Mat. 26 - Yus Papí: Shuarja̱i̱ Yus Yamaram Chicham Najanamu

Jesus achiktin chicham jurusárma

¹ Jesus ashí nuna tinia umik ni unuiniamuri̱n chicharainiak

² “Atumsha nékarme, Paskua námper jeatin jimiarchik tsawant taasai. Nui̱ Aents Ajasuitjiana ju̱na krúsnum mantamnati tusar surutkartatui” tímiayi.

³ Nuyá̱ Yúsnan pujurniu peṉkeri̱n tura Israer shuara jintinniuri̱sha núnisaṉ Israer shuara úuntri̱sha Yúsnan pujurniu uuntri̱ Kaipiasa je̱e̱ á̱a̱ri̱n iruntrarmiayi.

⁴ Túrawar anaṉka achikiar maatai tusar Jesusan chichaman jurusármiayi.

⁵ Túrasha “Aents wajarar charaatum ajara̱i̱ṉ tusar nampertinkia túrashtai” tiármiayi.

Nuwa̱ Jesusan kuṉkuinian ukatramu

⁶ Jesus Petanianam pujus tunamáru Semuṉka je̱e̱n pujumiayi.

⁷ Nui̱ pujái̱ nuwa̱ kuṉkuin tí kuítian arapástru tutai kaya najanamunam piákun itiamiayi. Tura Jesus awa̱sa yurumtainiam yurumátaj tusa pujan tarí nu kuṉkuinian ukatramiayi.

⁸ Túramtai ni unuiniamuri̱ nuna iisar kajerkar chicharainiak “¿Urukamtai au kuṉkuin imiá kuítniasha ántrasha wasurea?

⁹ Antsu ti kuitji̱a̱i̱ suruk shuar kuítrincha ainia nuna yáitskesha” tiármiayi.

¹⁰ Jesus tuinian anturak chicharainiak “¿Urukamtai ju̱ nuwa̱ yajauch enentáimtarum? Túrutana ju̱ ti péṉkeran túrayi.

¹¹ Kuítrincha tuke atumji̱a̱i̱ pujushtatuak. Antsu Wikia atumji̱a̱i̱ tuke pujushtatjai.

¹² Ju̱ nuwa̱ kuṉkuinji̱a̱i̱ ukatrura ju̱ka Wi iwiarnastin asamtai áitkiarayi.

¹³ Nekasan tájarme ashí nuṉkanam uwempratin chicham etsernakui tuke ju̱ nuwa̱ pachinias etsernaktatui. Túramtai ni túramuri̱ kajinmankishtatui” tímiayi.

Jútas Jesusan surukma

¹⁴ Nuyá̱ Jesus tuse unuiniamunmaya̱ chikichik ni naari̱ Jútas Iskariúti Jesusan suruktaj tusa Yúsnan pujurniu úuntri̱i̱n wémiayi.

¹⁵ Tura jearí chicharuk “Jesusan achikia amaakui ¿urutmák akirkaintrum?” takui̱ traintia kuítian akikiármiayi.

¹⁶ Tura nu akikiam Jútas itiurak Jesusan súsaraintiaj tu enentáimias wekaimiayi.

Kristu jakamu enentáimtustin námper

¹⁷ Karin eṉketáchma páṉkan yurumáinia nú namper yama náṉkamkui Jesusa unuiniamuri̱ tariar aniasarmiayi “¿Tui̱ Paskua namper iwiarakrin yurumáttam?” tiármiayi.

¹⁸ Tuíniakui Jesus chichaak “Péprunam wetarum. Nui̱ chikichík shuara je̱e̱n jearum titiarum ‘Uunt chichaak “Winia tsawantur ishichik ajasái. Tuma asan Paskua namperan winia unuiniamurja̱i̱ ame je̱e̱miin yurumátaj” tawai’ titiarum” tímiayi.

¹⁹ Tutai ni unuiniamuri̱ wéar Jesus timia nuna umikiar Paskua nampertin yurumátniun iwiararmiayi.

²⁰ Tura kashi ajasái Jesus ni tuse unuiniamuri̱ji̱a̱i̱ ekemas yurumuk pujumiayi.

