Neka. 29 - Yus Papí: Shuarja̱i̱ Yus Yamaram Chicham Najanamu

Aneartarum tusar nekatai̱ jintinkratma

¹ Aents chicharmaitiat kattsuntsuk yajauchi túruki̱ wéamuri̱ji̱a̱i̱ aya aneachma iwiarnatsuk jakamniaiti.

² Yusan umirin káwenakuinkia ashí shuar warainiawai antsu akupin Yusan enentáimtichuitkiuiṉkia kúntuts pujuiniak útainiawai.

³ Aents nekaatniun ti wakera nuka ni aparí̱ncha waramtikniuiti antsu tsanirmatai nuwa̱ja̱i̱ tsanía nuka ni warirí̱ncha ashí emeṉkártatui.

⁴ Akupin péṉkera nuna túrakka ni nuṉke̱n iwiarniuiti antsu akupin akikmaktinia nuna iniaṉkas ataksha akikmaktarum tíniuitkiuṉka ni shuari̱n emesmawiti.

⁵ Aents ni írutramuri̱n ántar chichamja̱i̱ shiir awaju ajana nuka awaṉkemkar iniartinia núnisaiti.

⁶ Aents yajauchin túrinkia ní yajauchiri̱ni̱ṉ sumamattawai. Antsu péṉkera túrinkia kantamuk warastatui.

⁷ Shuar péṉker enentáimniuka kuítrincha ásar nekas atsumainiana nuna enentáimtiniaiti antsu Yusan enentáimtichuka núnaka peṉké enentáimtichuiti.

⁸ Netse enentáimniuka ashí aentsun akajar awajniuiti antsu neka nuka kajeancha atsaṉniuiti.

⁹ Aents nétsea nuka neka chicharmasha nu arant kajenaiti nuíchuka aya wíshiniaiti. Tuma asa peṉké yapajniáchuiti.

¹⁰ Aents maṉkartin ainia nuka péṉker aentsun muí̱jin áiniawai antsu péṉker enentáimniuka péṉker aents shiir árat tusa wakerin áiniawai.

¹¹ Enentáimcha nuka kajekmája̱i̱ chichaman esettsuk chichawiti antsu nékaaka chichaman émeteak aṉkant nekapmamniuiti.

¹² Akupin wait chichaman ánturkuṉka ashí ni takarniúri̱n yajauch awajsámniaiti.

¹³ Atsumainiancha tura itit awajniúncha Yuska mái̱ metek tsáapnin shiira nuna suawai.

¹⁴ Akupin atsumainia nuna nekasa nuja̱i̱ métek iis nekáa ni pujuttana ímianaisha tuke aṉkant akupin átatui.

¹⁵ Úchikia chicharkar numiji̱a̱i̱ asutiam enentáimniuiti antsu páchishtaiṉkia ni nukurí̱ncha natsant awajniuiti.

¹⁶ Yajauch shuar ti pampaṉmataiṉkia yajauch túratniusha ti naṉkaamas átatui tura péṉker shuarka nu aents wáitiamun wáinkiartatui.

¹⁷ Ame uchiram péṉker jintintiata, nu túraitkiumka nisha ayamtikramprattawai núnisaṉ ame enentáimji̱a̱i̱sha warastatme.

¹⁸ Péprunam Yusa chichame̱ etserin atsakuiṉkia ti yajauch áminiaiti antsu Yus akupkámu chichaman uminia nuka waraawai.

¹⁹ Takarniua nuka aya chíchamja̱i̱ṉ jintintiáshtiniaiti kame ántayat umíachkuiṉkia asutiátniuiti.

²⁰ Aents wárik chichawa nu ¿wáinchakaitiam? Kame núja̱i̱ṉkia naṉkaamas netsé chichame̱ anturkamniaiti.

²¹ Takarniua nusha waitnentsar úchichik weakar tsakatmarmaka ukunam ni uuntri̱ wariri̱ írunna nuna nérentin ajasminiaiti.

²² Shuar kajé kajetka maani̱ ajat nekapniuiti tura nú arant suir nekapniuka yajauchin túrak tí ikiauntumnuiti.

²³ Shuar naṉkamantu enentáimtumana nu péejchach awajnástatui tura íksan péejchach enentáimtuma nuka naṉkamantu awajnástatui.

²⁴ Shuar kasanam páchitkia nuka yúmiṉkiamsha ántayat peṉké etsercha asa imia niṉki yajauch awajmamui.

²⁵ Aentsu ashamniua nuka jintia akiramunam eṉkemkatniua núnisaiti antsu Uunt Yusan enentáimtinkia uwemprattawai.

²⁶ Untsurí shuar aya akupniu waitnenkartutairi̱n e̱a̱iniawai antsu aṉkant aṉkant niniu átinia nuka Úunt Yusai̱ya̱ṉkete.

²⁷ Yajauchin túrin ainia nu péṉkera túrin ainia nuna muí̱jiainiawai núnisaṉ péṉker wekainia nu Yusan enentáimtichu ainia nuna muí̱jiainiawai.