Naṉ. 41 - Yus Papí: Shuarja̱i̱ Yus Yamaram Chicham Najanamu

Parauṉ mesekrampramun Jusé paant awajtúsma

¹ Jimiará uwí naṉkaamasu ai̱ Parauṉ mesekrampramiayi. Tura mesekranam Niru yantamén wajái̱

² entsaya̱ siati waaka péṉker jaeram jíintrarmai. Túrunawar entsá supichik sa̱a̱k irunmia nuna yuarmai.

³ Nuna tumai̱ ukunmaani̱ chíkich siati waaka yajauch watsakaru entsaya̱ jíintrar káunkar péṉker wajarma nui̱ tíjiu̱ch wajasármai.

⁴ Nuyá̱ waaka yajauch watsakaru arma nu péṉker waaka jaeram siati arma nuna yuínian wainkiamai. Tura Parauṉ shintiar

⁵ atak kanaksha nuya̱sha mesekrampramai. Mesekramuk chikichík shanumaṉ siati sha péṉker tuyu̱rkar péemprar ti nerekárun wainmiai.

⁶ Tura nuna úkuri̱i̱ni̱ chíkich siati sha etsa̱ jintiainmaya̱ mayai̱ tsue̱r áeskamua núnin uchich nerekarmai.

⁷ Áeskamua ánin uchich arma nu siati sha péṉker arma nuna yúawarmai. Tura Parauṉ kuraat shintiar mesekranmanchukait tú enentáimpramiayi.

⁸ Tura kashin káshik ti itiurchat enentáimiar Ejiptunmaya̱ nekamin tura mesekran neka armia nunasha untsukarmiayi. Tura káunkarmatai Parauṉ ni mesekrampramuri̱n ujakármiayi, túrasha neka armia nusha ni mesekrampramuri̱n nekarachar ujaktinian tujintkiarmiayi.

⁹ Nui̱ṉkia wíniun sukartinia uuntri̱ Parauṉkan chicharuk “Aj, yajauch túramurun yama enentáimpraj ju̱na ujaktájme.

¹⁰ Uuntá, páṉkan najatramniu úuntri̱sha tura winiasha kajerkartukam suntara uuntri̱ je̱e̱n sepunam eṉkekratamame.

¹¹ Tura nu kashi páṉkan najanniu úuntri̱sha niisháa mesekrampramai tura wisha wisháa mesekrampramjai. Aṉkant aṉkant mesekrasha nusháa nusháa túrunatniuyayi.

¹² Tura nui̱ sepunam Israer shuar natsa suntara uuntri̱ iniatairi̱ iiji̱a̱i̱ pujumai. Nú aishmaṉ ii mesekrampramu ujakam warí mesekrait nuna ashí ujatmákmaji.

¹³ ¡Tura ni timia nuja̱i̱ métek túrunamai! Tura wikia ataksha winia takatrun naṉkamamjai tura chikichnaka kajemtikrar máwarmai” tímiayi.

¹⁴ Nuna takui̱ nuya̱ṉka Jusé sepunmaya̱ ji̱i̱ki̱ itiatárum tusa Parauṉ akupkarmiayi. Túram wárik jí̱i̱kiarmiayi. Jí̱i̱kim Jusesha susuri̱n tsupir pushiri̱n yapajmiáma Parauṉkai̱ wémiayi.

¹⁵ Tura jearim Parauṉ Jusen chicharuk “Mesekramprajai túrasha ¿warí mesekrakit? ujatkatin atsawai. Antsu ámin mesekrampramun nekáa táman anturkajme” tímiayi.

¹⁶ Tutai Jusé chichaak “Kame wikia jeatsjai antsu Yusak núnaka ujatmákminiaiti. Tuma asa ámin waitnentramak ¿warí mesekrait? nuna uuntá, ujatmáktatui.” Tú ái̱kmiayi.

¹⁷ Tutai Parauṉ Jusen chicharuk “Wi mesekranam Niru yantamén wajái̱

¹⁸ entsaya̱ siati waaka péṉker tura shíirmach jaeram jíintrar entsá yantamén sa̱a̱k wajainian yuiniá.

