Neka. 17 - Yus Papí: Shuarja̱i̱ Yus Yamaram Chicham Najanamu

¹ Nampernum kajernaishim yurumin ainia núja̱i̱sha naṉkaamas aya ápatkuk yúakri̱sha shiir aṉkant pujustinia nuiti naṉkamantuka.

² Uchi ni aparí̱n natsanmai̱ awajna núnaka iniatairi̱n esetar takaana nuka akupkáttawai. Tura ashí ni uchirí̱ji̱a̱i̱ métek aparí̱ warirí̱n nuamtak nakarnáiniakuisha iniatai̱sha sunastin átatui.

³ Kurincha kuítniasha jinium unuiniawai aya péṉkeri̱n juákat tusa. Núnisaṉ Uunt Yuska shuara enentáimmiari̱n nekapkamas íiniaiti.

⁴ Yajauch shuar tura wáitrin ainia nuka yajauch chichaman anturin áiniawai.

⁵ Shuar kuítrinchan wishikiana nuka Uunt Yusan wishikiawai. Tuma asamtai kuítrinchan wishikiainiak warainia nu shuarka páchitsuk asutniáwartatui.

⁶ Úuntach ajasúka tiraṉkrumka asa shiir enentáimniuiti tura úchikia ni aparí̱n shiir awajsamuiti.

⁷ Shuar ti yajauchia nu nekas chichama nuna tití tusar nákaschatniuiti tura úunt akupniun waitri̱sha nu naṉkaamas yajauchichukait.

⁸ Shuar anaṉma emesmaktinian unuimiátainia nu, shíirmach kaya tímianu enentáimtuiniawai. Tura nuna túruinia nuja̱i̱ ikiauntumainiawai.

⁹ Yajauch túramtaisha etsertunaichuka tuke shiir nawamnaikiar pujuwiti. Antsu yajauch túramtai etsertinkia ni amikrí̱ya̱ kanawiti.

¹⁰ Shuar enentáimniuka chíchamnak ántiniaiti. Antsu nétsea nuka naṉkaamas asutramsha peṉké ántichuiti.

¹¹ Shuar yajauchia nuka péṉkera nuna e̱a̱tsuk antsu aya yajauchiniak pujurniuiti. Nuna túriṉkia nisha nútiksarmek túratarum timia átiniaiti.

¹² Shuar enentáinchajai iṉkiukatniuka chai̱ uchirí̱ jurukmiája̱i̱sha naṉkaamas yajauchiti.

¹³ Péṉker enentáimtamaitiat yajauch enentáimkiartiṉkia ni je̱e̱ncha tuke núnisaṉ pujú átatui.

¹⁴ Yajauch shuar kajernaik jiania nuka entsa pajankam piak metsana áintsaiti tuma asamtai nú arant kajernaiki̱a̱i̱j tusarum iniaisatarum.

¹⁵ Yajauch shuaran “péṉkeraitme” tuíniak péṉker shuaran makuiniana nuka Úunt Yusja̱i̱ṉkia mái̱ mui̱jmiainti.

¹⁶ Enentáimchasha nekas enentái̱ji̱a̱i̱ unuimiártaj táchasha akikmaksha ¿itiur unuimiártiṉ imiá nékachusha?

¹⁷ Amikrí̱ṉkia tuke aneṉkratniuiti. Antsu yátsutka kúntuts pujakrin shiir awajkartustinian akiinniuiti.

¹⁸ Shuar imian enentáimchaka amikrí̱ tumashri̱n akikmatak atak íksaṉ tumashmanaik pujuwiti.

¹⁹ Shuar mánitian wakerinia nuka tunáa túratniun jikiatniuiti. Tura waantu enentáimtuma nuka emestumaktinian e̱a̱witi.

²⁰ Shuar aya yájauchiniak enentáimniuka péṉkera nuna peṉké wáinkiashtatui. Tura ni chichame̱nak pachimniuka yajauchiniam iniartatui.

²¹ Apa uchi enentáimchan yajutmarua nuka kúntuts awajeam wáitniuiti. Tura uchi nétsea nuna aparí̱ṉkia warachuiti.

²² Enentai warakuiṉkia péṉker tsuaka núnisaiti tura kúntuts enentáimmiaka aya̱shniasha jaa awajniuiti.

²³ Yusan enentáimtichuka naka jintian emeskat tusa ú̱srik akikia útsuamka “ayu” tíniuiti.

²⁴ Naka enentáimniuka nékaskea nuna tuke wainniui. Antsu nékachuka nuṉká náṉkatkamuri̱n yajá enentáimniuiti.

²⁵ Uchi nétsea nuka aparí̱n aya ákajniuiti. Núnisaṉ nukurí̱ncha tí waitkiawiti.

²⁶ Aents umitmákcha asutiátin nekas péṉkerchaiti. Núnisaṉ uuntri̱ ainia nusha péṉker túruiniá nékayatar katsumkatin yajauchiti.

²⁷ Shuar neka nuka chichaman wasurchaiti núnisaṉ enentáimniuka aya ántiniaiti.

²⁸ Aents nétsesha chichatsuk aya antú pujakka tí neka núnis enentáimtunui. Núnisaṉ aya antú pujaksha neka núnis enentáimtutainti.