Mat. 8 - Yus Papí: Shuarja̱i̱ Yus Yamaram Chicham Najanamu

Jesus tunamárun tsuarma

¹ Jesus muraya̱ támatai untsurí shuar Nin nemariarmiayi.

² Nui̱ shuar tunamáru Jesusan jearin tikishmátramiayi. Tura chichaak “Uuntá, wakerakmeka tsuáramniaitme.”

³ Tutai Jesus uwejé̱ja̱i̱ antiṉ chicharuk “Wakerajai. Péṉker ajasta” tutai ni tunamármari̱ya̱ péṉker ajasmiayi.

⁴ Tura Jesus chichaak “Pai, peṉké etserkaip. Áyatik Yúsnan pujurniuí̱ iniakmamsam ashí shuar nekaawarti tusam Muisais timia nu susata” tímiayi.

Jesus suntara uchirí̱n tsuarma

⁵ Jesus Kapernáumnum waya̱mtai apachi suntara uuntri̱ Nin tarí

⁶ chicharuk “Uuntá, Winia uchir tampemar je̱á̱ tepes ti wait ajá tepawai”

⁷ tutai Jesus chicharuk “Ayu, wini̱n tsuartajai” tímiayi.

⁸ Takui̱ uuntri̱ chichaak “Uuntá, Ame ti naṉkamantu asam winia je̱a̱rui̱ waya̱chminiaitme. Áyatik ‘Péṉker ajasti’ tákumni̱ṉ winia uchir péṉker ajatrústatui.

⁹ Iistá, winiasha akuptuiniatsuk tura wisha suntaran akupénatsjak. Ju̱na ‘Wetá’ takui̱ wéawai. Tura chikichnasha ‘Winitiá’ tutai winiawai. Tura takartinian ‘Ju̱ túrata’ tutai umíawai” tímiayi.

¹⁰ Suntara uuntri̱ takui̱ Jesus “Ausha imiá shiiraitia” tu enentáimtak Nin nemarainian chicharainiak “Nekasan tájarme, Israer shuar Yusan tímiatrus enentáimtinian wáinkiachuitjiai.

¹¹ Maa, yajaya̱ untsurí shuar Yus akupeana nui̱ jeawar Aprajámja̱i̱sha Isakja̱i̱sha Jakupja̱i̱sha iruntrar yurumáwartatui.

¹² Tura Israer shuarsha Yusai̱ jeamnia áiniayat a̱a̱ kiritniunam ajapnawartatui. Nui̱ ti útkur tura tí waitsatin átatui” tímiayi.

¹³ Nuyá̱ Jesus suntara úuntri̱n chicharuk “Je̱e̱miin waketkitia. Nekas enentáimtursa asakmin uchiram péṉker ajatrámsattawai” tímiayi. Nu chichamtaik ni uchirí̱ péṉker ajatsamiayi.

Jesus Pitru tsatsarí̱n tsuarma

¹⁴ Jesus Pitru je̱e̱n we Pitru tsatsarí̱n tsuemuja̱i̱ jaa tepan wainkiamiayi.

¹⁵ Tura ni uwejé̱n antiṉkiam tsué̱mun michatramiayi. Tura nuwa̱ nantakin ashí ajamsarmiayi.

Jesus untsurí jáinian tsuarma

¹⁶ Kashi ajasmatai yajauch wakantrukarun Jesusan itiariármiayi. Tura nu yajauch wakaní̱n chikichík chichamja̱i̱ chicharas ji̱i̱ki̱ akupiármiayi. Ashí jáiniancha tsuararmiayi.

¹⁷ Yúsnan etserin Isayas “Ii pimpirmári̱ncha ii suṉkuri̱ncha jurutrámkimiaji” yaunchu timia nu uminkiati tusa nu túrunamiayi.Isa. 53:4

Jesus nemarsatin

¹⁸ Shuar untsurí Jesusan káutkarmatai “Entsa amain katiṉtai” tímiayi.

¹⁹ Nui̱ Israer shuara jintinniuri̱ Jesusan tarí chicharuk “Uuntá, Ame tui̱ wéam nui̱sha nemarsattajme”

²⁰ tutai Jesus chichaak “Ku̱janchmasha ni pujutái̱ri̱n tura chiṉkisha pasuṉke̱n takakainiatsuk. Tura Wi Yusai̱ya̱itiatan tepestintrusha atsawai” tímiayi.

²¹ Nin nemarniusha chicharuk “Uuntá, emka winia aparun iwiarsan ikiutjai”

²² tutai Jesus chicharuk “Nemartusta. Wakannium jaka ainia nu nú jakanka iwiarsarti” tímiayi.

Nasesha entsasha Jesusan umirkarma

²³ Nuyá̱ Jesus uunt kanunam eṉkemámtai ni unuiniamuri̱sha nemariarmiayi.

²⁴ Nui̱ nase ti kakaram násenkui antumiaṉ ti tamparintin ajas entsa kanunam yaráná piákmiayi. Túmai̱ṉ Jesuska kanunam kanú eṉkemiayi.

²⁵ Nuyá̱ ni unuiniamuri̱ sapijmiakar Jesusan ishintiainiak “¡Uuntá, waya̱ji uwemtikkiarturta. Jákartatji!” tiármiayi.

²⁶ Tuíniakui Jesus chichaak “¿Urukamtai timiá ashamarum Yus enentáimtutskesha?” tinia wajaki̱ nasencha entsancha chicharkamiayi. Túram mash miyaaku ajasmiayi.

²⁷ Nuna wáinkiar ni unuiniamuri̱ ti enentáimsar chichainiak “Ju̱sha ¿warí áentsuit? Nasesha entsasha Nin umirainiatsuk” tiármiayi.

Jataranam Jesus yajauch wakantrukun tsuarma

²⁸ Nuyá̱ Jesus entsá amaini̱ katiṉ Jataranam jeamiayi. Nui̱ jimiará shuar yajauch wakantruku jaka iwiartai̱nium matsamin Jesusan tariarmiayi. Mai̱ yajauch wakantruku ásar ti kajen ármiayi. Tuma asamtai nú jintianam yaaksha naṉkaamachu ármiayi.

²⁹ Nisha Jesusan wáinkiar kakantar chicharainiak “¿Warí pujuram iiji̱a̱i̱, Jesusá, Yusa Uchirí̱a. Tsawant jeatsa̱i̱ṉ iin amukratkataj tusamek taum?” tiármiayi.

³⁰ Nui̱ arant kuchi untsurí shushuṉmak yujarmiayi.

³¹ Yajauch wakancha Jesusan seainiak “Ji̱i̱ki̱ akupkartakmeka kuchiniam waya̱tin tsaṉkatkartukta” tiármiayi.

³² Tutai Jesus “Pai, wetarum” tímiayi. Yajauch wakancha shuara enentái̱ya̱ jíinkiar kuchiniam eṉkemáwarmiayi. Túramtai kuchi wáurkiar aráu̱ utsanamiayi. Nuyá̱ entsá iniaṉkar jakerarmiayi.

³³ Kuchí wainniusha nuna ashamkar péprunam tseke wéarmiayi. Nui̱ jeawar ashí túrunamun etserkarmiayi. Yajauch wakantrukun péṉker ajasmancha etserkarmiayi.

³⁴ Nuyá̱ ashí nú peprunmaya̱ shuar Jesusan iṉkiuṉtai tusar ashinkiarmiayi. Tura iṉkiuṉkar ni nuṉke̱ya̱ waketkiti tusar seawarmiayi.