Mik. 7 - Yus Papí: Shuarja̱i̱ Yus Yamaram Chicham Najanamu

Israer shuar ti yajauch túruiniamu

¹ Ju̱sha urukakna esatái̱ araka júukar nuyá̱ juákuri̱sha juu júusar aya jú̱nik awajsamua núnis ajasja tura yuamnia chikichkisha juákchayi. Nu asamtai wikia ikiu neré̱ peṉkeri̱n yaya̱jai.

² Kame ju̱ nuṉkanmaṉka chikichkisha nekas enentáiji̱a̱i̱ Yusan enentáimtaka peṉké atsawai. Jú̱ aentsnumia̱ṉka chikichik áishmaṉkesha péṉkera túrinkia atsawai antsu aya maṉkartuatniunak wakeruiniawai tura aṉkant aṉkant ni írutramuri̱n e̱a̱min nekaja̱i̱ achinia nútikias anaṉka achiniawai.

³ Aya yajauch túratniunak unuimiátra áiniawai. Tura akupniúsha útsuiniawai tura sumamtikniusha akikiam sumamtikiainiawai. Nuyá̱ kakaram ainia nusha ni wakeramunak chichainiak awake enentáimtikiainiawai.

⁴ Nuamtak peṉkeri̱ ainia nuka jaṉkia núnis áiniawai nuyá̱ péṉker túriniaitjiai tuinia nusha nara núnis áiniawai. Maa, némas winiatai tusa iin árumna nútirmin yajauch etserin asakrumin asutniátin jeayi. Tuma asamtai yamaikia waurkattarme.

⁵ Ame amikrumsha nekas péṉker amikruapitia tu enentáimtusaip. Núnismek ame tsaníakmarmesha nekasapi tawa tiip tura ame nua̱rmiji̱a̱i̱ chichaakmesha anearam chichasta.

⁶ Uchisha ni aparí̱n umirainiatsui núnisaṉ nawantri̱sha ni nukurí̱n kajerainiawai tura najatí̱sha ni tsatsarí̱n kajernainiawai. Kame aentsu nemasri̱ ainia nuka ní shuarai̱ya̱ṉkete. Mat. 10:21,35-36

⁷ Antsu wikia winia Úunt Yusrunak iisan enentáimtustatjai. Winia uwemtikrin anturta asamtai winia Yúsrunak nákasan pujustatjai.

^8-13 Maa, winia nemasru íirsam warasaip. Warí, iniaruitkiunash nantakchattajak. Kame Uunt Yusai̱ yajauchin tura asan wi túramunam sumamtikruumam tura nekasa nuja̱i̱ métek turutmam Ni kajetáiri̱ncha katsuntrattajai. Winia nemasrusha núnaka wáinkiartatui tura ame Yusrumsha ¿tui̱ pujá? turutiarma nusha natsa̱a̱rartatui. Tsawant jeamtai ame péprurmi wenuke̱sha najanaktatui tura ame nuṉkem tesamua nusha Ejiptunmaya̱ juárkin entsa tímianai iwiaṉkántrattawai.

Israer nuṉke̱n waketki̱ ashí aentsja̱i̱ awakmakma

¹⁴ Ame murikrum kampunniunam ajapén niṉki matsatna nu, Uuntá ame shuarum ásarmatai péṉker jintintiam júkiarta. Kame yaunchu Pasannum tura Karaatnum ni murikrí̱n wáinkiarmia núnis wainkiamu ártí.

¹⁵ Wi Ejiptunmaya̱ ji̱i̱ran yarumkun aents túrachminian túrakun iniaktusarmiaj nútiksanak iniaktustatjarme.

¹⁶ Tura uunt nuṉka mátsatka ainia nusha ni kakarmari̱ji̱a̱i̱ṉkia naṉkaamas Yus túramun wáinkiar páchim enentáimprar natsa̱a̱rar chichakchamnia empekua núnis ajasártatui.

¹⁷ Napi tura nuṉká japinias wekain ainia núnis nuṉkan yuáwartatui. Ni ejamtairi̱nia̱ kuraṉkiar jíinkiartatui túruna ii Yusri̱ Uunt Yusan ti ashamkar nuyá̱ amincha ashampramkartatui.

Waitnenkartin Yus kantampruámu

¹⁸ ¿Ámiji̱a̱i̱ métek chíkich Yussha áwak? Kame yajauch túrutai̱sha tura Yusa aentsri̱ Nin enentáimtin juákaru ainia nuna tunaarí̱sha tsaṉkuram kajinmátniuitme. Warí Ni waitnenkartutariji̱a̱i̱ péṉker asa tuke kajekka pujuchuiti.

¹⁹ Antsu iinkia ataksha waitnentramprattaji tura ii yajauchiri̱ncha ni nawe̱ja̱i̱ nuṉká najá núnisaṉ ii tunaari̱ncha nayantsa kunarí̱ya̱ tímianai aju̱ṉ asakátramprattaji.

²⁰ Tura tí yaunchu ii aparí̱ Aprajámsha nuyá̱ Jakupsha nekas túrattajme tímiamna ímiatrusmek umimiám nuja̱i̱ métek waitnenkarturta.