Mat. 23 - Yus Papí: Shuarja̱i̱ Yus Yamaram Chicham Najanamu

Jesus Pariséuncha jintinniuri̱ncha nétsetrume tama

¹ Jesus ni unuiniamuri̱ncha tura ashí shuarnasha chicharainiak

² “Israer shuara jintinniuri̱sha tura Pariséusha Muisais akupkámun paant ujatmainiawai.

³ Tuma asamtai tuinia nu umirkatarum. Túrasha ni túruinia nu jumamkiirap. Nu shuar shiir chichainiayat nusháa túrin áiniawai.

⁴ Ti itiurchat ana nuna akupénak ti emeram entsaktinia áintsaṉ aentsun apujtuiniawai. Túrasha chikichik uwejé̱ja̱i̱sha ishichkisha takuitniun nakitiáiniawai.

⁵ Aya shuar íirsarti tusar ashí túruiniawai. Ashí shuar péṉker enentáimturarti tusar Yus Papin nijia̱i̱niumsha tura kunturi̱ncha ti waṉkaram awajsar anujak yujainiawai. Tura nu arantcha pushiri̱ shíirmach sasariarman ashí shuarja̱i̱ naṉkaamas nuntuarun awajás wekainiawai.

⁶ Nampernumsha péṉker iwiaramunam pujustinian wakeruiniawai. Iruntai̱nmasha naṉkamantu ajasa pujustinian wakeruiniawai.

⁷ Jintiá wekainiaksha ashí aents áujtuiniak jintinkiartiniá turutiarti tusa wakeruiniawai.

⁸ Túrasha átumka ashí shuar jintinkiartiniá turutiarti tusa enentáimsashtiniaitrume. Átumka nuamtak yáchintrume. Átumka chikichik jintinkiartin ni naari̱ Kristu takakrume. Nu asamtai jintinkiartiniá turamcharmin áiniawai.

⁹ Ju̱ nuṉkanmaya̱ shuar ‘Aparu’ tiirap. Nayaimpiniam chikichik pujana nu atumí Aparí̱nti.

¹⁰ Atumí uuntri̱ aya Krístuk asamtai ‘Uuntru’ turamcharmin áiniawai.

¹¹ Antsu átum írutkamunmaya̱ uunta nuka péejchach átiniaiti.

¹² Shuar naṉkamaku ajastaj tákuiṉkia Yus nin péejchach awajsattawai. Antsu péejchachia nuna Yus naṉkamantu awajsattawai” tímiayi.

¹³ “Maa aneartarum jintinniutirmesha, Pariséutirmesha. Ántrarum shiir chichamtiniaitrume. Yus akupeamunam waya̱tin waiti epenniuitrume. Atumsha waya̱tsuk chikitcha waya̱taj tuinia nusha suritniuitrume.

¹⁴ Maa aneartarum jintinniutirmesha, Pariséutirmesha. Ántrarum shiir chichamtiniaitrume. Wajé̱ je̱e̱ atankírum aents enentáimturara̱i̱ṉ tusarum ti esaram Yus áujtiniaitrume. Túrin asarum átum ti asutniátniuitrume.

¹⁵ Maa aneartarum jintinniutirmesha, Pariséutirmesha. Ántrarum shiir chichamtiniaitrume. Nuṉkanmasha nayantsanmasha yajá wekainiuitrume chikichík shuar winí̱ nemartusat tusarum. Tura atumí nemasri̱ ajasmatai atumji̱a̱i̱ naṉkaamas jinium sumamamnia awajearme.

¹⁶ Aneartarum átumka. Jintinkiartiniaitiatrum nékachu asarum kusurua áiniuitrume. Ju̱ jintíarme ‘Shuar nekasan tajai tusa Yusa Je̱e̱n páchiakka ni tana nuna umitsuk ikiukminiaiti. Antsu nekasan tajai tusa Yusa Je̱e̱n kuri ana nuna páchiakka ti nekas umiktiniaiti’ tíniuitrume.

¹⁷ Nétsetrume. Yúsja̱i̱ṉkia ashí kuri ántrachukait. Antsu Yusa Je̱e̱n írunna nuka aya nuiṉ ikiusma asa Yusna ajasuíti. Tuma asamtai kuriji̱a̱i̱ naṉkaamas Yusa Je̱e̱ enentáimtustiniaiti.

¹⁸ Nu arantcha tíniuitrume ‘Shuar nekasan tajai tusa taṉkú maa Yus áestutai̱n páchiakka ni tana nuna umitsuk ikiukminiaiti. Antsu Yus áestutai̱niam namaṉ patasman páchiakka ti nekas umiktiniaiti’ tíniuitrume.

¹⁹ Nétsetrume. Peṉké namaṉ Yusja̱i̱ ántrachukait. Aya Yus áestutai̱niam patasma asa nu namaṉ enentáimtuschatniukait.

²⁰ Enentáimpratarum. Shuar nekasan tajai tusa Yus áestutai̱n páchiakka aya áestutainiak páchiatsui antsu áestutai̱ncha tura nui̱ patasmancha mái̱ metek páchiawai.

²¹ Núnisaṉ shuar Yusa Je̱e̱n páchiakka aya nunak páchiatsui antsu Yus nu je̱a̱nam pujú asamtai nunasha páchiawai.

