Muis. 34 - Yus Papí: Shuarja̱i̱ Yus Yamaram Chicham Najanamu

Muisais jakamu

¹ Muisais Muap nuṉkanmaya̱ Piska naint ápatnik Nepu naintia pakarí̱n wakamiayi, nu naintkia Jirikiúnam íṉkiuasmakeyayi. Nui̱ Uunt Yus Muisaisan Karaat nuṉkanmaya̱ juarki̱ Tan nuṉka nui̱

² tura Neptarí, Eprain, Manasés, ashí Jutá shuar matsamkartiniuya nu nuṉkancha tura nayantsa tímianaisha

³ nuyá̱ Nekep nuṉkan Jurtan entsa pakarí̱n Jirikiú, Tintiuk pepru tútaiya nunasha, Suar pépruncha ashí Uunt Yus Muisaisan iniaktusmiayi.

⁴ Tura Uunt Yus Muisaisan chicharuk “Péṉker iistá. Wi atumí úuntri̱n Aprajáman, Jakupan, Isakan chicharainiakun atumí tiraṉki̱n nekas súsatniutji̱a̱i̱ tímiaj nú nuṉkaiti. Imia amek iisai tusan tsaṉkateajme túrasha ámeka nú nuṉkaka jearchattame” tímiayi.

⁵ Nuyá̱ Uunt Yusa takarniúri̱ Muisais Muap nuṉkanam Uunt Yus timia ímiatrusaṉ umik jakamiayi.

⁶ Tura jakamtai Muap nuṉkanam jimiará naint ápatnik wájakmanum nuna pakarí̱n Yus iwiarsamiayi. Nusha Pitpiur pepru íṉkiuasmakete. Tura nu iwiarsamunka yamái tsawanta ju̱i̱sha yaaksha nékainiatsui.

⁷ Muisaiska siantu painti uwí takakiat kákarmak ji̱sha kusurcha jakamiayi.

⁸ Tura Israer shuarka Muisais jakamtai kúntuts enentáimiainiak traintia tsawant Muap nuṉkanam útas pujusármiayi.

⁹ Tura Nuuna uchirí̱n Jusuin Muisais ni uwejé̱ja̱i̱ muuknum awantsamu asa ti neka ajasmiayi. Tuma asa Uunt Yus Muisaisan timia tímiatrusaṉ Israer shuarsha Jusuin anturkar umiriarmiayi.

¹⁰ Tura Yúsnan etserin Muisaisa núnin Yusja̱i̱ íiniais chichauka Israernumka chíkichkia peṉké atsumiayi.

¹¹ Áintsaṉ Ejiptunam Uunt Yus akupkam Parauṉkan tura ni takarniúri̱n nuyá̱ ashí ni nuṉke̱n ashí aents túrachminian tsuumainian túrak iniaktusmia núni̱ṉkia chíkich aentska atsumiayi.

¹² Muisais ashí Israer shuar iimiainiamunam Uunt Yusa kakarmari̱ji̱a̱i̱ ti ashamainian iniakmasmia nuja̱i̱ métek túramniaka chíkichkia peṉké atsumiayi.