Neem. 8 - Yus Papí: Shuarja̱i̱ Yus Yamaram Chicham Najanamu

Ístras Yus akupkámu chicham aujma

¹ Nui̱ṉkia ashí shuar Entsá waiti tutaiya nuna á̱a̱ri̱n iruntrarmiayi. Nui̱ Ístrasan papí ái̱nian chicharainiak “Yaunchu Yus akupkámu umiktin chichaman Muisaisja̱i̱ Israer shuartiniun akuptúrmakmiaj nu papí itiata” tiármiayi.

² Kame siati nantu náṉkamma tsawantin Yúsnan pujurin Ístras yaunchu Yus Israer shuarnan akupkámu chicham áarman áishmaṉsha nuwa̱sha tura antuk nekamnia ainia nu iruntrar pujuiniamunam itiamiayi.

³ Tura Ístrassha Entsá waiti á̱a̱ri̱ya nui̱ nuwa̱sha áishmaṉsha tura ashí shuar iruntramunam akupkámu chichaman áujsatniun tsawa̱a̱na nui̱ juárkimiutaik tutupin ejemiayi. Túrakuisha yawe̱tsuk péṉker antukarmiayi.

⁴ Nuyá̱ papí ain Ístraska ni wajastin iwiarturmanum yakí̱ wajamiayi. Tura ni untsuurí̱ni̱ṉkia Matatías, Sema, Anías, Urías, Irkías tura Masías wajarmiayi. Nuyá̱ menaari̱ni̱ṉkia Pitiayás, Misaír, Markías, Aasum, Aaspatána, Sakarías tura Misurám wajarmiayi.

⁵ Kame Ístraska ashí shuar irunar iimiam ajainiamunam yakí̱ wajas papin uraakui ashí shuar wajakiarmiayi.

⁶ Nuiṉkia Ístras Ashí Tujintkiachu Uunt Yusan shiir awajeakui ashí shuar uwejé̱n takuiniar “Nuke atí, nuke atí” tiármiayi. Nuna tiar nuṉká tikishmar tsuntsumpruáwar Uunt Yusan shiir awajsarmiayi.

⁷ Nuyá̱ Riwí shuar Jesúa, Pani, Serepías, Jamin, Akup, Sapetai, Uutías, Masías, Kiritia, Asarías, Jusapát, Anan, tura Pirarías ashí shuar wajarmia nuka nui̱ wajainianak akupkámu umiktin chichaman péṉker nekaawarat tusa jintintiáwarmiayi.

⁸ Nisha Yus akupkámu chichaman péṉker nekaawarat tusa nu papin áujtus jintintiáwar paant awajtiarmiayi.

⁹ Kame ashí aents umiktin chichaman antukar útainiakui uuntri̱ Neemíaska tura Yúsnan pujurin Ístras papí ain asa Riwí shuarja̱i̱ iruntrar chichainiak “Ju̱ tsawantka atumí Yusri̱ enentáimtustin tsawantaiti. Kúntuts enentáimsarum útirap” tiármiayi.

¹⁰ Nuyá̱ chicharainiak “Werum péṉker yurumak iwiaramu yurumárum yumincha umartarum. Núnisrumek yurumkan takaktsuna nusha ayurarum akupkatarum. Warí ju̱ tsawantka Yusna akantúkma Nin shiir enentáimtustinian tsawantaiti. Uunt Yusa waratáiri̱nkia iin ikiakátmakrin kúntuts pujusairap” tiármiayi.

¹¹ Tura Riwí shuarsha ashí aentsun chicharainiak “Mitia ajastarum. Warí ju̱ tsawantka Yusna akantúkma asamtai kúntuts enentáimsairap.”

¹² Warí Israer shuarka nu akupkámu umiktin chicham jintíamu péṉker antukar paant nekaawaru ásar ni je̱e̱n yurumá umarar warasartai tusar waketkiarmiayi. Nuyá̱ yurumkan takakainiatsna nunasha akuptúkarmiayi.

Aak namper

¹³ Tura kashin tsawa̱a̱k papí ain Ístras ashí Israernumia̱ uunt armia nu tura Yúsnan pujurin núnisaṉ Riwí shuarsha akupkámu umiktin chichama nu paant nekaawartai tusar irunturarmiayi.

¹⁴ Uunt Yus Muisaisan akupkámu chichaman áamtikramia nui̱ áujsar Israer shuar siati nantutinkia Yusa namperi̱n najanainiak ni je̱e̱nka ikiukiar áakmakar pujusártinian nekaawarmai.

¹⁵ Nuiṉkia Jerusaréṉnumsha tura chíkich péprunmasha chichaman akupáiniak “Kampunniunam werum uriwiu kanawe̱sha mitiu kanawe̱sha tintiukniasha tura numi ukat ukatin ainia nunasha aak áakmaktin aarma tana nuja̱i̱ métek túratin ikiankatarum” tiármiayi.

¹⁶ Nuyá̱ ashí Israer shuar wéar ikiankarmiayi. Túrawar je̱á̱ yakí̱ wakar íimtai̱nmasha je̱á̱ á̱a̱ri̱ncha núnisaṉ Uunt Yusa Je̱e̱ á̱a̱ri̱ncha tura Entsá waiti tutaiya nuna á̱a̱ri̱n ántsaṉ Eprain waiti tutaiya nuna á̱a̱ri̱ncha aṉkant aṉkant áakmakarmiayi.

¹⁷ Tura ashí Israer shuar yajá yaruakma káunkar matsamármia nuka áakan áakmakar nui̱ṉ pujusármiayi. Kame Nuuna uchirí̱ Jusuí pujumia tímianai túrachman Israer shuar nuna túruiniak ti warasarmiayi.

¹⁸ Tura Ístras Yus akupkámu umiktin chichaman siati tsawant áujmiayi. Tura uchu tsawantinkia iruntrar akupkámuja̱i̱ métek namperan yaunchu tuke túrin armia núnisaṉ najaniarmiayi.