Mat. 22 - Yus Papí: Shuarja̱i̱ Yus Yamaram Chicham Najanamu

Métektaku chichamja̱i̱ nuatnaiyamun Jesus áujmatsamu

¹ Jesus ataksha áujmatuk ju̱na tímiayi

² “Yus akupeamunam pachinkiartin jú̱nis enentáimpramniaiti. Úunt akupin ni uchirí̱ nuateakui nampermamai.

³ Túrak ni takarniúri̱n ipiaamautarum tusa akupkarmai. Tura ipiaamusha nakitrarmai.

⁴ Ataksha chíkich takarniuncha ipiaamakrum ju̱ titiarum tusa akupkarmai. ‘Mash yurumkan iwiarajai. Waakarsha taṉkur ajaermasha kajeṉma áiniawai. Tuma asamtai ashí nuatnaiyamu namper iwiaramunam winiarti túramui titiarum’ timiai.

⁵ Támaitiat nú ipiaamusha nakitrarmai. Chikichik ni nuṉke̱n wemai. Chikitcha kuítian suruktinian wemai.

⁶ Chikitcha ipiakratniun achikiar yajauch awajsarmai tura chikichnaka máwarmai.

⁷ Túramtai úunt akupin ti kajek ni suntari̱ mash mátarum túrarum ni je̱e̱ mash ekemáktarum tusa akupkarmai.

⁸ Nuyá̱ ataksha ni takarniúri̱n akupkámai. ‘Nuatnaikiatin námper mash iwiaramuiti. Tura nu ipiaamu winichmin armai.

⁹ Tuma asamtai pepru jintí̱ werum ashí shuar náṉkamas wáintrum nu ipiaatarum’ timiai.

¹⁰ Takui̱ takarniúri̱ jíinkiar pepru jinti̱n wajainian yajauch shuarnasha péṉker shuarnasha ashí ipiaawarmai. Túramtai je̱a̱ piakmai.

¹¹ Nuyá̱ úunt akupin ipiaamun íisartaj tusa waya̱mai. Nui̱ shuaran péṉker iwiarmamprachun wainkiamai.

¹² Tura timiai ‘Umpá, ¿urukamtai nuatnaiyamunam entsatái̱ pushí entsatsuk waya̱m?’ Tutai nu áishmaṉ tákamtak pujusmiayi.

¹³ Nuyá̱ úunt akupin yurumka ajaaman chicharuk ‘Achikrum nawe̱nmasha uwejnumsha jiṉkiarum a̱a̱ jí̱i̱krum kiritniunam ajapatarum. Nui̱sha ti úttin tí waitsatin átatui’ timiai.

¹⁴ Kame untsurí ipiaamu áiniawai antsu ishichik achikma áiniawai” tímiayi.

Uunt akupin Sésar akiktin

¹⁵ Nuyá̱ Pariséu chichaman najatawar itiurak uyu̱matkiakaintiaj tusar tiármiayi.

¹⁶ Túrawar ni shuari̱ncha tura akupin Irutisa nemarniuri̱sha Jesusan akuptúkarmiayi. Nisha jeariar Jesusan chicharainiak “Uuntá, amesha nekas chicham chichaame. Nu nékaji. Chíkich shuar tuinia nu ántutsuk nekasam Yus Chicham jintíame. Shuar shiir enentáimturarat tusam jintíatsme.

¹⁷ Tuma asamtai ju̱ nekaatai tusar wakeraji. ¿Uunt akupin Sésar akikminkiait?” tiármiayi.

¹⁸ Jesus ni yajauch enentáiji̱a̱i̱ anintramun nekáa chichaak “Aya shiir chichamtiniaitrume. ¿Urukamtai uyu̱matkiarturtin wakerutarum? tímiayi.

¹⁹ Wats Sésar akiktinia nú kuit itiartitiarum” takui̱ chikichik kuítian itiariármiayi.

²⁰ Nuna iis Jesus anintrak “¿Ju̱i̱ yana yapimpiait tura yana naari̱ áarmait?”

²¹ Tutai “Uunt Sésarna” tiármiayi. Tuíniakui Jesus chicharainiak “Nuikia uunt Sésarna nu, Sésar susatarum. Tura Yusna nusha Yus susatarum” tímiayi.

²² Tura nuna antukar ti enentáimprarmiayi. Tura ikiuiniak wéarmiayi.

Jesusan jakamunmaya̱ nantaktin anintramu

²³ Nu tsawantai̱k Satuséusha Jesusan tariarmiayi. Satuséuka jakamunmaya̱ nantakchatniuiti tuíniawai. Nuna tiniu ásar ju̱na Jesusja̱i̱ áujmatsarmiayi.

