Muis. 33 - Yus Papí: Shuarja̱i̱ Yus Yamaram Chicham Najanamu

Israer shuaran Muisais péṉkernum yumiṉkramu

^1-3 Jú̱ péṉker yumiṉji̱a̱i̱ Uunt Yusan enentáimtin Muisais játsuk Israer shuaran chicharkarmiayi. “Uunt Yuska Senái nainnium tí wincha ji kean untsuurí̱ni̱ takaku nekapmarchamnia tunaarincha ainia nuja̱i̱ wantinkiamiayi. Tura tunaarincha Niniu ainia nu ni chichame̱n anturkar tikishmátainiawai.

^4-5 Tura akupkámu umiktin chichaman Muisaiska Israer shuaran súsarmiayi, nuyá̱ ni akupniúri̱ ajasmiayi.

⁶ Ruwinkia ti untsurí pampar pujusti.

⁷ Jutá chichame̱nka Uunt Yus anturkati tura ni nemasri̱ya̱ncha Niṉki yaiṉtí.

^8-11 Riwiyá ame Yúsrum shiir awajtamuk ame nemasrumiya̱ṉka aṉkant awajtámsati. Warí Níṉkichuk takaream tura núnismek ni akupkámuri̱sha Israer shuarcha jintinchakaitiam.

¹² Piṉjiamínniaka Yus wainkiattawai túramu asa warinkisha enentáimtutsuk pujustatui.

^13-17 Jusenka péṉker nuṉkan achiktatna nui̱ ashí péṉker írunna nuja̱i̱ péṉkernum yumiṉkramiayi. Warí niṉkia akupniu uchirí̱a núnis ashí naṉkaamas kakaram asa túrattawai.

^18-19 Sapurúnka Isakárja̱i̱ taṉkun mantuawar ashí aentsun untsukar naint íruiniak warasarti. Warí nayantsanam tura nuṉká init kuit írunna nuja̱i̱ shiir pujusártatui.

^20-21 Kaatka nekas tí peṉker nuṉkanam pujustaj tusa achikmiayi. Tura ashí uuntri̱ áiniana nu iruntrarmanum Israer shuar Yus wakerimia nuna warí itiurkartiṉ tusa nuna túramiayi.

²² Tanka úunt ya̱wa̱ Pasannumia̱ naant ajana nuna uchirí̱nti.

²³ Neptaríkia péṉkeran Yus susa núja̱i̱ṉ waraawai. Tura nayantsanam ayamach nuṉkaani̱ pujustatui.

^24-25 Aserka yachi̱ji̱a̱i̱ naṉkaamas shiir awajsamuiti tura yachi̱sha núnisaṉ yaiṉkiartatui. Tura wá̱i̱ti̱a̱i̱ri̱sha jiruja̱i̱ tí peṉker epenmia ártatui. Tura iwiaaku pujutta nuiṉkia kákarmak átatui.

^26-29 Israera Yúsri̱ji̱a̱i̱ métekka chíkichkia atsawai. Atumí ejamtairi̱ṉkia tuke pujú Yusaiti tura Niṉkia uwejé̱ja̱i̱ takus pujurtamprume. Túramu asarum péṉker pujustatrume. Warí atumí Yusri̱ṉkia naṉkaamas kakaram asa atumí nemasri̱nkia nupetkattawai túrak péṉker apujtamsattarme.” Tú timiayi Muisais.