Neka. 28 - Yus Papí: Shuarja̱i̱ Yus Yamaram Chicham Najanamu

Nekatai̱ jintinkratma akupkámu umiktinnia

¹ Shuar Yusan enentáimtichua nuka apapéachmaitiataṉ ni enentái̱ji̱a̱i̱ṉ pisawiti tura péṉker enentáimkiaka úunt ya̱wa̱ wajana tímiatrus wajawiti.

² Yajauch pampaṉmataiṉkia akupniúsha untsurí ajainiawai. Antsu péṉker enentáimias akupniua nuka ashí péṉker wáiniuk niṉki akupniuiti.

³ Kuítrinchaitiat chíkich kuítrinchan waitkia nuka yumi tí yutak arakan emesak tsukamtikiana núnisaiti.

⁴ Akupeamun umircha ainia nu yajauchia nuna shiir enentáimtuiniawai tura umirin ainia nuka niji̱a̱i̱ nemasmainiawai.

⁵ Yajauch shuar ainia nuka péṉker túratniun nékainiatsui antsu shuar Yus wakeramun túruinia nuka mash nekamnia áiniawai.

⁶ Kuítrintin yajauch enentáimkia núja̱i̱ṉkia kuítrincha arankartinia nu nekas péṉkeraiti.

⁷ Uchi ashí akupeamun uminkia péṉker enentáimkiaiti. Tura aya yurumkanak enentáimtinji̱a̱i̱ tsaníakka aparí̱ncha natsanmai̱ awajniuiti.

⁸ Kuítian ikiamas tí nukap patattsar awaṉtukim kuítrintin ajainiakka kuítrinchan waitnentainiak yain ainia nuna ikiauntuiniawai.

⁹ Aents Yus akupeamun umiktinian nakitiayat seá núnaka Yuska peṉké mui̱jmiai̱ iyaawai.

¹⁰ Naka enentáimkia nuna yajauchiniam aju̱i̱nia nuka nisha nu itiurchatnumaṉ iniartatui antsu péṉker enentáimkia ainia nuka ukunam ti péṉkeran waitmakartatui.

Nekatai̱ jintinkratma kuitnia

¹¹ Kuítrinniua nuka ni enentáimtumaska nekáa ímianu enentáimtumawiti antsu neka nuka kuítrinchaitkiusha kuítrinniu enentáimmiari̱n mash nékarui.

¹² Péṉker túrin ainia nu awakmainiakka ashí warainiawai antsu yajauch túrin ainia nu wajararmataiṉkia aents u̱mainiawai.

¹³ Shuar ni yajauch túrutairi̱n u̱á̱ nuka péṉker áchattawai antsu ni tunaari̱n etserak yajauch túrutairi̱n ikiuana nuka waitnennar tsaṉkurnartatui.

¹⁴ Yusan ashamak tuke shiir awajna nuka ti waraawai antsu ni enentái̱n ikiatsua nuka yajauchiniam iniartatui.

¹⁵ Akupin ni pépruri̱ kuítrincha áinian nékayat yajauch akupea nuka úunt ya̱wa̱ shiniana tura chai̱ tsukamana núnisaiti.

¹⁶ Akupin enentáimchaka ni aentsri̱ kuítrinchan nékayat kakarmaja̱i̱ atannuiti. Antsu nekascha nuja̱i̱ kuit ikiauṉkatniun mui̱jmiai̱ enentáimtinkia núkap tsawant iwiaaku pujustatui.

¹⁷ Maṉkartinia nuka aya písataik jákatniunam wéakuisha núnaka yaaksha emetacharti.

¹⁸ Makuchma péṉker wekáa nuka yajauchinmaya̱ uwemprattawai antsu yajauch enentáiji̱a̱i̱ wekáa nuka aya aneachma emesnartatui.

¹⁹ Ni nuṉke̱n takakmana nuka taramka asa tsukamáshtatui antsu nakia nuja̱i̱ tsaniṉ wekáa nuka peṉké kuítri̱ncha juáktatui.

²⁰ Tuke péṉker túrinia nuka shiir enentáimtusma tura péṉker pujutnum yumiṉkramu átatui antsu kuítriniataj tusa wáurtana nuka urutáiṉkish ásutniatniukete.

²¹ Aents métek enentáimtunaischatniuka péṉkerchaiti. Aya apatuk púusar susamuja̱i̱ṉ aents yajauchin túrawai.

²² Áishmaṉ yajauch enentáinniuka wárik kuítriniattsa núkap takustinian wakeriniaiti túrasha kuítrincha juáktatna núnaka nekamatsui.

²³ Aents ántar péṉker chicharu ajana núja̱i̱ṉkia nekaska péṉker chicharkainia nuna naṉkaamas yumiṉsamu átatui.

²⁴ Shuar ni aparí̱ncha nukurí̱ncha kasarkayat “ju̱ túratniuka tunaachuiti” tana nuka emeskartinian amikri̱nti.

²⁵ Kakaram enentáimtuma nuka aya mánaiktinniak wakeriniaiti antsu Uunt Yusan enentáimtinia núja̱i̱ṉkia ashí péṉker átatui.

²⁶ Aya ní enentái̱ji̱a̱i̱ṉ enentáimtuma nuka nétsete antsu nekatai̱ji̱a̱i̱ wekáa nuka aṉkant awajnástatui.

²⁷ Kuítrinchan yayá̱ nuka peṉké atsumashtatui tura kusurua núnis kuítrinchan peṉké enentáimtatsna nuka ti yajauchiniam yumiṉnartatui.

²⁸ Yajauch shuar ainia nu wajararmataiṉkia aentsush u̱mainiawai tura yajauch shuar amukarmataiṉkia péṉker aents ainia nu káwenawai.