Neka. 27 - Yus Papí: Shuarja̱i̱ Yus Yamaram Chicham Najanamu

Ii urukua átiniaitiajⁱ nuna nekatai̱ jintinkratma

¹ Ántram “eem tímiatruattajai” tiip. Warí kashin átatna nuka ámeka nékatsme.

² Amek shiir awajmamsaip antsu chíkich shuar “nuka péṉkeraiti” turamarti.

³ Kayasha tura naikmisha kijin áiniawai tura netsé kajetáiri̱ṉkia núna naṉkaamas kijiniaiti.

⁴ Suir kaje̱ntkamuka emesmawiti tura akasmaktiniasha ¿yaki katsuntraint?

⁵ Ú̱kar aneatniuja̱i̱sha naṉkaamas nekas péṉkerka iisar paant chicharkatniua nuiti.

⁶ Ii nemasri̱ anaṉkrak shiir awajtana núja̱i̱ṉ nekas péṉkerka ii shiir awajtin amikrí̱ anentak asuttiana nuiti.

⁷ Yurumá ejemaruka yuminniak nakitiawai tura tsukamaka yapancha yuminia núnis nekapeawai.

⁸ Aents ni nuṉke̱ya̱ jiinkí̱ aya wekaikiní̱ ajawa nuka chiṉki yajá weak ni pasunke̱n enentáimtatsna núnisaiti.

⁹ Asuitisha tura kuṉkuin ukatmamkar shiir enentáimtsujik. Núnisaṉ ii amikri̱ shiir enentáiji̱a̱i̱ jintintramaj nusha ii enentái̱n waramtikiawai.

¹⁰ Ame amikrumsha tura apá amikrí̱sha peṉké ikiukip. Yatsumi je̱e̱n ame itiurchatrumji̱a̱i̱ peṉké weep. Ii yachi̱ jeachat pujana núja̱i̱sha naṉkaamas ii amikrí̱ṉkia péṉker yáiṉkratniuiti.

¹¹ Uchiru, neka atá. Túrakum winia waramtikrustatme. Núja̱i̱ṉkia yajauch túrutai̱ya̱ nunasha ayamprumaktatjai.

¹² Shuar péṉker enentáimniua nuka yajauchia nuna wainiak ú̱mprawai antsu péṉker enentáimkiachua nuka tuke wáitsatniunmaani̱ wéawai.

¹³ Nékashtai̱n wiki akikmatkatjai tusa tumashmataiya nuka pushiri̱ áitkiam juruktia. Tura nuwa̱ wáinchatain tumashmataiyana nuka ni wariri̱ ujutukta.

¹⁴ Aents ti káshik nantaki̱ ni írutramuri̱n nantainiachunak kakantar chichareakka yajauchiniam yumiṉnartatui.

¹⁵ Suir nekapin nuwa̱ nuka yumi yútakui makis kitiak ¿kanarchamnia ajachukait

¹⁶ núnisaṉ nase emetamniakait tura asuitisha untsuur uwejja̱i̱ weṉkukminkiait? Nú nuwa̱ka núnisaiti.

¹⁷ Jirusha mái̱ jiruk atsaknatsuk. Núnisaṉ aentska nuamtak aentsuk péṉker jintinniáiyamniaiti.

¹⁸ Arakan péṉker wáinniua nuka ni nere̱n yuáttawai. Núnisaṉ ni uuntri̱ wakeramuri̱n umía nuka shiir awajnástatui.

¹⁹ Jimiará aents métek anturnaiya nuka entsá iis ni yapí wáinmamna núnisaiti.

²⁰ Jaka matsamtainmasha tura tuṉkuruánmasha pímiatsna núnisaṉ aents iisa wakerutairi̱sha náṉkatkachuiti.

²¹ Nekas kuítiashit tura kuríashit tusa unuitiai̱niam nekapkamsar íistinia núnis aentsun chíkich aents shiir awajeana nui̱ paant nekanniuiti.

²² Nétsea nuka arus ijiutai̱niam arusja̱i̱ métek eṉkear ijiurmasha netse enentáimtairi̱nkia peṉké iniaisashtatui.

²³ Ame murikrumsha tura waakarme̱sha péṉker enentáimtusam wáinkiata.

²⁴ Kuítriniatniusha tura akupin átincha túkeka áchartiniaiti.

²⁵ Sa̱a̱k táasa̱i̱ṉ tusam núkap takarsatniuitme túram iwiartukim wétiniaitme.

²⁶ Nuiṉkia ame murikrumi ure̱ja̱i̱ entsatái̱sha najanattame tura chipiu kuítri̱ji̱a̱i̱ṉkia nuṉka sumarmaktatme.

²⁷ Tura chipiu muntsurí̱ṉkia amesha tura uchirmesha núnisaṉ takartámniusha je̱e̱min pujuinia nu umarartiniaiti.