¹⁹ Tura chíkich siati waaka watsararu úkunchik jíintrara tura wikia waaka tímiau watsararu úkunchik áinian ju̱i̱ Ejiptunmasha wáinchaitiaj.

²⁰ Nú siati waaka watsararu siati jaerman emka jíintrara nuna yuáwara.

²¹ Nuna yúawarsha mash amukariat yukartuachua núnisaṉ tuke úkunchik ainia. Nui̱ shintiaraj.

²² Tura atak mesekramkun chikichík shanumaṉ siati sha tí peṉker úuntan nerekárun wáiniaj.

²³ Tura nuna úkuri̱n chíkich siati sha káakaru mayai̱ tsue̱r etsa̱ jintiainmaani̱ya̱ umpuam esakárun wáiniaj.

²⁴ Nú siati sha saṉkut ainia nuna yuinia. Tú mesekrampran ti neka ainia nu ujakármasha ¿warí mesekrait? nunasha ujatkacharai” tu ujakmiayi Jusen.

²⁵ Tutai Jusé Parauṉkan aya̱k “Uuntá, jímiar mesekrampram nuka mái̱ nukete. Yus Ni túrattana nuna iniakturmasai.

²⁶ Siati waaka shiir jaeram wáinmena nuka siati uwikiti. Núnisaṉ siati sha úuntan nerekáru wáinmena nusha siati uwikiti. Nú mesekrakete.

²⁷ Núnisaṉ siati waaka yajauch watsakaru jiintra nusha siati uwikiti. Tura siati sha etsa̱ jintiainmaya̱ mayai̱ tsue̱r áeskamu wáiniam nusha siati uwikiti. Ju̱ka siati uwí tsuka átatui.

²⁸ Wi tájamna ju̱ja̱i̱ métek Yus túrutmattana nuna iniakturmasai, uuntá.

²⁹ Siati uwitin ashí Ejiptunam ti taramkattarme.

³⁰ Tura nu naṉkaamasmatai ataksha siati uwí ti tsuka átatui. Warí tsukamawar matsamsachmin ajasmatai ju̱i̱ Ejiptunam taramkarmia nunasha enentáimtuschartatui. Árakka tsapaichmin ajastatui.

³¹ Ti tsukamnamtai yaunchu taramkarmia nusha imiata jú̱niktiniuya tunattawai.

³² Uuntá, jimiará mesekra ipiatramka asa Yus nekas túrattajai tusa iniakturmasai. Tura nusha wárik uminkiattawai.

³³ Tuma asamtai Parauṉká, aents ti neka Ejiptunam chichampruktin anaikiata.

³⁴ Uuntá, ju̱ túratin péṉker ainti. Uuntri̱ anairarta. Nisha ashí Ejiptunam wéar siati uwitin tí nukap árak átatna nu ashí araknumia̱n séṉkunmaya̱n chikichkiniak ikiustinian itiarti.

³⁵ Siati uwitin ame chichammiji̱a̱i̱ tí nukap taramnakmanumia̱ irumnarti. Tura ashí péprunam irumprar ikiusma atí aents yurumáwartin.

³⁶ Tura siati uwí tsuka átatna nui̱ Ejiptunmaya̱ aents tsukaja̱i̱ kajinkiara̱i̱ṉ tusar ashí matsatkamunam irumnarti.” Tú timiayi Jusé Parauṉkan.

Jusé Ejiptu nuṉka uuntri̱ awajsamu

³⁷ Kame Jusé timian Parauṉsha tura anaikiamuri̱sha nekas péṉker tawai, tu enentáimtusarmiayi.

³⁸ Tuma asamtai Parauṉ ni takarniúri̱n chicharainiak “Juseja̱i̱ métek Yusa Wakaní̱ pujurma aents wainkiatjash” tímiayi.

³⁹ Tuma asa Jusen chicharuk “Kame ámiji̱a̱i̱ métek chíkichkia atsawai. Aminiak Uunt Yus nekamtikramu asamtai ti nékaitme.

