Neka. 19 - Yus Papí: Shuarja̱i̱ Yus Yamaram Chicham Najanamu

¹ Shuar kuítrincha ákusha esetar enentáimniuka, netse tsanumniuja̱i̱ naṉkaamas péṉkeraiti.

² Núnisaṉ nékatsuk wariṉkish túratniuka péṉkerchaiti tura wáurtus túrincha yajauchin íṉkiuawai.

³ Aentska ni nékashtairi̱ji̱a̱i̱ṉ yajauch wekainiaiti. Tura íksaṉ Uunt Yusan ni enentái̱ji̱a̱i̱ṉ makuwaiti.

⁴ Kuitkia untsurí amikrintin awajkartiniaiti tura kuítrinchanka ní shuarsha ikiuiniawai.

⁵ Shuar nekas nékachiat chichawa nuka asutniátskeka iniainiáschattui núnisaṉ wáitrincha peṉké uwemprashtatui.

⁶ Shuar tsaṉka núnaka untsurí shuar e̱a̱iniawai tura sutai ásar aṉkant aṉkant ni amikri̱ áiniawai.

⁷ Kuítrinchanka imia ni yachi̱sha nakitiáiniamunmasha ¿itiurak ni amikrí̱sha ajapa ikiukcharat? Túramusha ¿yája̱i̱ṉ chichastaj tákusha chichasat?

⁸ Esetar antuk nekáa asa ni iwiaakmari̱ncha péṉker wáinniuiti. Túmak péṉkera nuna wainkiattawai.

⁹ Shuar nékasa nuna nékachiat nekascha chichawa nuka asutniátskeka iniainiáschattui núnisaṉ wáitrinkia jákatniuiti.

¹⁰ Netse iwiaramunam pujustinkia péṉkerchaiti. Nuja̱i̱ naṉkaamas yajauchiti takarin ni úuntri̱n akupin ajastin.

¹¹ Shuar péṉker enentáimkia nuka kajektinniasha katsuntniuiti tura kajeramsha ni páantniuri̱ji̱a̱i̱ páchichuiti.

¹² Uunt akupniu kajetáiri̱ṉkia úunt ya̱wa̱ kajeana ántsaiti tura ni waitnenkartutairi̱ṉkia sana nupa̱n ukatna núnisaiti.

¹³ Yajauch uchia nuka ni aparí̱n wáitkiawiti tura nuwa̱ kajenka makis tuke kitiatáiniam pujustinia núnisaiti.

¹⁴ Kuítniasha je̱a̱ncha apa ni uchirí̱n súwiti antsu nuwa̱ péṉker enentáimkiaka Yusai̱ya̱iti.

¹⁵ Shuar nakia nuka je̱á̱ aya tépenaiti. Ni tumas tsukái wáitniuiti.

¹⁶ Akupkámu chichaman umía nuka ni wakaní̱n wainiui tura nuna nakitniuka jákatniuiti.

¹⁷ Kuítrinchan sua nuka Uunt Yusan íkiawai tura asamtai Uunt Yus patatas awaṉtuktiatui.

¹⁸ Ame uchiram uchichia nui̱ṉ asutiáta túrasha waurtukmaja̱i̱ṉkia emesra̱i̱j tu enentáimsam túrata.

¹⁹ Shuar tí kajena nuka asutniátniuiti tura asutiámnia auk ayampramka nú arant ajawiti.

²⁰ Shuar chichartamainiakuisha péṉker anturkata tura eseetamprataj turamainiakuisha umirkata. Nu túrakmeka úuntach ajasmesha enentáimin átatme.

²¹ Aentska ni túratta nuna ti enentáimtiniaiti. Túrasha aya Uunt Yusa wakeramuri̱ṉ uminniuiti.

²² Waitneṉkratai̱ṉkia aentsun waramtikiui. Antsu waitrinji̱a̱i̱ṉkia kuítrincha átin péṉkeraiti.

²³ Uunt Yus ashamamuka iwiaaku pujustinnium jukartawai. Tura aents aya núja̱i̱ṉ yajauchisha itit awajsachma ayamar pujustatui.

²⁴ Shuar nakia nuka piniṉnumia̱n uyu̱á jusa apaatniuṉkesha jeachuiti.

²⁵ Wishikkiartin ainia awatnármaja̱i̱ uchi enentáinkia ainia nusha nuna iisar enentáimprartatui. Tura péṉker enentáimkia nu jintintiámka nuna núkap nekaattawai.

²⁶ Aparí̱n kasareak tura nukurí̱ncha ji̱i̱ki̱ akupniúka uchi aparí̱n natsanmai̱ tura áujmattai̱ awajniuiti.

²⁷ Uchiru, jintinkratai̱ nekatai̱nmaya̱ akantámkimia nuka anturkaip.

²⁸ Shuar wáitrinia nuka nekasa nuna wishiknuiti tura Yusan enentáimtichuka yajauch túramun ú̱witi.

²⁹ Wishikkiartin ainia nu sumamtikiatniuka iwiarturma áiniawai tura shuar netse ainia nusha awatnarartiniaiti.