Neka. 18 - Yus Papí: Shuarja̱i̱ Yus Yamaram Chicham Najanamu

¹ Níniunak enentáimniuka ni írutramuri̱ enentáimmian páchitsuk aya ní wakeramunak umirtukarat tusa enentáimtumas chíkich enentáimias chichainiamun emestiniaiti.

² Nétsea nuka unuimiártinniasha wakerichuiti. Tura ni nékana núja̱i̱ṉ neka ímianu enentáimtumaiti.

³ Yajauchia nuja̱i̱ natsanmai̱ ajatainti núnisaṉ naṉkamantu enentáimtumatai̱ji̱a̱i̱ṉkia arantúkma áchatainti.

⁴ Aentsu chichame̱ṉka entsa kuna tímianuiti tura nekatai̱ṉkia ashints waana núnisaiti.

⁵ Sumamtikin ainia nu umitmakua nuna waitnentak íksaṉ umikmatchan súmamtikiuṉka péṉkerchaiti.

⁶ Nétsea nuna chichame̱ṉka aya mámtikniuiti tura ni chichame̱ja̱i̱ṉ asutniáwiti.

⁷ Nétsea nuka ni chichame̱ja̱i̱ṉ emestumawiti túmak chapikji̱a̱i̱ suénam jiṉkiama pujana núnisaiti.

⁸ Tsanumniu chichame̱ṉka yuminia núnisaiti túmaitiat enentáin iniajmawiti.

⁹ Núnisaṉ nakimshim takakma ainia nuka emesma yáchi̱nti.

¹⁰ Uunt Yusa náari̱ṉkia kayaja̱i̱ je̱a̱mma núnisaiti tura péṉker enentáimkia ainia nuka Niin uwemprattsa weanainiawai.

¹¹ Kuítrinniua nuka ní kuitri̱ṉ pepru wenuimiu yakí̱ tanishmarma pujana tímianu enentáimtiniaiti.

¹² Emeskamnia nuka emka waantu enentáimtumatainmaya̱iti tura shuar péejchachia nuna Yus páantin awajsattawai.

¹³ Ántutsuk chichawa nuka netse asa natsantmai ajawiti.

¹⁴ Shuar jaaksha ni enentái̱n shiir nekapeak suṉkuran katsunniuiti antsu ti kúntuts nekapeakka ¿itiurak katsuntratiṉ?

¹⁵ Ti enentáimniuka unuimiáki̱ wétinian wakeriniaiti tura nékaka antukmaja̱i̱ unuimiawiti.

¹⁶ Shuar wariṉkísha ántar sukarta nuka nu túramuja̱i̱ ni shiir ajatairi̱ji̱a̱i̱ páantin nákam awajnastatui.

¹⁷ Ni itiurchatri̱n niá niá ayamprumana nuka péṉkeran túrinia núnis ajawiti. Túmaitiat nemasri̱ taa ni wáitramuri̱n paant awajtiniaiti.

¹⁸ Aents kakaram áiniaksha tura itiurchat pujuinia nusha yaki awakmakat tusa nakurúsar itiurchatnaka iwiaratin áiniawai.

¹⁹ Shuar ni yachi̱ji̱a̱i̱ kajernaikia nu nawamnaikiachmin asa uunt pepru kayaja̱i̱ tanishmarma wajana núniniaiti tura ni suíri̱sha jiru wáitiji̱a̱i̱ epenmia núnisaiti.

²⁰ Péṉker jintinkiartinia nuka yurumá ejemar warana áintsaiti. Tura ni chichame̱n nerektatna nuna nútsurtatui.

²¹ Ii chichame̱ṉ jákatniunam tura iwiaaku átinniumsha jurukminiaiti. Tura tí chicháa nuka chichas túramuja̱i̱ métek yajauchincha tura péṉkernasha wainkiattawai.

²² Nuatea nuka péṉkera nuna wainiui tura Uunt Yusa waitnenkartutairi̱n wáinkiaiti.

²³ Kuítrinchaka péejchach ajas yainkiai tusa seamniuiti antsu kuítrinnua nuka kakarmaja̱i̱ áimniuiti.

²⁴ Untsurí amikri̱nniuitkiursha itiurchatnum ejekartin ainia nusha nekaamnia áiniawai. Túrasha yachiji̱a̱i̱sha naṉkaamas ii nekas amikri̱ awai.