²⁴ “Uuntá, Muisais ju̱na áartampramiaji ‘Áishmaṉ uchin yajutmatsuk jakamtaiṉkia ni yachi̱ nu nuwa̱n nuatak ni yachi̱n yajutmatrati’ tu áarmiayi.Muis. 25:5

²⁵ Ayu, íi shuarnum siati yáchintin armai. Iwiá̱i̱ nuatak uchin yajutmatsuk jakamai. Tura waje̱n ni yachi̱n ikiurkimiai.

²⁶ Tura nisha nuatak uchin yajutmatsuk jakamai. Tura chikitcha núnisaṉ jakamai. Tura chikitcha siati armia nu ashí nuatkar jákarmiayi.

²⁷ Nuyá̱ nuwa̱sha jakamiayi.

²⁸ Jakamunmaya̱ nantakiartatna nui̱sha nekassha ¿yana áishri̱n ati? Ashí nin nuatkacharmakia” tiármiayi.

²⁹ Tuíniakui Jesus chichaak “Yus Chichamsha nékachkuram tura Yusa kakarmari̱sha nékachkuram nantaktin atsawai tákuram ti awajiarme.

³⁰ Nekaatarum. Jakamunmaya̱ nantakiaruka nuatkachartatui. Antsu Yusa suntari̱ nayaimpiniam pujuinia núnisar núwencha pujusártatui.

³¹ Túrasha jakamunmaya̱ nantakiartatna nu nekaatajtsa wakerakrumka ju̱ enentáimsatarum. Muisais aarma nu áujsachukaitrum. Jú̱nis áarmiayi

³² ‘Wikia Aprajáma Yúsri̱ntjiai, Isaka Yúsri̱ntjiai, Jakupu Yúsri̱ntjiai.’ Warí, Yus jaká Yúsri̱nchuiti. Antsu iwiaaku ainia nuna Yúsri̱nti” tímiayi.Jiin. 3:6,15

³³ Ashí aents tu jintíamun antukar ti enentáimprarmiayi.

Yus akupkámu imiá enentáimtustin

³⁴ Satuséu Jesusan ái̱ktinian tujintkiarmatai Pariséu nuna antukar iruntrarmiayi.

³⁵ Tura chikichik Pariséu jintintin asa Jesusan uyu̱mtikiataj tusa aniasmiayi

³⁶ “Uuntá, Yus akupkámu ¿túa imiá naṉkaamas enentáimtustiniait?”

³⁷ Tutai Jesus chichaak “Ju̱i̱ti, ‘Ame Yúsrum takamtsuk enentáimji̱a̱i̱ aneeta. Ashí ame wakanmiji̱a̱i̱sha tura ame enentáimmiarmiji̱a̱i̱ nekas enentáimtusam aneeta.’ Muis. 6:5

³⁸ Núiti emka ashí akupkámu naṉkaamas enentáimtustinia nu.

³⁹ Chikitcha ju̱ja̱i̱ métektaku awai. Nusha jú̱nis awai ‘Ame írutramuram ame aya̱shim aneamna nútiksamek aneata.’ Riw. 19:18

⁴⁰ Nu jímiar akupkámu umirkam ashí Muisais akupkámia nusha tura ashí Yúsnan etserin unuiniararmia nusha umirkattame” tímiayi.

Kristu Tawit wéaitiat Yusa Uchirí̱nti

⁴¹ Tura Pariséu tuke irunar pujuiniakui

⁴² Jesus anintrak “Kristu tutai ¿ya wea átiniait. Warí enentáimtarum atumsha?” takui̱ “Tawit wea átiniaiti” tiármiayi.

⁴³ Tuíniakui Jesus chicharainiak “Nuikia ¿urukamtai Tawit, Yusa Wakaní̱ titiá tutai Krístun ‘winia úuntur’ timia? Iis, Tawit ju̱na tímiayi

⁴⁴ ‘Yus winia Úuntrun ju̱na chichaak “Akupin pujutai̱nium winia untsuurui̱ni̱ pujusam Ame nemasrumin nupetkan ámin umirtamkarti tusan amamaam nákarsata” tímiayi Yus.’ YKan. 110:1

⁴⁵ Wátsek, Tawit Krístun ‘winia úuntur’ tai̱sha ¿itiurak ni pampaṉmári̱ ati?” tímiayi Jesus.

⁴⁶ Nuna takui̱ peṉkesha ái̱kcharmiayi. Túrawar atakka uyu̱mamtikiatai tusar Jesusan aniascharmiayi.