Mik. 1 - Yus Papí: Shuarja̱i̱ Yus Yamaram Chicham Najanamu

Samaria tura Jerusaréṉ asutiámu

¹ Jutanmaya̱ úunt akupin Jutam, Akaas tura Esekías pujusármia nu tsawantin Samaria tura Jerusaréṉ túrunatniun Muresétnumia̱ Mikíasan Uunt Yus iniaktusmia nuna Mikías etserkamia nuka ju̱i̱ti.

² Ashí aents nuṉká pujarmena nútiram ju̱ péṉker antuktarum. Uunt Yus Ashí Aentsu Uuntri̱ Ni íktusma Je̱e̱ya̱ṉ átum warí túraitrum núnaka paant ujatmáktatrume.

³ Warí Uunt Yus Ni pujamunmaya̱ jiinkí̱ nuṉká tara nainniumsha wekasattawai.

⁴ Tura naint ainia nusha Ni wajanmaja̱i̱ métek mikia jinium apeam miniá núnikiartatui. Núnisaṉ nuṉka pakasha miniak entsa ama̱a̱ru ajakártatui.

⁵ Kame ashí nusha Jakup péṉker umikchamuja̱i̱ nuyá̱ Israer shuara yajauch túramuri̱ji̱a̱i̱ nuka túrunattawai. Tura Jakupa umikchamuri̱sha ¿tuit? Nuka Samariachukait. Tura Israer shuara tunaarí̱sha ¿tuit? Nuka Jerusaréṉnumchakait.

⁶ Tuma asamtai Samarianka ashí emeskan yajauch awajsattajai. Túram uwa arakmatai nuṉka ajastatui. Nuyá̱ ni pépruri̱n je̱a̱ je̱a̱mkamu ainia nuna kayarí̱nkia pakanmaani̱ akaṉkétraran aya aeprukmari̱ṉ awajtúsartatjai.

⁷ Nui̱ṉkia atumí ántar yusri̱ najankamu ainia nusha mash tsaintrartatui. Núnisaṉ ashí ántar susamusha áesnakartatui. Túran najanamu yus ainia núnaka mash amukáran aya jú̱nik awajsartatjai. Warí tsanirmatai nuwa̱ nuna kuítri̱ji̱a̱i̱ṉchuk najankamuit. Tuma asamtai tsanirmaa kuítian achía núnis ataksha ajastatui.

^8-16 Tuma asamtai tí kuntuts enentáimpran úttiatjai. Túmakun yajasma shiniana nunikní̱ wekaitjiái. Warí ni yajaya̱ uchirí̱nkia tsuárchamnia ajakuiti túruna Jutá ímianai jeayi. ¿Emesnaktinkia Úunt Yusai̱ya̱ Jerusaréṉka wá̱i̱ti̱a̱i̱ri̱ya̱ tímianai ajasmánumsha itiurak péṉkernasha nákasat? Jutanam túramuja̱i̱ Israera tunaarí̱ nekanayi. Ame aneamu uchiram enentáimtusaram intiashim kesá kesá awajsata. Núnismek ame pakakamurmesha iwiaṉkarta. Warí niṉkia achirar aminí̱ya̱ṉka yajá yaruakartatui.