Neka. 26 - Yus Papí: Shuarja̱i̱ Yus Yamaram Chicham Najanamu

¹ Esatái̱ micha kakeana ántsaṉ juwamunam yumi yútana núnisaiti shuar nétsea nu péṉker enentáimtustiṉkia.

² Shuírpip tura chinimpⁱ atú we ju̱ní̱ we ajakush tui̱ wea nuna nékatsui. Núnisaṉ shuar peṉké antrar yajauchiji̱a̱i̱ yumiṉkramuka yúmiṉᵏⁱ jearchaiti.

Nekatai̱ jintinkratma netsenu

³ Kawaikia nuapja̱i̱ asuttiainti. Umpuruka wenunam jiruja̱i̱ áptainti. Tura nétseka numiji̱a̱i̱ asuttiainti.

⁴ Nétsea nu ámin áujtamkui ni tana nuja̱i̱ métek ai̱kiaip. Túmakmeka niji̱a̱i̱ métek ajastatme.

⁵ Wi imiá nékaitjiai tu enentáimtumasa̱i̱ṉ tusam nétsea nuka waritia chicharkamniait nuja̱i̱ métek ai̱ktá.

⁶ Shuar netseja̱i̱ atakmasar akupkatniuka nawe̱nam awatmamtiniana tura tséas umartinia núnisaiti.

⁷ Netse nekatai̱n jintinkiartin chichamja̱i̱ chichaamuka shutuapa makui̱ ántar ana núnisaiti.

⁸ Shuar nétsea nuna shiir awajea nuka kaya naṉkimtai̱ji̱a̱i̱ jiṉkiá naṉkimna núnisaiti.

⁹ Nampekú uwejnum jaṉkin meseana núnisaiti shuar nétsea nu neka núnis métektaku chichamja̱i̱ chichaakka.

¹⁰ Netse tura aya wékainia nuna winí̱ takakmaitia tusa takatan súakka shuar tíshimkiuja̱i̱ eketak ashí aentsun íjiuana áintsaiti.

¹¹ Ya̱wa̱sha iyak awaiṉki̱ yúatsuk, nétsea nusha yajauchin awaṉki̱ awaiṉkin túrakka núniskete.

¹² Shuar nékaitjiai tu enentáimtumawa nu ¿wáiniukaitiam? Túrasha nétsea núnaka níji̱a̱i̱sha naṉkaamas yapaji̱ámniari̱ awai.

Nekatai̱ jintinkratma nakiniu

¹³ Nakia nuka úunt ya̱wa̱ jintiá nákamui tura a̱a̱sha wekaawai tíniuiti.

¹⁴ Waiti ekenmia uram mai̱ áyanta ajana nuja̱i̱ métek nakia nuka peakri̱n tepes mai̱ áyanta ajá tepenaiti.

¹⁵ Nakia nuka piniṉnumia̱n jusasha yuátaj tukamá tujiniuiti.

¹⁶ Nakia nu ní enentáimtumaska siati neka ainia núnaka naṉkaaka enentáimtumaiti.

Nekatai̱ jintinkratma tsanumniunu

¹⁷ Shuar nisháa tunainian pachintinkia ya̱wá̱ kuishnium achikiar takuitniua núnisaiti.

^18-19 Waurka nu maṉkartuattsa naṉkin tura jinia naṉkimna nuja̱i̱ métekete shuar ni amikri̱n anaṉka “auka wasursan tájame” tiniua nuka.

²⁰ Kapa̱ji̱ iṉkiuarchamka ji kajinniuiti. Núnisaṉ áujmatkartin atsakuiṉkia nemasmanaiktincha atsawai.

²¹ Jinia kaí̱ri̱ṉkia kapa̱i̱chukait tura chíṉkimkia kéchukait nuja̱i̱ métekete aents katsumnaik itiurchatan najanniua nuka.

²² Tsanumniu chichame̱ṉka yuminiaiti túmaitiat enentáin iniajmawai.

²³ Anturú ajamai chichatnaka chichayat yajauch awajtústaj tú enentáiji̱a̱i̱ chichana nuka muits jakukuitiat pátatek ipiakja̱i̱ péṉker yakarma núnisaiti.

²⁴ Kajena nuka áujmatkartusiat chichascha tímiatrus pujuwiti. Tuma nuka ni enentái̱nkia anaṉkartuattsa yajauch chichaman najanniuiti.

²⁵ Kame anturú ajamai chichartamkuisha “nekasapi túrutua” tiip. Ni enentái̱ṉkia ti yajauch piákuiti.

²⁶ Ni suir enentáimkiartutairi̱n u̱a̱ksha ni yajauchiri̱ṉkia ashí iruntramunam paant awajnástatui.

²⁷ Aents wa̱a̱n tawa nuka ímia niṉki akaikí̱ iniaawai núnisaṉ kayan akaṉkéa nuka niṉki nekemaktatui.

²⁸ Tsanumniua nuka chikichan áujmatuk wáitkiawai tura wáitkiana nuna muí̱jiawai núnisaṉ ántar péṉker chichana nuka ashí emesmawai.