Naṉ. 18 - Yus Papí: Shuarja̱i̱ Yus Yamaram Chicham Najanamu

Isak akiiniatin ujamu

¹ Chíkich tsawantai̱ Mampri numi írunmanum Aprajámka etsa̱ etsanmanum jutai̱ je̱a̱ wáitiri̱i̱n pujumiayi. Tumai̱ Uunt Yus Aprajáman wantintiukmiayi.

² Túram Aprajám paṉkái̱ íimiaj tukamá menaintiú áishmaṉ naka wajainian wainkiamiayi. Nuna wainiak wárik wajaki̱ áujsataj tusa werimiayi. Tura tikishmátar tsuntsumá nijia̱i̱ji̱a̱i̱ nuṉká antiṉmiayi.

³ Tura Aprajám nuna chicharainiak “Uuntru, waitneasrum wárik weerap tusan seajrume.

⁴ Atumji̱a̱i̱ péṉkeraitkiuiṉkia atumí nawe̱ nijiartin yumi utitiá tusa akupnákti. Tura atumsha numí kampui̱n mikintrana nui̱ ishichik ayampratarum.

⁵ Warí wi atumí umirin pujajna ju̱i̱ tau asakrumin ayurataj tusan wakerajrume. Tura yurumárum ayamprarum weku tusan túrattajrume” tímiayi. Tutai “Ayu péṉkeraiti” tiármiayi.

⁶ Nuna tutai Aprajámka je̱e̱n wayá̱ Saran chichareak “Nua̱ru, tí peṉker arinia núkap painti kiru jeá jusam wárik paṉ najanata” tímiayi.

⁷ Nuna tinia Aprajámka waaka matsatmanum tseke we waaka uchich tí peṉkeran achik ni takarniúri̱n susamiayi. Túram Aprajáma takarniúri̱sha wáurtus iwiaramiayi.

⁸ Túramtai Aprajám waaká namaṉke̱ iwiaramun tura muntsuncha núnisaṉ muntsú kuntutincha ajamsarmiayi. Tura numi ejetanam nú aishmaṉ yurumáiniai̱ Aprajámsha nui̱ wajamiayi.

⁹ Tura yurumá amikiar írar aents Aprajáman chicharainiak “¿Ame nuwem Sarasha tui̱ pujá?” tiármiayi. Tutai “Ai̱ je̱á̱ pujawai” tímiayi.

¹⁰ Tutai chichaak “Chíkich uwitin wekaakun íitjiame. Tura wikia táatsa̱i̱ṉ Sáraka uchin takustatui” tímiayi. Nuna tú chichainiai̱ Sáraka Aprajáma úkuri̱i̱n je̱á̱ wáitiri̱i̱n anumas anturmamu wajamiayi.

¹¹ Warí Aprajámka Saraja̱i̱ mái̱ metek tí uuntach ármiayi. Sáraka nantu waintiancha iniaṉnakuyayi.

¹² Nuna nekaama wisha imiá uuntchincha tura áishrusha imiá uuntach ai̱sha uchin takusnasha warastájash, tu enentáimtumas ní neas wishikmampramiayi.

¹³ Túmakui̱ Uunt Yus Aprajáman chichareak “¿Sara urukamtai wishía. Timiá uuntchincha uchinkia takuschamniaitjiai tu enentáimtumawak?

¹⁴ Warí Yusja̱i̱ tujintkiamnia áwak. Wats nekas tájame chíkich uwitin iraakun íitjiame. Túrasha táatsa̱i̱ṉ Sáraka uchin takustatui” tímiayi.

¹⁵ Tura nuna antuk Sáraka sapijmiak “Atsá, wikia wishíatsujsha” tímiayi. Túrasha Uunt Yus chichaak “Wishirumna nuna nekaajai” tímiayi.

Sutuma aentsun enentáimtus Aprajám Yusan seatmia

¹⁶ Nuyá̱ Aprajáma irari̱ wajakiar Sutumanmaani̱ wetái tusar pujuarmiayi. Tura áujsan akupkartaj tusa Aprajámka irunki̱ wémiayi.

¹⁷ Tura Uunt Yus chichaak “Wi túrattajna nuna ¿Aprajáman u̱rkattajak?

