Mat. 4 - Yus Papí: Shuarja̱i̱ Yus Yamaram Chicham Najanamu

Iwianchi uuntri̱ Jesusan anaṉkataj timia

¹ Nu túrunamtai Yusa Wakaní̱ Jesusan iwianchji̱a̱i̱ nekapmamtiksattsa aents atsamunam jukimiayi.

² Nui̱ kuaraintia tsawant káshisha tsawai̱sha yurumtsuk pujak tsukarmiayi.

³ Nui̱ iwianchi uuntri̱ Jesusan nekapsataj tusa tarí chichaak “Nekas Yusa Uchirí̱nkiumka ju̱ kaya apatuk najanata” tímiayi.

⁴ Tutai Jesus chicharuk “Yus Papinium áarmaiti ‘Aents aya apatkuja̱i̱ṉ iwiaaku pujuschamniaiti. Antsu Yus táman enentáimtuiniak nekas iwiaaku pujusártatui’ tawai” tímiayi.Muis. 8:3

⁵ Tutai iwianchi uuntri̱ Jerusaréṉnum jukí̱ Yusa Uunt Je̱e̱ taṉkiri̱ pakarí̱n iwiak

⁶ “Nekas Yusa Uchirí̱nkiumka ju̱yá̱ akaikim iniaata. Kame Yus Papinium áarmaiti ‘Yus ni suntari̱n akatar akuptúrmakmatai kayanam ajiintsumni̱ṉ weṉkurmaktatui’ tawai” tímiayi.YKan. 91:11-12

⁷ Tutai Jesus chicharuk “Núnisaṉ Yus Papinium áarmaiti ‘Ame úuntrum Yus “nekapsataj” tiip’ tawai” tímiayi.Muis. 6:16

⁸ Ataksha iwianchi uuntri̱ naint yakí̱ wájakmanum iwiakmiayi tura nuyá̱ ashí nuṉkanmaya̱ péprun shiira nuna iniaktusmiayi.

⁹ Tura chicharuk “Winia tikishmátrurakminkia ju̱na mash amastatjai.”

¹⁰ Tutai Jesus chichaak “Werumta iwianchi uuntri̱yá. Yus Papinium aarma awai ‘Ame Úuntrum Yusak tikishmátrata tura Niṉki shiir awajsata’ tawai” tímiayi.Muis. 6:13

¹¹ Tutai iwianchi uuntri̱ Jesusan ikiuak wémiayi. Túramtai Yusa suntari̱ tariar atsumamuri̱n súsarmiayi.

Jesus Kariréanam etserkamu

¹² Juaṉ sepunam eṉketui táman antuk Jesus Kariréanam wémiayi.

¹³ Tura Nasarétnum pujutsuk Kapernáumnum we pujusmiayi. Kapernáumsha Kariréa antumiaṉka kaanmatkari̱n pujumiayi. Tí yaunchusha Jakupu uchirí̱ Sapurúncha tura Neptarísha nu nuṉkanak nui̱ pujustaitsar achikiáruyayi.

¹⁴ Jesus nuna túramtai yaunchu Yúsnan etserin Isayas aarmia nu uminkiamiayi. Ju̱na áarmiayi

¹⁵ “Sapurúncha Neptarísha nayantsanam tíjiu̱ch Jurtan amaini̱ni nuṉkan achikiármiayi. Nuka Kariréaiti Israer shuarcha matsatainia nui̱.

¹⁶ Nu aents kiritniunam pujuiniayataṉ ti tsáapninian wáinkiarmiayi. Jákatniunam pujuiniai̱ tsáapin tsáapnirmiayi.” Isa. 9:1-2

¹⁷ Nuyá̱ Jesus étseruk “Yajauch túrutairam nekas enentáiji̱a̱i̱ enentáimsarum iniaisarum iwiarnartarum. Nayaimpinmaya̱ akuptai̱ tsawant jeatémayi” tímiayi.

Jesus namakan achinian unuiniamuri̱ awajsamu

¹⁸ Jesus Kariréa antumiaṉka kaanmatkari̱n wesa jimiará aentsun nuamtak yáchinniun wainkiamiayi. Chikichik Antresauyayi, chikitcha Semuṉnauyayi. Nu Semuṉ núnisaṉ Pítiur náartiniuyayi. Namakan achin ásar namakan nekaja̱i̱ naṉkíak yujarmiayi.

¹⁹ Nuna Jesus wáinkiar chicharainiak “Nemartustarum. Nemartakrumin yamái namak achia̱rmena nútiksanak shuar Yusna ártí tusan achin awajsatjarme.”

²⁰ Tutai ni nekari̱n ikiukiar Nin nemariarmiayi.

²¹ Nuyá̱ ishichik wésaṉ ataksha nuamtak yachinniun wainkiamiayi. Jakupu Juaṉja̱i̱ mai̱ Sepetéu uchirí̱ ármiayi. Nisha kanunam eṉkemsar ni nekari̱n ni aparí̱ji̱a̱i̱ iwiarainiak pujuriarmiayi. Tura Jesus “Nemartusta” tutai

²² nu chichamaik kanuncha tura aparí̱ncha ikiukiar Jesusan nemariarmiayi.

Jesus untsurí shuaran jintinma

²³ Ashí Kariréanam Jesus Israer shuar iruntai̱niam etserki̱ wémiayi. Yus ju̱ nuṉkanam akupkatin chichaman etserkamiayi. Tura untsurí suṉkurja̱i̱ jáinian ashí tsuármiayi.

²⁴ Ashí Siria nuṉkanam Jesus tsuákratman nekaawar ashí náṉkamas suṉkurja̱i̱ wáitin armia nuna Jesusan tsuarti tusa itiariármiayi. Ashí jáiniancha, najaimiancha, iwianchrukuncha, wáuruncha, emearuncha Jesus tsuármiayi.

²⁵ Tura untsurí shuar Jesusan nemariarmiayi. Kariréanmaya̱sha, Tekapurisnumia̱sha, Jerusaréṉnumia̱sha, Jutanmaya̱sha, Jurtan amaini̱ya̱sha Jesusan nemariarmiayi.