Neka. 13 - Yus Papí: Shuarja̱i̱ Yus Yamaram Chicham Najanamu

¹ Uchi enentáimniua nuka ni aparí̱ chichareamun péṉker anturniuiti kame wishikkiartinkia ni aparí̱ chichareamsha ántichuiti.

² Aents péṉker chichamtin ainia nuka péṉkeran wáinkiartatui. Tura yajauch enentáimkia ainia nuka aya yajauchiniak wáinkiartatui.

³ Shuar aetak enentáimias chichaana nuka niṉki péṉker awajmamui antsu náṉkamas chichawa nuka niṉki emestumawai.

⁴ Shuar nakia nuka enentái̱ji̱a̱i̱ṉ aya wákerin asa peṉké wáitmachuiti. Antsu ásumpia nuka atsumcha átatui.

⁵ Shuar wáitrichuka wait chichaman nakitniuiti. Antsu Yusan enentáimtichua nuka nakitrámu tura natsanmai̱ ajawiti.

⁶ Shuar yajauchin túrichu wekaana núnaka ni péṉker wekatai̱ri̱n ayampriniaiti. Antsu shuar yajauchia núnaka ni yajauch túrutairi̱n imia nin émeseawai.

⁷ Shuar kuítian takakchiat kuítrinniua ánis enentáimin írunui tura shuar kuítrinniuitiat kuítri̱ncha ánis enentáimniusha awai.

⁸ Shuar kuítrinniua nuka ni kuítri̱ji̱a̱i̱ṉ akimiatmamkamniaiti tura kuítrincha nuka áujmatmancha anturmamchaiti.

⁹ Yusan enentáimtin ainia nuka shirikip ekemákam tsáapin shiir ajana ánis waramtikin áiniawai tura Yusan enentáimtichu ainia nuka shirikip ekemákmaitiat wárik kajinnia áinis áiniawai.

¹⁰ Shuar naṉkamantu enentáimtumana nuka aya mánaiktinniak enentáimniuiti. Antsu chichaream ántinia nuka tí neka áiniawai.

¹¹ Kuitcha ántar ainia nui̱ ájapeamka ti wárichik amuiniaiti antsu takakmasar ishichkisha ikiurmakar awajmaka káwenaiti.

¹² Shuar nákana nuna wárik wáinchaka kúntuts nekapeawai. Antsu ni nákana nuna umikkia ni enentái̱ waramtikiui.

¹³ Shuar akupeamu antuktinian nakitia nuka imia niṉki súmamui. Antsu shuar nuna antuk umía nuka shiir enentáimtutainti.

¹⁴ Péṉker enentáimkia nu jintinkiartamuka tsuumainiumia̱ uwemtikiui. Kame púkuninmaya̱ entsa shuara kitiakén imiktana núnisaṉ nu shuaran ikiakáwai.

¹⁵ Shuar péṉker enentáin takakna núnaka ni péṉkeri̱ji̱a̱i̱ṉ arantútainti. Antsu shuar wishikiartin ainia nuka aya itiurchatnumaṉ wekain áiniawai.

¹⁶ Ashí aents tí enentáimin ainia nuka ni nékamuriji̱a̱i̱ túrin áiniawai. Antsu nétsea núnaka ni netse túramuri̱ṉ paant awajniuiti.

¹⁷ Yajauch shuara nuka akatmampramun étserea nui̱ itiurchat enentáimtikniuiti. Antsu péṉker shuara nuka chícham akatmampramun étserea nui̱ tsuaka áinis shiir awajniuiti.

¹⁸ Shuar chichaream ántichua nuka kuítri̱ncha natsanmai̱ ajawiti antsu chichaman tí peṉker ántinia nuka arantúkmaiti.

¹⁹ Shuar ni takatrí̱n iniamar amukka warawiti. Tura shuar nétsea nuka mui̱jmiainniumia̱ kanaktinian peṉké nakitniuiti.

²⁰ Shuar tí neka ainia nuja̱i̱ irunar wekaana nu tí neka átatui antsu netse shuar ainia nuja̱i̱ irunar wekaana nu wáitsattawai.

²¹ Yajauch shuar ainia núnaka yajauchia nu pataatukartatui. Antsu shuar péṉkerka péṉkerja̱i̱ akinkiartatui.

²² Shuar péṉker enentáimniuka ni warirí̱n takakna núnaka ni uchirí̱n tura tiraṉki̱ncha jaak ikiurniuiti. Antsu yajauch shuara nuna warirí̱nkia péṉker shuar takusarat tusar ikiursamu áiniawai.

²³ Shuar kuítrincha nuna nuṉke̱n takakmasa arakma yurumak ti ákuisha nekasa nuja̱i̱ ayamprin atsakuiṉkia atannakminiaiti.

²⁴ Shuar ni uchirí̱n asutiatsna nuka aneatsui tura anea nuka úchichiniak péṉker ati tusa asutiawai.

²⁵ Shuar Yusan enentáimta nuka iwiaaku pujustaj tusa yurumui antsu shuar yajauchia nuna yurumkari̱ṉkia táastatui.