Neka. 15 - Yus Papí: Shuarja̱i̱ Yus Yamaram Chicham Najanamu

¹ Kakaram chichastin atsakuiṉkia kajektinniasha emeṉkáwai tura kakaram áimkiatin ákuiṉkia kajektinian nu arant awajui.

² Neka shuara chichatairi̱ji̱a̱i̱ neka átin awai. Antsu netse shuara wene̱ya̱ yajauch chicham tuke jiiniui.

³ Yus íimmiaka ashí nuṉkanam awai. Yajauchincha tura péṉkernasha iyawai.

⁴ Shuar iniai̱ji̱a̱i̱ péṉker chichaawa nuka numi sameka áintsaiti tura iniai̱ji̱a̱i̱ yajauch chichaawa nuka wakanniasha emesniuiti.

⁵ Shuara uchirí̱ netse ainia nuka ni aparí̱ chichame̱ncha nakitiawai antsu péṉkera nuka ni aparí̱ chichame̱n esetas ánturu asa péṉker enentáimkia átatui.

⁶ Shuar péṉkera nuna je̱e̱ṉkia tí nukap awai tura shuar yajauchia núnaka kuit ákusha yaya̱a̱tsui.

⁷ Shuar neka nuka ni nékamuri̱n chíkich shuaran ájameawai. Núnisaṉ nétsea nuka ni enentáimmiaja̱i̱ íksaṉ nekatai̱n ajamastinian tujintiainiawai.

⁸ Yusan enentáimtichu shuar ainia nu súamunka Uunt Yuska muí̱jiawai. Antsu Nin enentáimtuinia nu seamka waras ánturui.

⁹ Yus muí̱jiawai yajauch jintianam wekainia nú shuaran antsu péṉker jintianam wekainia nú shuarnaka aneawai.

¹⁰ Shuar péṉker jintinmaitiat nakitniuka jakattawai.

¹¹ Jaka matsamtai̱n tura emeskartinniasha Uunt Yuska imiá paant wáiniusha aentsu enentái̱ncha ¿itiur nekarashtiṉ?

¹² Imiá katsekmak wishikiartiṉkia chicharea nunasha aneechuiti. Tura neka ainia núja̱i̱sha tsanichuiti.

¹³ Enentai warakuiṉkia yapí shiir iira ajawiti tura kúntuts nekapeamuja̱i̱ wakancha pimpíawai.

¹⁴ Péṉker enentáimniuka nekatai̱n e̱a̱witi. Antsu enentáimcha wene̱ṉka aya yajauchiniak áujmatas yurumua núnis nekapniuiti.

¹⁵ Shuar wáitkiatai pujuwa núnaka ashí tsawant itiurchataiti. Antsu waras pujuwa núnaka nampernum pujá núnisaiti.

¹⁶ Núkap takakainiachkusha tura Uunt Yusan arantuiniana nuka kuítrintin itiurchat pujuinia núja̱i̱ṉkia naṉkaamas péṉker áiniawai.

¹⁷ Waaka nuerma namaṉke̱ péṉker iwiaramun kajernaishim yurumáinia núja̱i̱ṉkia aya ápatkuk anenaisar yurumma imiá péṉkeraiti.

¹⁸ Shuar wárik kajena nuka mániawai antsu wárik kajechua nuka mánaiktinian enentáimchaiti.

¹⁹ Shuar nakia nuna jínti̱ṉkia jaṉki irumpramua áintsaiti. Antsu ásumpi jínti̱ṉkia ti péṉker waṉkarmaiti.

²⁰ Uchi péṉker enentáimniuka ni aparí̱n waramtikniuiti tura nétseka ni nukurí̱ncha waramtikchaiti.

²¹ Shuar peṉké enentáincha nuka ni yajauchiri̱niak wararniuiti tura neka nuka ni enentái̱n esetar wekainiuiti.

²² Jintinkiartin atsakuiṉkia enentáimpramu umintsui. Antsu untsurí shuar tuíniamuja̱i̱ nekasaiti tíminiaiti.

²³ Shuar ni chichame̱ja̱i̱ péṉker antumtikiaṉka warawiti. ¡Maa, nu chichamka imiá péṉkershata!

²⁴ Nuṉká jaka matsamtai̱niam we̱e̱j tusa neka nuka yakini̱ní̱ jeatin jintianmaani̱ wéawai.

²⁵ Shuar waantu enentáimtuma nuna je̱e̱nka Yus emestiniaiti antsu wajé̱ nuṉke̱n imiankaska péṉker wáitniuiti.

²⁶ Yajauch shuar ainia nuna enentáimmiari̱ṉ Uunt Yus muí̱jniuiti tura péṉker shuaran chichame̱nka wararniuiti.

²⁷ Kasamshim ni warirí̱n tí nukap takustaj tusa súrinia nuka ni shuari̱miak emestumaiti. Antsu yajauch túratniunam útsuakur akiktaj tutai nakitniuka aṉkant pujuwiti.

²⁸ Péṉker shuara nuka áimtsuk emka enentáimnuiti. Tura Yusan enentáimtichuka aya yajauchiniak chichawiti.

²⁹ Nin enentáimtichu ainia nuyá̱ Uunt Yuska arant pujuwiti. Túrasha péṉkera túrin ainia nu seamka anturniuiti.

³⁰ Tsáapninnium íimsatniusha enentáin waramtikniuiti tura péṉker chichamsha íkiakar waramtikiartiniaiti.

³¹ Iwiaaku pujustin chicham chichaream antukua nuka nisha neka shuar matsatainia nui̱ pujusártiniaiti.

³² Shuar jintintiáttsa chicharmaitiat nakitniuka niṉki nakitmamnuiti. Antsu chicharam esetar ántinia nuka nékaiti.

³³ Yusa naari̱ shiir awajsatniuka ti neka átinian jintinkiartiniaiti. Tura shiir awajtin árat tákurkia emka péejchach átiniaiti.