²¹ Nui̱ yurumáiniai̱ Jesus chichaak “Nekasan tájarme, átum pujarmena ju̱yá̱ chikichik Winia surutkattawai.”

²² Nuna takui̱ ti kúntuts enentáimprar mai̱ aní̱ awajiármiayi “Uuntá, ¿wíashitiaj?”

²³ Mai̱ tu awajénam Jesus chichaak “Wi nú piniṉnumaṉ jimiartukan yuajna ju̱ Winia surutkattawai.

²⁴ Wi Aents Ajasu asan Yus Chicham tana nuja̱i̱ métek túrunattajai. Túrasha shuar Winia surutkattana nuka ti asutniátin asa akiinmainchu ajakuiti” tímiayi.

²⁵ Nuyá̱ Jútas suruktaj tana nu Nin chichaak “Uuntá nuikia ¿wíashitiaj?” takui̱ Jesus “Ee, nekas ámetme” tímiayi.

²⁶ Tura yurumuk pujuiniai̱ Jesus yurumkan achik Yusan yumiṉsamiayi. Tura puur ni unuiniamuri̱n suíniak chichaak “Ju̱ yuátarum. Ju̱ka winia aya̱shruiti” tímiayi.

²⁷ Nuyá̱ piniṉkian achik Yusan yumiṉsamiayi. Tura suíniak chichaak “Ju̱sha ashí umartarum.

²⁸ Ju̱ka winia numparuiti. Tura winia numpar puármatai yamaram chicham nekas uminkiattawai tawai. Tura puármatai untsurí shuara tunaari̱n tsaṉkurattawai.

²⁹ Tura ju̱na tájarme. Yamaiya̱ ju̱ya̱ṉka uwa yumiri̱nkia atakka peṉké umarchattajai. Antsu Winia Apar akupeamunam atumji̱a̱i̱ yamarman umartatjai” tímiayi Jesus.

Jesus Pítrun natsantrurtatme tusa ujaamu

³⁰ Yus kantan kantamáwar umikiar Uriwiu nainnium wéarmiayi.

³¹ Nui̱ Jesus chichaak “Ju̱ kashi átum Winia ashí natsantrurtatrume. Kame Yus Papinium áarmaiti ‘Murikiu wáinniun mantuattajai túram murik pisarartatui.’ Sak. 13:7

³² Tura nantakin Kariréanam Wi émkattajai átum wéatsrumin.”

³³ Takui̱ Pítiur chichaak “Chíkich natsantramainiakuisha wikia túrashtatjai”

³⁴ tutai Jesus chichaak “Nekasan tájame ju̱ kashi atash shiniatsa̱i̱ṉ menaintiú natsantrurtatme” takui̱

³⁵ Pítiur chicharuk “Maa, Ámiji̱a̱i̱ métek mántuiniakuisha peṉkesha natsantrashtatjame.” Ashí ni unuiniamuri̱ núnisaṉ tiármiayi.

Jesus Jitsemaní ajanam Yus áujsamu

³⁶ Nuyá̱ Jesus ni unuiniamuri̱ji̱a̱i̱ Jitsemaní ajanam jeá chichaak “Ju̱i̱ pujusrum nákarsatarum. Aranta ai̱ wena Yusan áujsataj.”

³⁷ Tinia Pítruncha tura mai̱ Sepetéu uchirí̱ jukí̱ wémiayi. Nui̱sha ti kúntuts enentáimiuk wake mesekmiayi.

³⁸ Nuyá̱ Jesus chichaak “Ti kúntuts jakamnia enentáimjiai. Atumsha ju̱i̱ pujusrum Wiji̱a̱i̱ métek iwiáa pujutarum.”

³⁹ Tinia Jesus arantach we nui̱ tikishmar tsuntsumá Yusan áujeak chichaak “Winia Aparu, Wi túrunatniua nu nusháa iwiaramniaitkiuiṉkia ju̱ wáitsatniua nu tsaṉkatrukaip. Tura Wi wakeraj núniska áchati antsu Ame wakeram núnis atí” áujuk tímiayi.

⁴⁰ Nuyá̱ menaintiú unuiniamuri̱ pujuiniamunam waketki̱ kanúu pujuinian jeariar Pítrun chicharuk “Átumka chikichik úraksha Wiji̱a̱i̱ iwiáa pujutin ¿tujintkiármek?

