint ainia nusha wíji̱a̱i̱ṉkia nekaachmin áiniawai kame kuatrua nunasha nékatsjai.

¹⁹ Churuwia nanaaki̱ wema páantkait. Napi kayanam japinki̱ wemasha páantkait. Nayantsanam uunt kanú wemasha páantkait. Tura áishmaṉ nuwa̱n werimiusha páantkait.

²⁰ Nuwa̱ tsanirmatan unuimiátraka jú̱nisaiti, yurumá japí japimiá ajas pujusua núnis “wikia yajauchin túrachjai” tíniuiti.

²¹ Menaint ainia nuja̱i̱ aents katsuntainiatsui kame kuatrua nuka ti yajauch awajeawai. Tura ju̱ áiniawai,

²² takarniuitiat akupin ajakui nuya̱sha nétsetiat tárameakui

²³ núnisaṉ nuwa̱ muí̱jtiaitiat niniurtakui nuyá̱ nuwa̱ chíkich nuwa̱n takarniúri̱ntiat nérentin ajakui nuja̱i̱ wáitiawai.

²⁴ Ju̱ nuṉkanam yajasmach írunna nuyá̱ kuatru ti uchichitiataṉ neka ainia nuja̱i̱ naṉkaamas ti neka áiniawai.

²⁵ Nuka ju̱ áiniawai, week kakarmachuitiat ni yurumkari̱n esatái̱ juuk ikiuawai

²⁶ núnisaṉ miwiach ayamprumakchamniaitiat kayanam jeam pujuiniawai

²⁷ núnisaṉ manchi akupniúrtichuitiat pekamak yujawiti

²⁸ tura sumpa yúpichuch achikminiaitiat akupniu je̱e̱ya̱ ímiatrus pujuwiti.

²⁹ Menaint naṉkamantu enentáiji̱a̱i̱ wekain kame kuatrua nuka ti péṉker wekain áiniawai tura ju̱i̱ti.

³⁰ Úunt ya̱wa̱ ashí yajasma ainia nuja̱i̱ naṉkaamas ti kakaram sapijmiachuiti

³¹ núnisaṉ áyump waantu enentáimtuma tura chipiu áishmaṉ nuyá̱ akupin ashí ni suntari̱ji̱a̱i̱ jiinkiui ashamtainti.

^32-33 Nekas muntsu kantemtikniuitkiumka macha takustatme tura ti kakaram shí̱i̱kmakmeka numpá nujirkittiame ántsaṉ kajeakmeka katsumkartukam suir mikirtatme. Tuma asamtai nékachua áintsam waantu ajasuitkiumsha tura yajauch túratin wakerukuitkiumsha nuka pachisaip.