Neka. 16 - Yus Papí: Shuarja̱i̱ Yus Yamaram Chicham Najanamu

¹ Aents ju̱na umiktatjai tusa ni enentái̱ji̱a̱i̱ṉ iwiarnuiti túrasha nekas uminkiattana nuka Úunt Yusai̱ya̱inti.

² Aents ni enentáimtumaska “tí peṉker túrajai” tu enentáimtumaiti túrasha núnaka Uunt Yus nekasashit tusa nekapma íiniaiti.

³ Ame takatrum Uunt Yus íktusta. Nu túrakmiṉkia ame enentáimsamurmesha nékaseṉ jintiurmattawai.

⁴ Uunt Yus ashí ni wakera nuja̱i̱ métek ashí uminkiati tusa najankaiti. Nu arantcha Nin enentáimtichu asutniátin tsawantcha jeartiniaiti.

⁵ Shuar naṉkamantu enentáimtumin ainia núnaka Uunt Yus nakitniuiti. Tuma asa asuttsuk iniaisashtatui.

⁶ Nekasa nuja̱i̱ tura waitnenkartutai̱ji̱a̱i̱ yajauch túrutai̱ tsaṉkuramuiti ántsaṉ aents Uunt Yusan ashamak yajauchinmaya̱ kanaawiti.

⁷ Uunt Yus iisam aents péṉker túrakuiṉkia ni nemasri̱n takakkuisha aṉkant awajniuiti.

⁸ Anaṉmar takakmasmaja̱i̱ núkap ikiauntumkamuja̱i̱ṉkia nékaskea nuja̱i̱ ishichik takustin imiá péṉkeraiti.

⁹ Aentska ni wakeramuri̱niak umiktaj tu enentáimniuiti. Antsu Uunt Yuska esetrar wekasatniun jintinniuiti.

¹⁰ Uunt Yus tana nuja̱i̱ métek akupniúsha umimtikniuiti tura náṉkamsaṉka sumamtikchaiti.

¹¹ Kijin nekapmatai̱ péṉkeraitkiuṉka nuka Yúsnaiti tuma asa nekapmatai̱ nekasketkuṉka Ni najankamu áiniawai.

¹² Uunt akupin yajauchin túrakka muí̱jmiainti. Antsu péṉker túrakka akupniúsha tuke kakaram ajas akupin átatui.

¹³ Shuar nekas enentáiji̱a̱i̱ chicháa núnaka úunt akupniusha anenaiti tura péṉker túrinniaka shiir enentáimtiniaiti.

¹⁴ Úunt akupniu kajetái̱ri̱ṉkia jákatin chichaman takakuiti tura neka ainia nuka atsaṉmamtiniaiti.

¹⁵ Úunt akupniu waratáiri̱ṉkia iwiaakma takakua áintsaiti. Tuma asa yumi arakan péṉker tsakatma núnisaiti.

¹⁶ Ti neka átinkia kuri wakerajnia nunasha naṉkaamasaiti. Tura enentáimin átinkia kuítji̱a̱i̱sha naṉkaamasaiti.

¹⁷ Naka enentáimkia ainia nuka yajauchia nuyá̱ kanakí̱ wekainiawai. Ni iwiaakmari̱n péṉker wainnia áintsaṉ ni jinti̱ncha péṉker wáinnuiti.

¹⁸ Waantu enentáimtumastiṉkia itiurchatnum jukartiniaiti. Tura naṉkamantu enentáimtumastiṉkia aya̱shniasha wakanniasha emesniuiti.

¹⁹ Waantu enentáimtuma ainia nu werir atankímiuri̱ akantúnairtinja̱i̱nkia, péejchachiji̱a̱i̱ métek imiancha enentáimtumastin imiá péṉkeraiti.

²⁰ Nekas chichaman ántinia nuka péṉkera nuna wáinkiatnuiti. Tura Uunt Yusan enentáimtus pujaaka ti warawiti.

²¹ Nékaka péṉker enentáimkiaiti nuyá̱ shiir chichamtiṉkia nuna núkap nekaattawai.

²² Shuar enentáimniua nuka púkuninmaya̱ entsa kitiakan imikniua núnisaiti. Antsu nétseka peṉké jintintiáchminiaiti.

²³ Neka chichame̱ṉka péṉker anturú ajamainti tura ánturusha “nekas tawai” tíniuiti.

²⁴ Péṉker shuara chichame̱ṉka mishkia núnisaiti. Tuma asa enentáinniasha aya̱shniasha shiir ayamtikniuiti.

²⁵ Aentsti péṉkertsuk túraja tu enentáimtai̱ awai. Túrasha jintia awajirar wekáa núnis enentáimtaiṉkia jákatniunam jeawai.

²⁶ Shuaran ní tsukari̱n takamtikiui tura takakmasat tusa utsúawai.

²⁷ Shuar yajauchia nuka ni chichame̱ja̱i̱ ni írutramuri̱n yajauch awajniuiti, ni chichame̱sha ji keá núnisaiti.

²⁸ Shuar wari kajena nuka aya mánaiktinniak e̱a̱witi tura tsanumniua nuka amikrí̱ncha natúpáiniaiti.

²⁹ Aents yajauchikia ní shuaran anaṉniuiti tura yajauch jintianmaani̱ júuwiti.

³⁰ Shuar yajauchin túrataj tusa enentáimna nuka ni ji̱n anu mitsuma íimniuiti tura ni wene̱ja̱i̱sha chúchutmasan ajawiti.

³¹ Péṉker enentáimias túrin asa we̱a̱mar jempée puju ajasúka arantúkmaiti.

³² Shuar kajetan katsunniuka kakarmancha naṉkakaiti. Tura iik nupetmamkatniuka untsurí nupetkatniuja̱i̱sha naṉkaamasaiti.

³³ Aents yaki awakmakat tusa nakuruiniakuisha aya Uunt Yusak awakmáktinniaka súwiti.