²² Núnisaṉ shuar nayaimpin páchiakka Yus pujutaincha tura Yus nui̱ pujana nunasha páchiawai.

²³ Maa jintinniutirmesha, Pariséutirmesha aneartarum. Ántrarum shiir chichamtiniaitrume. Kuminiu nuke̱sha, anisa nuke̱sha, menta nuke̱sha tias akantram chikichik akankámu Yus súwitrume. Nuka péṉkeraiti, ikiukchatniuiti. Túrayaitrum nekas péṉker túratniua nu túrutsuk ikiuwitrume. Yus nekas enentáimtustincha, waitnentáimturtincha tura tuke péṉker túratniusha enentáimtsuk ikiuwitrume.

²⁴ Átumka jintinkiartiniaitiatrum nékachu asarum kusurua áiniuitrume. Kutanam yajasmach eṉketu wáinkiurmeka júwitrume. Túrayatrum kamiyu wáinkiurmeka kawái naṉkaamas uunt ai̱ṉ takamtsuk kú̱jawitrume.

²⁵ Maa jintinniutirmesha, Pariséutirmesha aneartarum. Ántrarum shiir chichamtiniaitrume. Átumka tsapasha piniṉsha initiaani̱ nijiatsuk aya pátatek nijiawitrume. Núnisrum pátatek shiir awajmámniuitrume tura enentáiminkia kasamkatniusha tura chikichna wakeruktincha nuja̱i̱ piákuitrume.

²⁶ Pariséutirmeka kusurua ániuitrume antsu emka initiaani̱ tsapasha piniṉsha nijiaktarum. Túrakrumni̱ṉkia pátatkesha mai̱ péṉker átatui. Núnisrum atumsha atumí enentái̱n ana nu shiir awajsarum pátatkesha shiir átatrume.

²⁷ Maa jintinniutirmesha, Pariséutirmesha aneartarum. Ántrarum shiir chichamtiniaitrume. Iwiarsamu pújuja̱i̱ yakarar shiir awajsamua áiniuitrume. Á̱a̱ni̱ṉkia shiir áiniayat initkia jaká ukunchí̱ piákuiti.

²⁸ Atumsha núnisaitrume. Chíkich shuar íismaka ti shiira ániuitrume. Túrasha atumí enentái̱nkia ashí mui̱jmiai̱ piákuiti.

²⁹ Maa jintinniutirmesha, Pariséutirmesha aneartarum. Ántrarum shiir chichamtiniaitrume. Yaunchu Yúsnan etserin iwiarsamunam átumka shiir enentáimtakrum je̱a̱ je̱a̱mkaitrume. Tura péṉker shuar yaunchu jákarusha shiir enentáimturtaj tusarum ni iwiarsamu shiir awajearme.

³⁰ Nuja̱i̱ nekas atumsha sumamaitrume. Warí núja̱i̱ṉkia átumka ‘Iikia Yúsnan etserniun máwarua nuna uchirí̱ntji’ tárume.

³¹ Atumsha nuja̱i̱ ti paant chichaarme ‘Ii we̱a̱tri̱ Yúsnan etserniun máwar tunáa túrin ármiayi’ tárume.

³² Wats, atumí we̱a̱tri̱ naṉkamawarmia nu átumka umiktarum” tímiayi Jesus.

³³ “Napia ániuitrume. Shuar aya yajauch awajniuitrume. Túmatirmesha Yus yajauch túrin shuaran jinium akupkartatna nuyá̱ ¿itiurak uwempratarum?

³⁴ Untsurí shuaran akuptúktatjarme. Yúsnan etserniuncha, ti nekaancha, jintinkiartinniasha akuptúktatjarme. Tura atumsha chíkich máattarme, chikitcha krúsnum ajintruarum máattarme, chikitcha iruntai̱ je̱a̱nam asutiáttarme tura chikitcha ashí nuṉkanam áintrattarme.

³⁵ Nu tura asarum péṉker shuara numpé̱ puarma nuja̱i̱ átum sumamattarme. Yámankamtaik Apir tí peṉker shuáraitiat mámuyayi. Tura ukunam Perekíasa uchirí̱ Sakarías atumí uuntri̱ Yusa Je̱e̱ ámanum Yus áestutai̱n ajapén átenkamunam máwarmiayi. Wats, Apir mámunmaya̱ Sakarías mámunam ashí péṉker shuar ti untsurí máamuja̱i̱ sumamattarme.

³⁶ Nekasan tájarme, yamái pujuinia nú shuar ashí nuja̱i̱ sumamawartatui” tímiayi Jesus.

Jerusaréṉnumia̱ shuaran Jesus aneak utma

³⁷ “Jerusaréṉnumia̱tirmeka, Yúsnan etserin máiniaitrume. Yus akatar akuptúrmakmasha kayaja̱i̱ tukuram máiniaitrume. Túrin árumni̱ṉ waitnentajrume. Atash ni uchirí̱n weana áitkiasnak wéartinian wakerimjiarme tura nakitramarme.

³⁸ Iistarum. Ame pépruram ajapamuiti.

³⁹ Tura ‘Yusa náari̱i̱n winiana nu, shiir atí’ YKan. 118:26 títiatrumna nu tsawant jeatsa̱i̱ṉ peṉké wáitkiashtatrume. Nuna tájarme” tímiayi Jesus.