Neka. 24 - Yus Papí: Shuarja̱i̱ Yus Yamaram Chicham Najanamu

-19-

¹ Yajauch túruinia nuja̱i̱ métek ajastaj tiip. Tura núja̱i̱sha iruntratin wakerukaip.

² Ni enentái̱nkia aya yájauchiniak túrachminian túratniun enentáimin áiniawai túmainiak yajauch ainia nunak áujmatin áiniawai.

-20-

³ Aya nékamuja̱i̱ṉ je̱a̱sha je̱a̱mnatsuk tura péṉker enentáimturmaja̱i̱ pauri̱sha kaki ukuneatsuk.

⁴ Núnisaṉ nékamuja̱i̱ṉ je̱á̱ init tesarmánum ashí péṉker shíirmach íi ajamai áiniana nuja̱i̱ piákuiti.

-21-

⁵ Neka nuka kakarmaja̱i̱sha naṉkaamasaiti núnisaṉ neka ajastinkia kakaram átinji̱a̱i̱ naṉkaamasaiti.

⁶ Tuma asamtai mesetnasha chichaman péṉker júsar najanainiawai tura untsurí chichamprukmaja̱i̱ nupetmatainti.

-22-

⁷ Nétsea nuka neka ajastinian jeachminiaiti tuma asa pepru wá̱i̱ti̱a̱i̱niam chichaktinian jeatsui.

-23-

⁸ Aya emesmaktinian enentáimniua nuka “aya yájauchiniak enentáimniuiti” tunattawai.

⁹ Tura nétsea nuna enentáimtairi̱ṉkia tunaiti núnisaṉ yajauch shuara túrutairi̱ṉkia muí̱jmiainti.

-24-

¹⁰ Itiurchat ana nui̱ kakarmachuitkiumka nuja̱i̱ paant nekanattame.

-25-

¹¹ Jákatniunam jukimiu ainia nu aṉkant awajsarta núnisaṉ jákatniunam sumamtikiamu ainia nusha uwemtikrarta.

¹² “Iikia nekaachmaji” tu tákumnisha enentáin neka nuka áminkia ¿nekarmashtatuak? Ame wakanmin wainia nuka ¿nekashtatuak? Túrak ame túramna nuja̱i̱ métek ¿akirmákchattawak? Rum. 2:6

-26-

¹³ Uchiru míshik tí peṉker asamtai yuátá. Warí chinirí̱sha yumin asa yúu ajatchakait.

¹⁴ Ame wakanim nekatai̱n yuminia núnisaṉ nekaprattawai. Nu nekatai̱ wainkiamka ukunam péṉker pujustatme tura ame nekas enentáimtamna nusha wainkiattame.

-27-

¹⁵ Péṉker shuara nu peṉké ántram chícham jurusaip túram ni je̱e̱sha emesturaip.

¹⁶ Kame péṉkera túrin ainia nuka inia íniaku̱a̱ siati ejesha ataksha tímiatrusaṉ nantaktiatui antsu yajauch shuar ainia nuka wáitsatniunam iniarartatui.

-28-

¹⁷ Ame nemasrum itiurchatnum pujakui wararsaip núnisaṉ tukumak iniarmataisha shiir enentáimsaip.

¹⁸ Warí Uunt Yus nuna wainkiaṉka shiir enentáimsashtatui antsu nui̱ṉkia ninkia kajerkashtatui.

-29-

¹⁹ Yajauch shuar ainia nu kajerkaip tura áintsamek ni pujuinia nui̱sha pachinkiaip.

²⁰ Warí yajauch shuarka tuke péṉker pujustinian wáinkiachartatui tuma ásar ni iwiaakmari̱ṉkia shirikpia núnis kajinkiattawai.

-30-

²¹ Uchiru, Uunt Yussha núnismek úunt akupniusha umirkata tura chichaman mái̱ yapaji̱ ajá ainia núja̱i̱sha tsaniṉkiaip.

²² Kame aya aneachma ti itiurchatja̱i̱ wáitias pujusártatui. Warí Úunt Yusnancha tura úunt akupniu asutkiari̱ncha ¿yaki nekaat? Tuma ásar yajauch shuarka Uunt Yus asutiámji títinian peṉké nékainiatsui.

Ti neka chikichnasha jintíamu

²³ Ju̱sha núnisaṉ ti neka ainia nuna chichame̱nte. Uunt akupin eketainia nui̱ aents métekcha enentáimturtinkia nekas péṉkerchaiti.

²⁴ Akupin yajauch shuaran “ámeka péṉkeraitme” tákuiṉkia nuiṉkia ashí shuar yajauchiji̱a̱i̱ yumiṉkrartatui tura chíkich nuṉkanmaya̱sha nú akupniun muí̱jkiartatui.

²⁵ Antsu eserat tusa chicharea nuka wararnastatui. Warí, nuna túruinia ásar nu aentska péṉker pujutnum yumiṉnarartatui.

²⁶ Péṉker chichamja̱i̱ aimna nuka shiir anturú ajamainti.

²⁷ Takatrum iwiarkata núnismek nuṉkemíncha takakmasta túram nuya̱ṉka je̱a̱ je̱a̱mprumta.

²⁸ Ame írutkamuram nekascha nuja̱i̱ ántram tsanumpruraip tura nekascha nuja̱i̱ anaṉkawaip.

²⁹ Ni itiurtukma nuja̱i̱ métek nincha túratjai tiip. Tura warí itiurtukma áitkiasnak yapajkiataj tu enentáimsaip.

³⁰ Nui̱k nakia nuna nuṉke̱ni̱ naṉkaamakmiajai tura enentáincha ajarí̱n íirkutak támajai.

³¹ Tura aya jáṉkik narak nupa̱k awamai tura wenukesha sa̱a̱narun wainkiamjai.

³² Wi nuna iisan winia enentái̱rja̱i̱ enentáimsamjai. Túran nuna iisan unuimiátramjai.

³³ Atamprusam kánakum mesekramu tepamin tura miniakmamsam péṉker kanú pujamin

³⁴ ame atsumkarmesha yaitias winitrámtiatui tura kuítrincha juáktinkia mesetja̱i̱ wininiana áinis arutmáttawai.