Naṉ. 13 - Yus Papí: Shuarja̱i̱ Yus Yamaram Chicham Najanamu

Apram Rautja̱i̱ kanaamu

¹ Ayu, Apramka ni nua̱ri̱ji̱a̱i̱ tura ashí wariri̱ntiuk nuyá̱ kaná uchirí̱ Rautja̱i̱ Ejiptunmaya̱ jíinkiar arakaani̱ Nekepnum waketkiarmiayi.

² Tura Apramka tí kuitrinniuyayi kurincha, kuítniasha ántsaṉ untsurí taṉkun takaruyayi.

³ Tura Nekepnumia̱ tuke arakaani̱ wéa wéakua Pitir nuṉkanam yuntumas nuik pujusmia nui̱ṉ ataksha waketkimiayi. Nusha Pitir nuṉkaja̱i̱ Aai nuṉka ajapén etentamunmaiti.

⁴ Nui̱k Apram kayan irumar Yus shiir awajtai̱n najana Uunt Yusan áujsamia nui̱nti.

⁵ Núnisaṉ Rautcha tí kuitrinniuyayi. Kaná aparí̱ Apramja̱i̱ métek muriknasha waakancha takarniúri̱ncha takaruyayi.

⁶ Tura mai̱ ti taṉkurtin ásar nú nuṉkanmaṉ pujuschamnia ármiayi. Warí taṉkú yurumke̱sha táamiarmiayi.

⁷ Tuma asamtai Aprama taṉkuri̱n wainniusha tura Ráutnan wainniusha kajernáiyarmiayi. Tura nuna naṉkaamas Kanaan aentssha ántsaṉ Píris aentssha nú nuṉkanmaṉ tuke matsamármiayi.

⁸ Chíkich tsawantai̱ Apram Ráutan chichareak “Iisha nuamtakchakaitiaj. Íiji̱a̱i̱sha tura ii taṉkuri̱ wainniusha kajernaikiatin péṉkerchaiti.

⁹ Yamaikia íiji̱a̱i̱ṉkia kanaktiai. Nuṉka aṉkant awai. Ame wakeramu achikta. Ame menanmaani̱ pujustájai tákumni̱ṉkia wikia untsuurnumaani̱ pujustájai. Antsu ame untsuurnumaani̱ pujustájai tákumni̱ṉkia wikia menanmaani̱ pujustájai” tímiayi Apram.

¹⁰ Nuyá̱ Jurtana pakarí̱n tí peṉker tépakun Uunt Yusa ajarí̱ya̱ núnin entsarkiámun tura Ejiptunam Suárnumaani̱ ana núninian nuyá̱ Sutuma tura Kumura Uunt Yus émestsa̱i̱ṉ urukuya timianú péṉkeran Rautcha wainkiamiayi.

¹¹ Nui̱ṉkia Rautka Jurtan entsa pakarí̱n achikmiayi. Achikiu asa etsa̱ tatainmaani̱ wémiayi. Nuní̱ Apramka Rautja̱i̱ kanakiármiayi.

¹² Apramka Kanaannumaṉ juákmiayi. Tura Rautka pakanam wéak írutkamu armia nui̱ pujurkutak Sutuma írutkamunmaani̱ wémiayi.

¹³ Tura Sutumanmaya̱ aentska Uunt Yusan nakitiáiniak tunaan tura tí yajauchin túrin ármiayi.

¹⁴ Kame Raut wématai Uunt Yus Apraman chichareak “Pujamna nuyá̱ nuṉka mash íisarta.

¹⁵ Tura ashí wáinmena nú nuṉkan amastatjai. Nuka áminiu ántsaṉ tiraṉminiu tuke atumnia átatui.

¹⁶ Naikim nekapmarminkiait. Tímiatrusnak ame tiraṉmincha nekapmarchamnia awajsattajai.

¹⁷ Wats jú̱ nuṉka esantí̱ tura waṉkantí̱sha wekasam Iistá. Íistatmena nuna ashí amastatjai” Yus tímiayi.

¹⁸ Tutai Apramka jutai̱ je̱e̱n ashir jukí̱ Eprunnum jeastatuk numi ukat ukatin mátsata Mampri náartinnium pujuumiayi. Nui̱ Apramka Uunt Yusan shiir awajsataj tusa Uunt Yus áestutai̱n najanamiayi.