¹⁸ Atsá, warí niṉkia untsurí tura kakaram aents ártatna nuna uuntri̱ awajsashtatjak. Tura Aprajámai̱n ashí nuṉkanmaya̱ aents shiir awajnásartatui.

¹⁹ Warí ni uchirí̱ncha tura ni shuári̱ncha nuyá̱ uchirí̱ akiiniawartatna nunasha péṉker túratniuncha naka wekasatniuncha tura Uunt Yusa chichame̱n umiktinian jintintiáwartatna nuna nékakun anaikiaitjiai. Tuma asan tímiajna nu uminkiami tusan achikchamkaj” tu enentáimsamiayi.

²⁰ Nuya̱ṉka Aprajáman Uunt Yus chichareak “Ti nekas Sutumanmaya̱ tura Kumuranmaya̱ aentsu tunaarí̱ peṉké yajauch ajasmatai nekas katsuntrachmin ti áujmatsamuiti.

²¹ Kame nu áujmatsamu Winí̱i̱ jeamtai ti nekasash ni yajauch túrutai̱ peṉké katsuntrachmin ajasuit tusan ímia Wi nekaattsan pakanam akatúktiatjai tura nekasaitkiuiṉkia Wi nekaattajai” tímiayi.

²² Nui̱ṉkia jimiará áishmaṉ Sutumanam wéarmiayi túrasha Aprajámka Uunt Yusai̱ eem wajas juákmiayi.

²³ Nuyá̱ Aprajám Yusan wérusaṉ ijius chichareak “¿Yajauchin túrichusha yajauch shuarja̱i̱ métekek amuktatam?

²⁴ Warí Sutumanmasha yajauchin túrichu seṉkuintia áchatpiash. ¿Seṉkuintia aí̱ṉkik amuktatam antsu nu ákuiṉkia tsaṉkurashtatmek?

²⁵ Kame yajauchi túrichu yajauchin túrinji̱a̱i̱ métek máchminiaitmena núnaka nekas nékajai. Tura péṉkera túrinia nu yajauchi túrinji̱a̱i̱ ¿métek sumamtikiamniakaitiam? Ashí nuṉkanmaya̱ aents Sumamtikin asam ¿péṉkera nu túrashtatmek?” tímiayi Aprajám.

²⁶ Tutai Uunt Yus aya̱k “Sutumanam yajauchi túrichun seṉkuintia wainkiaṉka nin anenakun ashí Sutumanmaya̱ aentsun asuttsuk iniaisattajai” tímiayi.

²⁷ Tutai Aprajámka ataksha chichareak “Tsaṉkurturta Uuntá. Amesha Úunt Yusaitme tura wikia aya áentsuitiatnak títiatjamna nu anturtukta.

²⁸ ¿Seṉkuintia jeatin seṉku táasmataisha jú̱ pepru amuktatmek?” tímiayi. Tutai Uunt Yus chichaak “Kuaraintiséṉku yajauchi túrichu ákuiṉkia emesrashtatjai” tímiayi.

²⁹ Tutai Aprajám chichaak “¿Túrasha aya kuaraintiachik ákuisha?” tutai Yus aya̱k “Kuaraintia ákuiṉkia emesrashtatjai” tímiayi.

³⁰ Tutai Aprajám Yusan chicharuk “Uuntá tuke chichastatjame túmakui̱sha kajertukaip, Uuntá. Aya tráintiachik wáinkiashtameash” túramsha itiurkattam tímiayi. Tutai “Tráintiachiksha ákuiṉkia iniaisattajai” tímiayi Yus.

³¹ Takui̱ Aprajámsha chichaak “Tura Uuntá, arantutsuk nuna arant awajjame. ¿Aya páintichik wainkiamsha itiurkaintmek?” takui̱ “Painti ákuiṉkia emesrashtatjai” tímiayi Uunt Yus.

³² Tura Aprajámka tuke chichaki̱ wémiayi. “Uuntru, waitneasam kajertukaipia. Jú̱chiniak tinia atakka tíchattajme. ¿Aya tiáschik wainkiamsha itiurkaintmek?” takui̱ “Tiáschiksha ákuiṉkia nú peprunka emesrashtatjai” tímiayi Uunt Yus.

³³ Nuyá̱ Uunt Yuska Aprajámja̱i̱ chichasua umik ikiukmiayi. Tura Aprajámsha waketkimiayi.