Muis. 21 - Yus Papí: Shuarja̱i̱ Yus Yamaram Chicham Najanamu

Aents mantamnamunam akikmaktin

^1-9 Tura Uunt Yus nuṉkan súsarua nui̱ Israer shuar matsamás aya aneachma aents jaka tepá wainniakmatai tura ¿ya mait? nusha nekanachmataisha nu aents jakamunam makuna̱i̱j tusar warí itiurkatin armia nunasha Uunt Yus jintintiámu asa Muisais Israer shuaran jintintiáwarmiayi.

Nuwa̱ misatak achikiá itiamu túratin

^10-14 Tura mesetnum nuwa̱ misatak itiamun wakerak nuatkattsa nuyá̱ nuatak pujus nakitiaksha warí itiurkamnia armia nunasha Muisais Israer shuaran jintintrarmiayi.

Iwiá̱i̱ uchi túrunatin

^15-17 Áishmaṉ apatak yajutmakuitiat chíkich nuwe̱nka aneen tura chíkich nuwe̱nka aneechuyi. Nu áishmaṉ ashí warirí̱ ana nuna nakak ni uchirí̱n súsatniua nú tsawant jeamtai emka yajutmarman jimiará nakakma nuna súsatniuiti. Kame aneeshtai̱ nuwe̱ya nuna iwiá̱i̱ uchin áishmaṉchin takursámaitiak aneetai̱ nuwe̱ uchirí̱n iwia̱i̱ya nútikia súsatniun wakeriniaitiat antsu nakittiai̱ nuwa̱ uchirí̱ṉkia iwia̱i̱yaiti tusa chíkich uchirí̱ji̱a̱i̱ṉkia naṉkaamas nuyá̱ patatas súsatniuiti. Warí emka nuwa̱nmaya̱ iwiá̱i̱ yajutmarma asa nekas niṉkia patatnástiniaiti. Uunt Yus timia asamtai núnaka Israer shuaran Muisais ujakármiayi.

Ántichu uchi mátin

¹⁸ Núnisaṉ yaaksha ni uchirí̱ umichu tura kajen asamtai aparí̱ tura nukurí̱ chicharkar asutiamsha peṉké ántichua núnaka

¹⁹ ni aparí̱ nukurí̱ji̱a̱i̱ ni pépruri̱ wá̱i̱ti̱a̱i̱ri̱n chichaman iwiarin uuntri̱ pujuinia nui̱ júkiarti.

²⁰ Tura chicharainiak ‘Ju̱ ii uchirí̱ chichareamsha peṉké umirtamtsuji, kajenaiti, ántichuiti. Áyatik aṉkant wekas yurumkiní̱ tura nampekní̱ ajawiti’ tusa pepru úuntri̱n ujakarti.

²¹ Nuya̱ṉka ashí aents nui̱ pujuinia nu, kayaja̱i̱ tukurar máwarti. Túrawarmatai atumíin yajauch ana nuka wárik asakáittiarme. Tura ashí Israer shuar nuna antukar ashamiartatui.

Nená maamu itiurkatniuit

²² Tura aents peṉké yajauchin túramtai maam jiṉkiam numiniam nenamka

²³ ni aya̱shi̱ nui̱ṉ numiniam nenarum atsawe̱tsuk nu tsawantini̱ṉ iwiarsatniuitrume. Warí numiniam nenamua nuka Yusai̱ya̱ yumiṉkiaiti. Tura Uunt Yus atumín nuṉkan amasua nuna yajauch awajsa̱i̱ṉ tusarum túratniuitrume.