Neka. 21 - Yus Papí: Shuarja̱i̱ Yus Yamaram Chicham Najanamu

¹ Uunt Yuska akupniu enentái̱nkia entsa akatai̱ya̱ áitkiaraiti. Tuma asa Ni wakera núnaka tímiatrusaṉ umimtikniuiti.

² Shuar ni íimiaskeka ashí wi túrajna nu péṉkeraiti tu enentáimtumaiti túrasha tu enentáimiari̱ṉkia Uunt Yus sumamtikiui.

³ Nákak wekaak tura péṉker enentái takustinia nuna Uunt Yus ti shiir wakerawai waaka maar áestuatniua nuna naṉkaamas.

⁴ Waantu enentáiji̱a̱i̱ íimsatin tura waantu enentáimtumastincha tunaiti. Kame Yusan enentáimtichuka nuní̱ enentáimin áiniawai.

⁵ Shuar emka péṉker enentáimtur takakmana nuka núkap wáitmaiti tura wáurtus waitmaktaj tiniu ainia nuka kuítrincha ajáu áiniawai.

⁶ Jákatniun e̱a̱iniana nuka tura waitruar kuit ikiauṉkatniuka yuraṉkim utsantran etsa̱ sukuá emeṉká ántsaiti.

⁷ Péṉkera nuna túratniun nakitín ásar Yusan enentáimtichu peṉké túrachminian túruiniak imiá niṉki yajauch awajmamainiawai.

⁸ Yajauch shuar ainia nuna túrutairi̱ṉkia jintia tuníarua núnisaiti tura péṉker shuar ainia nuna túrutairi̱ṉkia jintia naka tímiatrusaiti.

⁹ Kajen nuwa̱ nuja̱i̱ je̱a̱ iwiaramunam pujustinkia péṉkerchaiti antsu yajauch je̱a̱nam pujustin imiá péṉkeraiti.

¹⁰ Shuar yajauchia nuka aya yájauchiniak enentáimniuiti tuma asa ní shuari̱sha yájauchik íismaiti.

¹¹ Shuar yajauchia nu asutniámtaiṉkia uchi enentáinniuka nuna iisar ashamkarti tura shuar ti neka nuka chicharkamka antuk unuimiawai.

¹² Péṉkera túrinkia Yusan umirkacharu ni yajauch túramuri̱n itiur émesea nuna paant wainiui.

¹³ Shuar kuítrincha “yaintkiai” támaitiat anturchaka nisha ukunam “yaintkiai” tusa seameakui peṉké umirnakchattawai.

¹⁴ Shuar ti kajena nusha ú̱kar ántrar súsatniua núja̱i̱ṉkia tsaṉkuawai. Wariṉsha súakur íshishmasrik susamka shiir enentáimiui.

¹⁵ Péṉkeran túruiniak umiinia nuka ti warainiawai antsu yajauch shuarka péṉkeran túruinia nuna mash mesertatui tu enentáimtuiniawai.

¹⁶ Shuar esetar wekasatniun enentáimchaka jakaaja̱i̱ irunar matsamsatniuiti.

¹⁷ Shuar aya wárastinniak pujurniuka kuítrincha átatui. Nákikia aya námpetnak pujurin asa peṉké kuítriniashtatui.

¹⁸ Wáitrin tura yajauchin túrinia nu asutniakui péṉkera túrinkia aṉkant awajnástatui.

¹⁹ Suírintin nuwa̱ja̱i̱ tsaniṉkia pujustinji̱a̱i̱ṉkia naṉkaamas atsamunam iik pujustin imiá péṉkeraiti.

²⁰ Péṉker shuara je̱e̱ṉkia kuitcha warirí̱sha írunui tura shuar nétsea nuka ni takurmakmancha ashí amúawai.

²¹ Péṉker enentáimtai̱ji̱a̱i̱ wekaana nuka tura naka túrana nusha iwiaakmancha tura métek ayamprúk péṉker wainkiamuncha nuyá̱ shiir awajnástinniasha wainkiattawai.

²² Shuar ti neka nuka ni nékamuja̱i̱ írutkamuri̱n emesratniun jeawai tura nekas kakarmaitjiai tauncha nékamuja̱i̱ṉkia nupetkamniaiti.

²³ Shuar émkak enentáimiar chichaana nuka kúntuts enentáimias pujuschattawai.

²⁴ Nekaska witsukaitjia naṉkamantunka tu enentáimtumaka wishikkiartin “netse” tutainti.

^25-26 Shuar nákikia aya wakeriniaiti túmak takakmastinniasha enentáimcha asa ni wakeramuri̱n takustaj tu enentáimiuk tsawant takamtsuk jata nekapniuiti tura antsu ásumpkia takakmas surimtsuk ajamasminiaiti.

²⁷ Yusan enentáimtichua nu Yus áestuamu Yúsja̱i̱ṉkia muí̱jmiainti. Kame yajauch enentáiji̱a̱i̱ súamua nuka nuna naṉkaamas yajauchiti.

²⁸ Shuar wáitrinia nuka jákartatui antsu aents emka antuktinian nekáa pachimtsuk chichastatui.

²⁹ Shuar Yusan enentáimtichua nuka kajemtin íirkaiti antsu péṉkerka naka enentáimias wekainiaiti.

³⁰ Nekatai̱ji̱a̱i̱sha tura enentáimtai̱ji̱a̱i̱sha núnisaṉ chichamja̱i̱sha Uunt Yuska peṉké itiurkachminiaiti.

³¹ Suntarsha mesetnum mánaiktaj tusa ni kawairi̱n íwiareawai túrasha aya Yusak ni nemasri̱n awakatniun tsaṉkatkattawai.