⁴¹ Iwiasrum Yus áujsatarum. Tunáa nupettamkairap. Yajauch túramu nupettamka̱i̱j tusarum iwiáa pujusrum Yus seatarum. Enentáiminkia ti wakeriniaitrume túrasha aya̱shim pimpiruiti.”

⁴² Tinia ataksha we Yusan áujeak chichaak “Winia Aparu, Wi imiá nekasan wáitsatniuitkiuiṉkia nui̱kia Ame wakeramna nu atí.” Tu áujsamiayi.

⁴³ Nuyá̱ ataksha taa ni menaintiú unuiniamuri̱ tarimiayi. Tura kari̱ ti núpeteam ataksha kanúu pujuarmiayi.

⁴⁴ Túmainiakui nin ikiukí̱ ataksha aujmia núnisaṉ Yusan áujsataj tusa waketkimiayi.

⁴⁵ Áujas umik ni unuiniamuri̱ pujamunmaṉ wémiayi. Tura chichaak “Antsu yamaikia kanarum ayampratarum. Ura jeayi. Wi Aents Ajasu ai̱ṉ yajauch shuarnum surunkatin jeayi.

⁴⁶ Wari nantaktiarum. Wéartai. Súrutna nu winiawai” tímiayi.

Jesus achikma

⁴⁷ Jesus tu chichái̱ Jútas támiayi. Nusha ni unuiniamuri̱yayi. Núja̱i̱sha untsurí shuar puya̱ja̱i̱sha tura numiji̱a̱i̱sha winiarmiayi. Nu shuaran Yúsnan pujurniu úuntri̱sha tura Israer shuara úuntri̱sha akupka ármiayi.

⁴⁸ Jútas, Jesusan súrana nu Jesusai̱ jeatsuk nu shuaran chicharainiak “Wi miniakkan mukunattajna núiti. Nu achiktarum” tímiayi.

⁴⁹ Nu asamtai Jesusan tarí “Winiajai Uuntá” tinia mukunámiayi.

⁵⁰ Takui̱ Jesus chichaak “Amikru ame túrataj tusam winitnium nu túrata.” Nuyá̱ achikiar Jesusan júkiarmiayi.

⁵¹ Nui̱ chikichik Jesusa tsaníakmari̱ ni puya̱ri̱n ukuiniak shuara kuishi̱n tsupirkamiayi. Nu shuarsha Yúsnan pujurniu uuntri̱ takarniúri̱yayi.

⁵² Túramtai Jesus chichaak “Puya̱rum eṉkeata. Ashí puya̱ja̱i̱ mánainia nusha puya̱ja̱i̱ mantamnashtatuak.

⁵³ Wi wakeraknaka winia Aparun timiá untsurí Yusa suntari̱n seakui páchitsuk akuptúrkainti. ¿Nu nékatsmek?

⁵⁴ Tura nuna túramtaiṉkia Yus Chichamnum tana nu uminkiachainti” tímiayi.

⁵⁵ Nuna tinia Jesus nu shuaran chicharuk “Átum kasá achiktaj tawa nútiksarum puya̱ja̱i̱sha numiji̱a̱i̱sha tarutniurme. Kame ashí tsawantai̱ Yusa Je̱e̱n atumji̱a̱i̱ pujusan Yus Chichaman etsermiajai. Nui̱sha achirkachmarme.

⁵⁶ Antsu yamaikia yaunchu Yúsnan etserin áararmia nu uminkiati tusarum jú̱tikrarme.” Tú timiayi Jesus. Nuyá̱ ni unuiniamuri̱ Jesusan Níniak ikiuiniak pisararmiayi.

Yúsnan pujurniu úuntri̱i̱n Jesusan júkiarma

⁵⁷ Shuar Jesusan achikiármia nusha Kaipiasai̱ júkiarmiayi. Nusha Yúsnan pujurniu úuntri̱yayi. Nui̱sha Israer shuara jintinniuri̱sha Israer shuara uuntri̱ armia nusha irunar matsamármiayi.

⁵⁸ Tura Pítiur árantak Jesusan nemarkin uuntri̱ je̱e̱n a̱a̱ri jeamiayi. Tura suntarja̱i̱ tsaniṉ pujusmiayi Jesusan itiurkartiṉ tusa.

