Mik. 4 - Yus Papí: Shuarja̱i̱ Yus Yamaram Chicham Najanamu

Uunt akupin Misías Seúnnum pujustin

¹ Nuyá̱ amúamu tsawantinkia Uunt Yusa Je̱e̱ pujana nú naintkia chíkich naint ainia nuja̱i̱ naṉkamantu awajnástatui. Tura untsurí nuṉkanmaya̱ aents nui̱ tseke káunkartatui.

² Untsurí nuṉkanmaya̱ aents káunkar chichainiak “Winitiárum Uunt Yusa náintri̱n, Jakupa Yusri̱ Je̱e̱n wákarmi. Tura ni jinti̱n wekasatniun jintintrámawakrin Nin wekaasarmi” tiártatui. Warí akupkámu chichamka Seúnnumia̱ jiinkittiawai tura Uunt Yusa chichame̱nka Jerusaréṉnumia̱ antuukattawai.

³ Nuya̱ṉka Ni ashí nuṉka uunt mátsatkamu nuṉkanmaya̱n nuamtak iwiartunairarat tusa chichartiatui. Tura ashí nuṉkanmaya̱ ti kakaram ainia nuna, núnisaṉ ti arant pujuinia nú aentsnasha chichariartatui. Tura ni puya̱ri̱nkia pukuí arakmatia nútikruawar tura ni naṉkirí̱nkia arus tsupitiái̱ya nútikruawartatui. Nui̱ṉkia chíkich nuṉkanam pujuinia nu áentsja̱i̱ṉkia meset najanatniunka enentáimtuschartatui. Núnisaṉ mesetnum mánit unuimiátratniusha atsuttawai.

⁴ Ashí Akupin Uunt Yus chichaku asamtai tura nin awaktámkartincha atsá ásarmatai aṉkant aṉkant ni úwari̱ni̱ṉ tura ikiu ejetari̱n weamkar aṉkant pujusártatui.

⁵ Kame yamaikia ashí nuṉkanmaya̱ aents ni najanamu yusri̱n enentáimtuiniakuisha antsu iikia ii Uunt Yusri̱ umirkar Niji̱a̱i̱ tuke wekasattaji.

⁶ Uunt Yus chichaak “Nu tsawant átatna nuiṉkia murik shutuap ainia nunasha tura nakitraran yajauch awajsarmaj nunasha ikiankaran irurartatjai.

⁷ Nuya̱ṉka shutuap juákarma núnaka tura yajá tsakiṉmakarmaj nunasha uunt pepru ti kakaram awajsartatjai” tawai Uunt Yus. Tura nu tsawantinkia Seun nainnium Uunt Yus yamaisha tura ukunmasha nin tuke akupkartatui.

⁸ Jerusaréṉká, ame Israera kumpintri̱yá tura Seuná ejamtai̱yá, yaunchua núnismek ashí naṉkamantu úunt akupin atak ajastatme.

^9-13 Yamaikia nuwa̱ uchin takustaj tusa jatema najaimiana núnismek wáitsata. Maa, Seuna nawantri̱yá, yamaikia péprunmaya̱ṉka jiinkim Papirúnianam jeattame. Nui̱ ame nemasrum árak júukar jiṉkiar irumpramua nútikiamuitiat Uunt Yus túramuncha tura Ni chichame̱ncha nékainiatsna nuna uwejé̱nia̱ṉka Uunt Yus uwemtikramprattawai. ¡Maa, Seuna nawantri̱yá takakmasam trikiu pakartinia nútikiawarta! Túrakum untsurí nuṉkanmaya̱ aents tsai̱ tsai̱ awajsartatme. Túram ni wariri̱ atantrámu ainia nuka Uunt Yusna akantúkmaiti.