⁴⁰ Nu tuma asamtai ame winia je̱a̱rui̱ akupin ai̱ tusan ánaiyajme. Tura ashí aents ámin umirtamin ártatui. Aya wiki ashí akupin asan ámiji̱a̱i̱ naṉkaamas uunt átatjai.

⁴¹ Iisiana, ashí Ejiptu nuṉka akupniúri̱ ánaiyajme” tímiayi Parauṉ.

⁴² Nuna tinia Parauṉ ni akupkur awetai̱ aniyun ukuiniak Jusen susamiayi. Nuyá̱ tí peṉker riniu pushí áentsramiayi. Tura nuṉkutai̱ kuriji̱a̱i̱ najanamun anuṉkramiayi.

⁴³ Nuyá̱ Parauṉka káruri̱ya̱ uku wininiuya̱ nú karun Jusen susamiayi. Tura Jusé wéamuri̱n aents emki̱ wéar untsumainiak “Jintiaya̱ menastarum” tiarat tusa Parauṉ akupkámiayi. Nú túrunamuja̱i̱ ashí aents Jusé uunt awajsámun nekaawarmiayi.

⁴⁴ Nuyá̱ Parauṉ Jusen chicharuk “Wisha uunt asan tájame ame chichammiji̱a̱i̱nchuka Ejiptunmaya̱ aentska peṉké warinkesha túrachmin áiniawai” tímiayi.

⁴⁵ Tura Parauṉ Jusenka Ejiptunmaya̱ aentsu náari̱n Sapnatpanea anaikiamiayi. Tura Un péprunmaya̱ yúsnan takarin Putipiára nawantri̱ Asenátja̱i̱ Jusenka nuatmamtikiamiayi. Nuní̱ túruna Juseka Ejiptunam akupin ajasmiayi.

⁴⁶ Nuyá̱ Jusé Parauṉkan takartan juárminia nui̱ṉkia traintia uwí takakuyayi. Tura takatan juáruk Parauṉkan áujas ikiuak ashí Ejiptu nuṉkanam wémiayi.

⁴⁷ Nui̱sha árak siati uwí tí peṉker núkap nerekarmiayi.

⁴⁸ Tura nú siati uwitin Juseka júukmanumia̱n ashí achik aṉkant aṉkant pepru tíjiu̱ch armia nui̱ irumkamiayi.

⁴⁹ Tí nukap nekapmarchamnia juukma asamtai nekapmatsuk iniaisámiayi.

⁵⁰ Kame tsuka jeatniuka chikichik uwí taasu ai̱ najankamu yusa takarin Únmaya̱ Putipiára nawantri̱ Asenátai̱ Juseka jimiará uchin yajutmarmiayi.

⁵¹ Emka uchin Juseka “Yus wi wáitsatniun tura wí shuarnasha kajinmamtikrukniuiti” tú enentáimias Manasés anaikiamiayi.

⁵² Patai̱nkia “Yus wi jú̱ nuṉkanam wáitsamiaj ju̱i̱ uchi yajutmaktinian surusuiti” tú enentáimias Eprain anaikiamiayi.

⁵³ Kame Ejiptunam siati uwitin ti taramkarmia nu naṉkaamasmiayi.

⁵⁴ Nu naṉkaamasmatai siati uwí Jusé timia nuja̱i̱ métek tsuka ámiayi. Ashí nuṉkanam tsúkaka ámiayi tura ashí Ejiptunmaṉka yurumkaka ámiayi.

⁵⁵ Tura ukunam Ejiptunmaya̱sha tsukamtemawar Parauṉkai̱ yurumak juukman seatái tusar werú wéarmiayi. Tura jeawarmatai Parauṉ ashí Ejiptunmaya̱n chicharainiak “Jusé werirum seautarum tura ashí ni títiatna nu túratarum” tímiayi.

⁵⁶ Tura ashí Ejiptunam tsukamnaki̱ wéakui irumpramia nuna suruktaj tusa Juseka ikiutai̱n urá wémiayi.

⁵⁷ Tura chíkich nuṉkanmaya̱sha tsukamawar Jusée sumautai tusar Ejiptunam káutiarmiayi.