Neka. 20 - Yus Papí: Shuarja̱i̱ Yus Yamaram Chicham Najanamu

¹ Wíniuka wishikmai awajkartiniaiti. Tura awartiuka wáurmamtikiartiniaiti. Tura nuja̱i̱ nampenka nékachu ajawiti.

² Úunt akupniu kajetái̱ri̱nkia úunt ya̱wa̱ ashamái̱ chichana núnisaiti tuma asa ákajeana nuka niṉki yajauch awajmámniuiti.

³ Mániktai támaitiat ikiuaka arantútai ajawiti. Antsu nétseka aya mánaitniak wakeriniaiti.

⁴ Nakia nuka takakmastin ai̱ṉ takakmatsui tura júuktaj tákusha peṉké wáinkiashtatui.

⁵ Aentsu enentáimmiari̱ entsa kuna ímianaitkiuisha enentáimniuka tímianunak ejetuamniaiti.

⁶ Untsurí aents ántuiniamunam “péṉker waitnenkartiniaitjiai” tuíniakuisha nekas chichamtinniasha ¿yaki wainkiamniait?

⁷ Péṉker enentáimniuka naka wekainiaiti tuma asa ni uchirí̱sha shiir awajsamu ártatui.

⁸ Sumamtikiur pujutái̱ri̱n úunt akupin pujakka aya íimmiari̱ji̱a̱i̱ṉ ashí yajauchia núnaka nekamniaiti.

⁹ ¿Yaki wikia peṉké tunaarinchaitjiai tura winia enentái̱rka ti péṉkeraiti tiint?

¹⁰ Kijin nekapmatai̱ tura esantí nekapmatai̱sha métekcha ainia nuna Uunt Yuska mai̱ muí̱jiainiawai.

¹¹ Peṉké uchichisha imiatkincha tura naka enentáimniuka ni túramuri̱ji̱a̱i̱ paant nékanui.

¹² Kuíshja̱i̱ṉkia antutainti tura jí̱ji̱a̱i̱ṉkia íimtainti. Núnaka mái̱ metek Uunt Yus najankaiti.

¹³ Aya kánin aip. Shintiaram takakmasta túrakmeka taramkattame.

¹⁴ Súmana nu chichaak “timiá yajauchitia” tinia ikiukí̱ wesa niṉki shiir awajmamui.

¹⁵ Péṉker enentáimkia ainia nuna chichame̱ṉka ju̱ nuṉkanam kuri tura shíirmach kaya irunainiana núja̱i̱ṉkia naṉkamakuiti.

¹⁶ Nékashtai̱n wi akikmatkatjai tusa tumashmataiya nuka pushiri̱ áitkiam juruktia tura wáinchatai ainia nuna tumashmataiya nusha akikmaamam ni warirí̱ṉsha ujutukta.

¹⁷ Aentsu wáitri̱ṉkia yurumak yuu ajata tímianisaiti. Túmaitiat ni wene̱ṉkia naikim tsarirpátniun áimiak apakua núnisaiti.

¹⁸ Iruntrar chichamprukmaja̱i̱ takatcha ímiatrusaṉ uminniuiti. Núnisaṉ péṉker enentáimturam anearmaja̱i̱ mesetcha najanata.

¹⁹ Chíkich nekashtinia nu ujakmasha tsanumniuka ú̱chuiti. Tuma asamtai tsanumin ainia nui̱ṉkia pachinkiaip.

²⁰ Ni aparí̱n nukurí̱ncha yajauchiniam yúmiṉkia núnaka ni iwiaakmari̱n jurukí̱ kirit téenam apujsattawai.

²¹ Kuítrintin wáurtus ajakka nú kuitkia ukunmasha péṉker pujutnumaani̱ yumiṉkramu áchattui.

²² “Wikia yapajmiáktájai” tiip antsu Uunt Yus niṉki nákasta. Túram uwemtikramprattawai.

²³ Kijin nekapmatai̱ métekcha ainia nuka Úunt Yusja̱i̱ṉkia mui̱jmiai̱ áiniawai núnisaṉ kijin nekapmatai̱ji̱a̱i̱ anaṉmar suruktincha péṉkerchaiti.

²⁴ Úunt Yusak aents wekasatniunka iwiarturuiti. Nuíchuka Yusja̱i̱ wekasatniuncha aentssha ¿itiurak nekatⁱ?

²⁵ Aents enentáimtsuk “Yúsnaiti” tusa susayat awake enentáimna nuka peṉké itiurchatnum sumamaiti.

²⁶ Akupin nékaka ashí yajauch ainia nuna arant akupniuiti. Túrayat nu arant kijin awaṉkar akaṉkékní̱ awajtinia núnis túriniaiti.

²⁷ Yusak aentsu wakaní̱ncha súsaiti tura wakankia tsáapniniaiti tuma asa aentsu ashí enentáimiari̱ncha paant awajtiniaiti.

²⁸ Úunt akupniusha nekasa nuja̱i̱ métek tímiatrus waitneṉkratamuja̱i̱ uminiaitkiuṉka tuke akupú pujuwiti.

²⁹ Nátsaka wari áwiti tura úuntchikia jemperuru ásar enentáimiat arantumain áiniawai.

³⁰ Aents yajauchia nuka asutiár numpamkamuja̱i̱ péṉker enentáimtikramniaiti tura asutkiaka enentáin péṉker awajniuiti.