⁵⁹ Tura Yúsnan pujurniu úuntri̱sha Israer shuara úuntri̱sha tura ashí naamka uunt armia nusha Jesusan wait chichamja̱i̱ sumamtikiatai tusar áujmatiarmiayi.

⁶⁰ Untsurí shuar ántar tsanumpruiniakuisha mátin chichaman nekaracharmiayi. Nuyá̱ jimiará shuar tsanumpruiniak

⁶¹ tiármiayi “Ju̱ áishmaṉ chichaak ‘Yusa Uunt Je̱e̱n yumpuaran ataksha menaintiú tsawantin jeamminiaitjiai’ tu chichamai” tiármiayi.

⁶² Nuyá̱ Yúsnan pujurniu uuntri̱ wajaki̱ Jesusan chichaak “¿Áimtsumek. Turamainia nusha anturmammek?” tímiayi.

⁶³ Túrasha Jesus tuke áimchamiayi. Túmakui̱ Yúsnan pujurniu uuntri̱ chicharuk “Nekas iwiaaku Yusa náari̱i̱n tájame nekasa nu táchakminkia Yus iirmastatui. ¿Ame Krístukaitiam. Yusa Uchirí̱ṉkaitiam? Paant etserkata” tímiayi.

⁶⁴ Tutai Jesus chichaak “Ee, ame támena núitjiai. Tura ataksha atumín tájarme, wi Aents Ajasu asan ti kakaram Yusa untsuurí̱ni̱ pujái̱ waitkiattarme. Tura yuraṉminiam winiai̱sha waitkiattarme” tímiayi.YKan. 110:1; Tan. 7:13

⁶⁵ Nuyá̱ Yúsnan pujurniu uuntri̱ nuna antuk ti kajek ni pushiri̱ ja̱a̱k chichaak “Ju̱ áishmaṉ ni chichame̱ja̱i̱ Yusan nekas yajauch chicharniuiti. Nuya̱sha ¿warí atsumajⁱ? Atumsha Yusan yajauch chicharu antukcharmek.

⁶⁶ ¿Waritia enentáimprum?” tutai “Sumamayi. Mantamnati” tiármiayi.

⁶⁷ Tiar yapiniam usukiáwarmiayi. Tura awattiarmiayi. Chikitcha yapiniam awati wishikiainiak tiármiayi.

⁶⁸ “Ame Krístuchukaitiam. ¿Ya awattama? íitsuk nekaata.” Tu chichariarmiayi.

Pítiur Jesusan natsantramu

⁶⁹ Nu túmai̱ṉ Pítiur a̱a̱ pujái̱ nuwa̱ chikichik jearí chichaak “Amesha ju̱ Kariréanmaya̱ Jesus tutaiji̱a̱i̱ wekaichmakam.”

⁷⁰ Tutai Pítiur ashí ántuiniamunam chichaak “Nékatsjai. ¿Warittsuk chichaam?”

⁷¹ Nuna tinia jiinkitiaj tusa weai̱ chíkich shuar wainiak nui̱ pujuinian chichaak “Au áishmaṉsha Nasarétnumia̱ Jesusja̱i̱ wekainiuiti.”

⁷² Tutai Pítiur ataksha chichaak “Nekasan tájarme ju̱ áishmaṉkan peṉké nékatsjai” tímiayi.

⁷³ Árusaṉ nui̱ pujuarmia nu Pítrun tariar chicharainiak “Nekas amesha auja̱i̱ wekaimiame. Warí, chichammiji̱a̱i̱ páantaiti.”

⁷⁴ Tutai Pítiur nekas Yus iirui tusa chichaak “Nu áishmaṉkan peṉké nékatsjai” tímiayi. Nuna chichak úmisa̱i̱ṉ atash shiniukmiayi.

⁷⁵ Túramtai Pítiur Jesus nuik timia nuna “Atash shiniatsa̱i̱ṉ menaintiú natsantrurtatme” enentáimpramiayi. Pítiur nuna enentáimiar jiinkí̱ we tí kuntuts enentáimias wáitiak yapá nupa̱ nuní̱ nekapmamar útmiayi.